Hebreos 11 - Zapoteco de Aloápam

Ni rixxiꞌa bixa ben ca benni useꞌe atti nía de güia lecabi Tata Do Iyyabaaha

¹ Atti rári: “Ria leri gue Tata Do Iyyabaaha, riꞌi nna ruxxenba leri guadíbari nu seꞌeri ribedari dhíri. Masquiba bittu chi rilenri nua ttiaca itú iqui itú leri ruxxen leri gualíba dhíri nua.”

² Ca benniola gueri useꞌe atti nía nna de güiaba lecabi gue Tata Do Iyyabaaha, nuarca ucacabi benni guadi lee Ben-na gue nu bencabi.

³ Riꞌi nna de ria leri gue Tata Do Iyyabaaha, larcala yuri lee nna leni tisa unnebe benie lo bea-na lhe yies lo yu-ni lhe. Larcala nna läga ca nu rilenri nnanna bixuuni Ben-na benie ca unná.

⁴ Abel, de güiaba lebi gue Tata Do Iyyabaaha, nuarca betebi ttu úna tseeru len Ben-na atti betsibi Caín. Denuala nna nuarca rá Tata Do Iyyabaaha: “Abel ancabi benni runi nu anca tsee”, uxíbe baneda úna gue biꞌiniha lhe. Larcala, masquiba chi utti Abel, cumu de ucabi benni güia tsitsi lebi gue Tata Do Iyyabaaha nuarca riꞌi nna sna runabari gue nu benbi qui aníaguaba usiguiri unri.

⁵ Enoc, de güiaba lebi gue Tata Do Iyyabaaha, nuarca läga uttibi, deyya banbabi len Tata Do Iyyabaaha, larcala läganu biꞌiniha guattiꞌacana. Lo ca sitsi gue Ben-na riguixxiꞌa rá: “Atti deobali eche Ben-na bi chi daa tisa labi nna benbabi nu guadi le Ben-na.”

⁶ Ttiaca gansi bittuba ria leri gue Tata Do Iyyabaaha, tsa läga aca unri nu radi le Ben-na, cumu ca benni ribiga lo Tata Do Iyyabaaha, raca duelha tsia lecani gualíba do Ben-na, gutebe nu ralha ca nu rinnabacana yuda lo Ben-na lhe.

⁷ Noé, de güia lebi gue Tata Do Iyyabaaha, nuarca atti unne Benniha re biꞌiniha dequi isía sá aca ttu nu aca, masquiba tsa lägabi chi ruleꞌe lo bixa nua aca, bedobabi tisa benbi ttu barco xxeni qui lhá ca benni seꞌe lheꞌe yoꞌo guebiha lo nua. De güia lebi gue Tata Do Iyyabaaha nuarca benbi qui dia nitti ca benni bittu güia lecani seꞌe yies lo yu-ni, labi nna ucabi benni uxí Tata Do Iyyabaaha elha xen lhasi gue ca tulha guebi, de güia lebi Ben-na.

⁸ Abraham, de güia lebi gue Tata Do Iyyabaaha, nuarca atti uxi benniha bi qui iríabi atta dobiha nna bedobabi tisa biríabi diabi lo yu nu ute Tata Do Iyyabaaha len labi. Labi nna biríababi lo yu guebiha masquiba lä yubi ga nua diabi.

⁹ De güiaba le Abraham gue Tata Do Iyyabaaha, nuarca ucabi attiba ttu benni dittu atti udobi lo yu nu chi gaꞌanani Tata Do Iyyabaaha dhibi. Labi nna lheꞌe ttu yoꞌo lariba udobi. Aníaguaba beni Isaac lhe Jacob lhe ca biꞌini chi gaꞌana dhíguaba lo yu nu chi rá Tata Do Iyyabaaha utee.

¹⁰ Cumu Abraham ribedababi dhobi lheꞌe yiesi nu anca tsitsi cimientu gueniha, nu cuinaba Tata Do Iyyabaaha biriequie gaxasná acana, laguabe benie na lhe.

¹¹ Anáguaba de güiaguaba le Abraham Tata Do Iyyabaaha, nuarca masquiba chi dienbi lhe masquiba anca Sara nuila nu bittu dica uja xiꞌinbi lhe labi nna uxíbabi fuerza qui bisía xiꞌinbi de güia lebi labíaba unba Tata Do Iyyabaaha nu chi re unie.

¹² Larcala masquiba chi ancacabi benni chi uxxu sna bisíaba ttu xiꞌincabi. Xiꞌincabiha nua guani xxattabi attiba ca beli sia lo bea-na, attiguaba yuxi re roꞌo indattoo-na lhe tsaba bittu dha benni ibabinna cana.

¹³ Iyába ca biꞌin-na läga chi uxícabi nu rá Tata Do Iyyabaaha utee len lacabi atti utticabi, ttiaca de ria lecabi Ben-na nuarca atti sna seꞌe banbacabi nna idittuli biláquinbi nu ribedacabi dhicabiha, lacabi nna attulade beꞌo lecabi de begüiacabi nua. Laniala nna guadú lecani, benni dittu dia yuꞌu nedaba ancacabi yies lo yu-ni.

¹⁴ Ca benni rinne aná nna lhixxa suba ruleꞌe locabi lacabi nna requibacabi reguilabacabi yiesi nu anca lascabi.

¹⁵ Cumu ttirca bittuba bidanquinbi yiesi atta beríacabiha nna sna ucaba bequicabi besincabi nía attu libe.

¹⁶ Ttiaca lacabi nna raca lecabi ttu yiesi tseeru, unní ancana yiesi re iyyabaaha. Denuala nna bittu rettuin Tata Do Iyyabaaha anque Dios guecabi, cumu de chi retseenie ttu yiesi guecabi.

¹⁷ De güia le Abraham Tata Do Iyyabaaha, larca atti uluꞌu bia Benniha bi, labi nna bedobabi tisa bedaxxubi xiꞌinbi Isaac qui uttibi biꞌiniha utebi úna lo becoa gue Benniha. Abraham nna berubinbi xiꞌinbi nu tturbana doenbiha gattina,

¹⁸ masquiba chi begüee Tata Do Iyyabaaha tisa re biꞌiniha: “Isaac acana nu useꞌe xiꞌinni qui tseꞌe benni datíalu.”

¹⁹ Abraham boquinna iquibi, Tata Do Iyyabaaha anque Benni ra xxeni lee, Benniha nna gunbe eyacani ca nu yatti-na. Larcala atti chi ulá Isaac bittu uttibi, attisiba lheꞌe baa atta yuꞌu ca nu yatti-naba beadha biꞌiniha, qui bedí Abraham bi attu libe.

²⁰ De güia le Isaac Tata Do Iyyabaaha nuarcala unnababi aca len Benniha Jacob lhe Esaú lhe. Utixxiꞌenbi cabi guacaba len Tata Do Iyyabaaha cabi ca sá chi daba isía.

²¹ De güia le Jacob Tata Do Iyyabaaha, nuarca atti chi deoba gattibi nna unnababi aca len Benniha ttuttu ca xiꞌini José. Labi nna iqui garroti guerbabiha uxuabi chibuca udú reabi laca ribequi xenbi Tata Do Iyyabaaha.

²² De güia le José Tata Do Iyyabaaha, nuarca atti chi rattibiha nna unnebi rábi eríaba ca benni Israel lo yu te láni Egiptoha, benbi mandadu bixa uncana len ca sitta guebiha lhe.

²³ De güiaguaba le ca tata nan gue Moisés Tata Do Iyyabaaha, nuarca atti uli biꞌiniha nna becatsicabi biꞌiniha tsunna beo lheꞌe yoꞌo guecabiha, cumu biláquinbi anca biꞌiniha ttu unto sipa, lacabi nna tsa läga usquinbi lo nu rinnabia gue Egipto de chi bocaꞌan tsitsi nua tisa gatti ca unto gali anca unbiyuu.

²⁴ De güiaguaba le Moisés Tata Do Iyyabaaha, nuarca atti chi ancabi nu xeni nna bitturu uca lebi gácan bi xiꞌini xiꞌiniunná nu rinnabia gue Egipto.

²⁵ Tseerla uquinbi bedhaca güe ca nu Egiptoha bi attiba rudhaca ca nua ca benni gue Tata Do Iyyabaaha, attichula dhobi edí baabi ttu satti nu lä anca tsee raca yies lo yu-ni.

²⁶ Labi nna bedhaca lebi teerla lidhaca satebi loesi nu sate Cristuha attichula edí baabi nu tsee te Egiptoha. Cumu labi nna tsaba chi besía lobi nu tsee ute Tata Do Iyyabaaha len labi.

²⁷ De güia le Moisés Tata Do Iyyabaaha, nuarca biríabi lo yu gue Egiptoha, labi nna tsa bittu usinbi lo nu risaꞌaxxattani nu rinnabia gue nía. Tsitsiba udúbi cumu attisiba rilábinbi Tata Do Iyyabaaha Benni bittu rilenrie.

²⁸ De güia le Moisés Tata Do Iyyabaaha, nuarca benbi mandadu ca benni Israel uncana laní te láni Pascua. Benguabi mandadu utticana ca carneꞌe qui udhedhicana reni gue ca nua roꞌo ca puerta gue ca yoꞌo atta seꞌecanaha. Bencana anía qui ingeli utti ca xiꞌin biyuu primero gue ca benni Egiptoha, bittu bi udhaquinna ni ttu ca xiꞌin biyuu primero gue ca benni Israel.

²⁹ De güia le ca benni Israel Tata Do Iyyabaaha, nuarca attiba ttu nu rite lo yu bisi utecabi lheꞌe Indattoo Xinaaha. Ttiaca atti ben ca nu Egiptoha tteguabacana lheꞌe indattooha nna gopittebacana inda.

³⁰ De güiaguaba le ca benni Israel Tata Do Iyyabaaha, nuarca ubixxi lo deꞌe yequi yiesi Jericó dequide bedaꞌa gasi (7) bisa güequicabi sabiꞌabana.

³¹ De güiaguaba le nuila rutesa latini lá Rahab Tata Do Iyyabaaha, nuarca bittu uttina atti utti ca nu diti bittu bedo tisa seꞌe lheꞌe yiesiha, cumu lana nna tseeba biyúna ca benni Israel güia güelhatsi lheꞌe yiesi atta donaha.

³² Ixeru nu te innía, ttiaca tiempuba reasatia qui quixxiꞌatia le gue Gedeón lhe gue Barac lhe gue Sansón lhe gue Jefté lhe gue David lhe gue Samuel lhe gue ca benni uca profeta gue Tata Do Iyyabaaha lhe.

³³ Ca biꞌin-na de güia lecabi Tata Do Iyyabaaha nuarca udácabi lo ca yiesi bitilha lencabiha, ucacabi nu unnabia tsee lhe uxícabi nu chi rá Tata Do Iyyabaaha utee len lacabi lhe bencabi qui ca besi bitilha lencabiha bittu uto ca nua cabi lhe.

³⁴ Bodholacabi lo gui nu tsitsiba radha belha gueni lhe urecabi ulácabi bittu utticabi leni espada lhe beacacabi nu run tsitsi atti ancacabi nu bittu ra tsitsi leni lhe beꞌeyucabi ucacabi nu ra tsitsi leni gue lo utilha lhe bería lacabi ca soldado gue ca nu rinnabia gue ca yiesi dittu bitilha lencabiha lhe.

³⁵ Useꞌeguaba ca nuila ca nu de güia lecabi Tata Do Iyyabaaha nuarca bedícana ca benni guecaniha atti chi beacaquinna dequide chi utticana. Adícabi nna utticabi de bedhaca güeexxattacana cabi, cumu tsa läga uca lecabi udhancabi neda gue Tata Do Iyyabaaha qui odilácan cabi, bencabi anía de xen lecabi gatta ttu elha nabani tseeru guecabi gansi chi beacaquinbi.

³⁶ Adícabi nna uluꞌu niꞌacan cabi aní lo benni, utíncan cabi lhe bedocan cabi cadena lhe utixxacan cabi lisiyya lhe.

³⁷ Bettican cabi leni iyya lhe bencan cabi rulha leni sierra lhe uluꞌu biacana cabi qui beleꞌe lo gansi gualíquinbi riaga lecabi Tata Do Iyyabaaha lhe bettican cabi leni espada lhe na niba güequicabi nucucabi sunruba yieti xo carneꞌe o yieti xo chiva lhe ucacabi benni nu ttu tsaba bea gueni lhe guatecabi biyúcabi elha disa lhe bedhaca güecan cabi lhe.

³⁸ Ca biꞌiniha nna tsaba niba saroꞌo bittu elha ralha ca benni seꞌe yies lo yu-ni tseꞌe ca biꞌiniha len lacana, cumu ancacabi benni tsee. Lo ca yu bisi atta nuttu benni seꞌeba güequicabi, ca iꞌiyattoo-naba lhe lheꞌe ca belea sia lheꞌe ca iyyatto-naba lhe lheꞌe ca belea sia lhiꞌu yuba lhe useꞌecabi.

³⁹ Iyába ca biꞌiniha masquiba ucacabi benni beꞌo le Tata Do Iyyabaaha gue nu bencabi de güia lecabi Ben-na, läga uxícabi nu rá Ben-na utee len lacabi,

⁴⁰ cumu chila re-ni Tata Do Iyyabaaha ri cuenta utee ttu nu tseeru gueri, larcala len riꞌi liba aca ca biꞌiniha nu eꞌeyu dhi nu chi gaꞌanani Tata Do Iyyabaaha utee gueri.