Hebreos 12 - Zapoteco de Aloápam

Tata Do Iyyabaaha rise ca benni chi anca xiꞌinie

¹ De ttonáli de re ca benni seꞌe sabiꞌaba ri ruleꞌequinbi ri gaxasná güia lecabi Tata Do Iyyabaaha, larcala riꞌi nna tsa ocaꞌanri iyá nu ruquiꞌa gueri-na, nu lä anca tsee runi tsia nittiri na lhe. Nu unlari nna bittu satú leri, usiguilari tsiari lo neda chi bocaꞌan Tata Do Iyyabaaha gueri.

² Tsa usia lori Jesús, Ben-na anque Benni beni qui ria leri Tata Do Iyyabaaha. Laguabe runi qui eꞌeyuri acari nu ria tsitsi leni Ben-na lhe. Jesús uxielhabe uttie lo ya crusiha masquiba anca nua ttu elhutti nu runna retuinri, cumu yuxeabe dequide chi guate biyúe elha disaha nna lania daa edaca lee. Nnanna nna doe daca lhuitta derechu gue Tata Do Iyyabaaha rinnabie.

³ Gualulaba lele gue nu guate Jesús. Benniha nna tsitsiba nu guate las ná ca nu runi nu lä anca tsee-na. Larcala lebiꞌi nna bittu eyadi gále lo neda gue Tata Do Iyyabaaha, lä saxxacaguabinle lhe.

⁴ Cumu lebiꞌi nna läga chi useꞌele roꞌo iyya roꞌo belhaꞌa uxunina guele gattile de eseꞌe disale bittu dhielhale unle nu lä anca tsee.

⁵ ¿Si chiba bixulhinle ca tisa ruttipacana lele rulisa Tata Do Iyyabaaha le de ancale xiꞌinie? Lo ca sitsi gue Ben-na rinne rá: Xiꞌinto quia, bittu cuꞌu niꞌalu ca tisa rudhaca disa Benni bananie lu-na lo niꞌa gue rutsitsilu, lä eyadi gagualu lo neda guee gansi chi rise lu lhe.

⁶ Cumu Benni bananie ri-na rute elha disa gue ca benni racanie guecani, ritse lheꞌe iyába ca benni anca xiꞌinie lhe.

⁷ Lebiꞌi nna ratele lo elha disa rute Tata Do Iyyabaaha guele qui iyieninle. Runie aná len lebiꞌi cumu de ancale xiꞌinie. Gua yuxeabale läganu ttu tata do bittu rutena elha disa gue xiꞌinniha qui iyienin nua.

⁸ Cumu Tata Do Iyyabaaha nna iyába ca benni raca xiꞌinie rute elha disa guecani. Larcala gansi Ben-na bittuba rute elha disa guele, lebiꞌi nna läga gualí ancale xiꞌini Ben-na, xiꞌini nu subiba le.

⁹ Anáguaba beni ca tata gueri seꞌe yies lo yu-ni len riꞌi, bedhaca disaguabacabi ri, riꞌi nna upabari cabi respeto. Larcala adílaba tsee anca udori tisa gue Tata gueri do iyyabaaha qui gatta elha nabani gueri ttu dia lii lo Ben-na.

¹⁰ Ca tata gueriha nna bedhaca disabacabi ri ttu tiempu laca ancari güexxa attiba racaquinbi anca tsee len riꞌi, ttiaca Tata Do Iyyabaaha rudhaca dise ri qui salía tseenri. Anáchu nna acari benni seꞌe riesi lheꞌe nu lä anca tsee attiba lee.

¹¹ Gualíba, ni ttu elha disa bittu ancana nu uni eyoꞌo leri atti rateri na, delába nua nna runla nua riseꞌe siꞌiri. Ttiaca gansi bedába iquiri atti rateri nua, dequide lania nna chi acari benni te elha xen lhasi gueni, nu runi nu anca tsee lhe.

¹² Denuala nna gualuttipa lele lo neda gue Tata Do Iyyabaaha, bittu ulha nále, tsitsi gualseꞌe, bittu unle atti runi nu bitturu ridá rea xibini.

¹³ Gualolixxa lo neda guele qui aca dha tseele, qui anáchu ca benni bittu seꞌe tsitsi lo neda gue Tata Do Iyyabaaha, bittu udhancana ria lecani Ben-na.

Gualudo cuidadu bittu cuꞌu niꞌale Tata Do Iyyabaaha

¹⁴ Gualun duelha tseꞌe tseele len iyá benni. Gualunguaba duelha acale benni gue Tata Do Iyyabaaha chi seꞌe riesi lheꞌe nu lä anca tsee, cumu gansi bittuba nna tsa läga aca ilenri Tata Do Iyyabaaha.

¹⁵ Gualudo cuidadu bittu cuꞌu niꞌa ni ttule nu tsee redá le Tata Do Iyyabaaha utee len lebiꞌi. Gualudoguaba cuidadu qui bittu acale attiba ttu coana ilhá runi leni nu uni tsia nitti adí benni.

¹⁶ Ni ttule bittu isále nu bittu anca latselale, bittuguaba cuꞌu niꞌale nu anca lheꞌa gue Tata Do Iyyabaaha lhe unle attiba beni Esaú, lana nna lo niꞌa gue ttu xiga elha gorba bettoꞌona derechu te gueni de ancana xiꞌini primero gue tata gueniha.

¹⁷ Lebiꞌi nna gua yubale, dequide lania nna duelhaba beni Esaú unnabana lo tata gueniha qui innába biꞌiniha lo Tata Do Iyyabaaha aca len Benniha na qui dhína elha tsee ralhana dhína, ttiaca bitturu uca. Masquirba tticaxa uresna rennabana nua ttiaca bitturu uca.

¹⁸ Lebiꞌi nna läga ubigale atta do ttu iꞌiya nu guacaba sattanari, attiba ca benni Israel ubigacana atta do iꞌiya Sinaí nu rite riria belha gueniha, atta anca chulha bexculoruha lhe atta ruꞌu be de racaxxattaba iyya be lhe.

¹⁹ Bittuguaba bieninle tsiꞌi trompeta lhe niguaba tsiꞌi Tata Do Iyyabaaha lhe. Ca benni bienin tsiꞌi Ben-na lania nna bencana ruegu lo Ben-na bitturu innee ulise cana,

²⁰ cumu de bittu rdacana uchíacana lo ca tisa run Benniha mandadu uncana atti re: “Gansi nuxa ibigana udú niꞌani lati iꞌiya-ni, lebiꞌi nna uttile na len iyya, masquiba ancana ttu nimala.”

²¹ Nu bilen ca biꞌiniha lania ancana ttu nu runi tsitsiba rasincabi, larcala axtaba Moisés rábi: “Attula de rixidia de rasbatia.”

²² Lebiꞌi nna ubigabale iqui iꞌiya te láni Sión atta re yiesi gue Tata Do Iyyabaaha Benni do bani-na. Yiesi-na nua Jerusalén re iyyabaaha, atta seꞌe ixeru mil ingeli runcabi laní gue Tata Do Iyyabaaha.

²³ Níaguaba chi seꞌe ca benni primero uca xiꞌin Tata Do Iyyabaaha, ca benni dia lácabi iyyabaaha. Lebiꞌi nna chi ubigale len Tata Do Iyyabaaha Benni runi elha uxtisi gue iyáxea benni, chiguaba ubigale atta seꞌe ca espíritu gue ca benni chi utti beni nu anca tsee, ca benni chi beni Tata Do Iyyabaaha beꞌeyucabi ancacabi benni idaꞌa su.

²⁴ Chiguaba ubigale len Jesús Benni ribea loe gue tisa cubi bodhaꞌan Tata Do Iyyabaaha len riꞌi, leni reni belali Benniha atti uttie lhe reniha ben-na rigúe ca tulha gueri-na. Denua nna nuarca rixuuru reni gue Ben-na atti reni gue Abel.

²⁵ Larcala nna gualudo cuidadu bittu cuꞌu niꞌale Tata Do Iyyabaaha benni rinnee rulise le-na. Cumu gansi ca benni Israel ca nu uluꞌu niꞌacani Ben-na atti belise cana yies lo yu-ni, tsa läga ulácana labíaba uxícana elha disa ralhacana dhicana, adílaba riꞌi tsa läga lhári gansi cuꞌu niꞌari Benni rise ri do iyyabaaha li.

²⁶ Atti unne Tata Do Iyyabaaha belise ca benni Israel iqui iꞌiya Sinaí, lania nna bexxú ttitti tsiꞌe yies lo yu. Nnanna nna chi begüee tisa re: “Neti unia ixú attu libe, ttiaca bittu sunru yies lo yu, sinuqui anáguaba iyyabaaha lhe.”

²⁷ Atti re: “Neti unia ixú attu libe”, diabanie re, lee nna cuabe ca nu benie dica isila seꞌe yies lo yu, qui eyaꞌana ttu tsaba ca nu bittu dica isila.

²⁸ Atta rinnabia Tata Do Iyyabaaha rute len riꞌi nnanna läga isilana. Denua nna ugüeri Ben-na ixquixarue, cuequi xenrie lhe unbari attiba radi lee unri, de ria lerie lhe raparie respeto lhe

²⁹ cumu Tata Do Iyyabaa gueri-na anque attiba ttu gui belha rulhuxa iyába.