Hebreos 1 - Zapoteco de Aloápam

Xiꞌini Tata Do Iyyabaaha anque benni ra xxeniru lee atti ca ingeli-na

¹ Ca tu atti nía, ixe libe lhe ixe loba lhe unne Tata Do Iyyabaaha belise ca benniola gueri useꞌe lania. Lee nna bixuunie ca benni uca profeta guee qui utixxiꞌacanie ca biꞌiniha nu raca lee unacabi.

² Tiempu nu chi daa riluxa seꞌeri nnanna nna rixuunie Xiꞌinie Jesús qui rinnee rulise ri. Xiꞌinie-nguaba bixuunie benie iyáxeaba nu seꞌe lo bea-na lhe nu seꞌe yies lo yu-ni lhe las ná Ben-naguaba bodhaꞌane iyáxeaba lhe.

³ Xiꞌinie-ni ruleꞌe loe nu xxeni ra le Tata Do Iyyabaaha. Lee anque itúxeaba atti anca Tata Do Iyyabaaha. Anque Benni tsitsiba ra lee, de nua nna leni tisa guebe denie iyáxeaba nu seꞌe yies lo yu-ni. Benniha nna dequide uttie lo niꞌa gue ca tulha gueri qui eyacari nu nari lo Tata Do Iyyabaaha nna beopittebe iyyabaaha qui bedoe daca ladu derechu gue Tata Do Iyyabaaha Benni ra xxeni lee.

⁴ Anía uca nna beꞌeyu Xiꞌini Tata Do Iyyabaaha uque Benni ra xxeniru lee atti ca ingeli-na, Tata Do Iyyabaaha nna begüee Ben-na ttu ladi xeni guee nu ruleꞌe lo anque Benni ra xxeniru lee atti ca ingeli-na.

⁵ Cumu Tata Do Iyyabaaha, tsa lägabi chi re ni ttu ca ingeli guee-na ca tisa re Jesús: Lu ancalu xiꞌinia, nasá rinnea ria: “Neti bija lu.” Bittuguaba re nuxa ttu ca ingeli-na: Neti aca tata guelu, lu nna acalu xiꞌinia.

⁶ Unneguabe attu libe atti udhelhe yies lo yu-ni Xiꞌinie benni tturbe donie. Lee nna benie mandadu re: Iyáxeale, ca ingeli quia-na, gualudú xibile lo Xiꞌinia-na.

⁷ Atti unne Tata Do Iyyabaaha gue ca ingeli-na, lee nna re: Neti runia reaca ca ingeli quia-na attiba be, ca benni rixuu lo sina quia-na nna runia reacacana attiba belha gue gui.

⁸ Ttiaca atti utixxiꞌe gue Xiꞌinie-na lee nna re: Lu ancalu Tata Do Iyyabaa, ttu dia liiba innabialu. Lu innabiatseelu, attiba ancaba gueni.

⁹ Lu nna ruꞌu lelu nu anca tsee, nu lä anca tseeha nna riguꞌu niꞌalu. Denuala nna neti benni anca Tata Do Iyyabaa guelu, becueea lu benia acalu benni cue ittaru leni atti adí ca nu seꞌe len luu.

¹⁰ Rinneguaba lo ca sitsi gue Tata Do Iyyabaaha atta re: Lu nna xa Benni banani iyáxea, atti udulo ureli yies lo yu-ni nna luba ulequilu xlattini, cuinabalu benlu ca lo bea-na lhe.

¹¹ Ca unná nna lhuxabacana, ttiaca lu nna satíaba dolu. Iyába ca unná gaxxucana, iyuyabacana attiba ca xo benni.

¹² Attiba reyapa ttu lari odapal cana, attiba rotsía xo benni, aníaba otsial cana lhe. Ttiaca lu nna satíaba acalu nu ancabalu, tsa läga lhuxalu.

¹³ Tata Do Iyyabaaha nna tsa lägabi chi re ni ttu ca ingeli guee na: Daca lhuitta derechu quia udo, axta liba unia aca ca nu lä raca uyúcan lu-na nu udú niꞌalu iquicani.

¹⁴ Cumu iyába ca ingeli-na sunruba espíritu rixuu lo sina gue Tata Do Iyyabaaha ancacabi. Lee nna ridhelhe ca ingeli-na qui uncabi yuda ca benni chi gaꞌananie odile.