Hebreos 13 - Zapoteco de Aloápam

Nu daa lo ca benni ria le Jesús uncabi

¹ Bittu udhanle aquin gue loesle atti raquin gue loes ca benni ria le Jesús.

² Bittu ixulhinle lä ute ganna lisle tseꞌe ca benni dittu atti isíacana atta seꞌele, cumu ttulhe ca benni useꞌe atti nía de belabi lheꞌe liscabi ca benni nna ni lä ute daaquinbi chi betee liscabi beꞌana ingeli.

³ Gualodhá lele ca benni te lisiyya-na gualuni attisiba lebiꞌiba nua te lisiyya len lacana. Gualulaba lele gue ca benni rudhaca güe benni cabi, gualuni attisiba lebiꞌiba nua rudhaca güecana.

⁴ Iyábale atta chi seꞌe latselale, gualgapa respeto tisa begüeele atti betsá nále, bittu otsia latselale, cumu Tata Do Iyyabaaha unie elha uxtisi gue ca nu requi manni-na, ca nu risá nu bittu anca latselani lhe.

⁵ Bittu dha lele belhi-na. Gualeaca xen lele leni nu te guele, cumu Tata Do Iyyabaaha re: “Tsa läga udhá iquia le, lä ocaꞌanguaba suna lebiꞌiba lhe.”

⁶ Larcala nna xen su leri innári: Benni bananie ri-na anque benni raca lanie neti, larcala tsa läga gastia lo bixa re le benni udhacacana neti.

⁷ Gualorexxa lele gue gaxasná bedú le ca benni uca nu lo gueleha, ca biꞌini utixxiꞌaquinbi le ca tisa gue Tata Do Iyyabaaha. Gualulaba lele gue nu tsee ben ca biꞌiniha, gualusigui gualtsia lele Tata Do Iyyabaaha attiba güia le ca biꞌiniha Ben-na lhe.

⁸ Jesucristuha nna ttuba anca Benniha lägabi resía Benniha. Ben-naba nua do atti nía, Ben-naba do nnanna lhe Ben-naba dho ttu dia liiba lhe.

⁹ Bittu ixúyiele tsia lele gue nuxa uleꞌenna le attu nu subi bittu ancabienle, nu bittu raxxína len nu bidetiri gue Jesús. Tseeru anca tseꞌe tsitsiri lo neda gue Tata Do Iyyabaaha cumu de raca lanie ri, attichula eguilari unri tseꞌe tsitsiri lo neda gue Ben-na de udori tisa gue nu rixxiꞌa gue bixa elha go dica gori lhe gue nu bittu dica gori lhe. Cumu ca nu rudo tisa gue nu rixxiꞌa gue ca elha go-na tsa lägabi ttu nu tsee chi uxícana de rudocana tisa gue ca unná.

¹⁰ Atti utti Jesús lo ya crusiha qui utixe gueri, lania uque attiba ttu úna xua lo becoa gue Tata Do Iyyabaaha nu redibaari nnanna. Únaha nua bittu bi elha ralha ca bixxudi bixuu lheꞌe yotu uca leni lariha edíbaacabi.

¹¹ Cumu bixxudi xeniha nna ritaꞌababi lhiꞌu lheꞌe yotuha qui rutebi reni gue ca nimala rutticabiha lo becoa gue Tata Do Iyyabaaha, qui raxa gue ca tulha gue ca benni. Ttiaca cuerpu gue ca nimalaha nna roꞌo yiesi atta seꞌecabiha liba ribeacabi ca nua qui ritecana.

¹² Larcala aníaguaba Jesús, roꞌo yiesiha liba uleacane betticane qui belali reni guee, cumu leni reni gue Benniha liba nna bitúa ca tulha gue ca benni.

¹³ Larcala nna anáguaba riꞌi lhe labíaba iríari tsiari sanori Jesús, masquiba sateri udhaca güe benni ri attiba bedhaca güecana Ben-na.

¹⁴ Cumu yies lo yu-ni nna läga ancana lasiri atta tseꞌeri ttu dia lii. Riꞌi nna diabari reguilari yiesi gueri nu chi daba isía atta tseꞌeri ttu dia lii.

¹⁵ Larcala, de Jesucristuha nna satía tseꞌeri cuequi xenri lee Tata Do Iyyabaaha. Len ca tisa cuequi xenri Ben-na quixxiꞌari, Ben-na anque Benni ra xxeni lee. Unnuha ancana úna uteri len Tata Do Iyyabaaha.

¹⁶ Bittu ixulhinle lä un tseebale len benni, o lä unbale yuda adí benni len nu te guele lhe. Cumu unná ancana attiba ttu úna radi le Tata Do Iyyabaaha rutele lenie.

¹⁷ Gualudo tisa gue ca benni banquinbi le ruleꞌequinbi le ca tisa gue Tata Do Iyyabaaha. Gualudá iquile gue bixa rácabi, cumu ca biꞌin-na rapacabi le qui bittu tsia nittile, lacabi nna isía sá otecabi cuenta leni Tata Do Iyyabaaha gue sina runcabi. Gualun duelha gualuni nu rá ca biꞌin-na qui bittu tseꞌe siꞌicabi, sinuqui leni elha redaca le uncabi sina-na, cumu gansi lebiꞌi unle tseꞌe siꞌi ca biꞌin-na, lania nna läga salía tseenle.

¹⁸ Gualinnaba lo Tata Do Iyyabaaha aca lanie riꞌitu, cumu yuxeabatu lägabi chi bentu ttu nu uni itisatu lo Tata Do Iyyabaaha, iyába nu raca letu untu nna raca letu untu-na lhatsiru.

¹⁹ Rinnabaguaba len lebiꞌi innábale lo Tata Do Iyyabaaha aca lanie neti qui yuba esíaya atta seꞌele-na.

Benni beni lo sitsi-ni ridhelabi ttu padiuxi gue ca benni rulisabi lo sitsi-ni

²⁰ Tata Do Iyyabaaha Benni runie seꞌeri xen su leri, benie beacani Jesucristu Benni bananie ri, belhidhe Ben-na lheꞌe baa atta yuꞌu ca nu yatti-na lhe. Lee anque benni ra xxeni lee ruyúe ri attiba ttu benni ruyú carneꞌe gueni. Leni reni belali Ben-na lo ya crusiha bocaꞌan tsitsi Tata Do Iyyabaaha tisa nu begüee len riꞌi, tisa-ni ben-ni ixuue ttu dia liiba.

²¹ Tata Do Iyyabaaha unie acale benni runi iyá nu anca tsee, qui anáchu dhale unle nu raca lee aca. De Jesucristuha nna uni Tata Do Iyyabaaha len riꞌi nu reꞌo lee, ¡Benniha satía cuequi xenrie! Amén.

²² Ca benni ria le Jesús, rinnaba lenle dhíle elha xen lasi atti ulabale lo sitsi atta rulisa le rudúa elha rieni iquile, cumu läga ixettega tisa diatia lo sitsi-ni.

²³ Neti nna raca lasia unale, Timoteo biꞌini ria le ca tisa gue Jesús attiba riꞌi, chiba beríabi lisiyya. Gansi esíaxxibi atta doa-ni nna güicheba bi gansi chi daya etenalhia le.

²⁴ Natte gualgási padiuxi iyá ca benni banquinbi le ruleꞌequinbi le ca tisa gue Tata Do Iyyabaaha, iyáguaba ca benni chi seꞌe riesi anca gue Ben-na lhe. Ca benni daa daca Italia ridhelhacabi ttu padiuxi guele.

²⁵ Cuina Tata Do Iyyabaaha aca lanie iyáttele. Amén.