Gálatas 6 - Zapoteco de Aloápam

Un loesri yuda

¹ Ca benni ria le Jesús, gansi nuxttule ilenle ttu benni ria le Jesús runna nu lä anca tsee, lebiꞌi ca benni chi rudoru tisa gue Espíritu gue Tata Do Iyyabaaha unle nua yuda qui edú tsitsina. Leni tisa siꞌi leba ulisale na. Coa ttuttule nna gualudhaca lele, qui läbi aca isíaguaba tsuꞌubiale, nianna ixú yiele unle nu lä anca tsee.

² Gualun yuda loesle atti bixa ratele. Cumu atti runle anía nna rudole tisa gue nu beni Cristuha mandadu unle.

³ Cumu nu raquinna dequi ancana nu ra xxenru leni, ttiaca läga gualí anía anca, la unnuhaba nua ridí yie la labana.

⁴ Coa ttuttule gualugüiaxxatsee gue nu runle. Gansi tseeba anca nu runleha nna lania liba nna guate roꞌole eyoꞌo lele gue nu runleha. Ttiaca bittu cuꞌubiale nu runleha leni nu runi adí benni,

⁵ cumu cua ttuttu benni te nu daa loni unna.

⁶ Nuxaba benni rudhetina ca tisa gue Tata Do Iyyabaaha, daba loni ugüena benni ruleꞌenbi naha latti gue iyába nu tsee te gueni.

⁷ Bittu dhi yie la lebiꞌiba, cumu Tata Do Iyyabaaha nna läganu dhana dhi yiena benniha. Lebiꞌi nna gua yubale, nu radaba benni, unnuhaba redína.

⁸ Aníaguaba lebiꞌi gansi unle nu lä anca tsee ridá lele, unnuhaba unna tsia nittile, nu runi nu anca tsee radi le Espíritu gue Tata Do Iyyabaaha nna Espírituhaba utee elha nabani gatta ttu dia lii gueni.

⁹ Larcala nna bittu saxxaquinri unri nu anca tsee, cumu gansi bittuba edílreri nna guasiaba sá dhíri nu tsee gue nu runri.

¹⁰ Denua nna atti aca un tseeri nna un tseeri leni nuxaba benni, ttiaca lola leni ca benni ria le Jesús un tseeri.

Len ca tisa-ni riluxa rinne Pablo

¹¹ Gualgüiarga, aníli de xxeni anca ca letra runi cuinaga neti lo sitsi-ni qui idhelha guele.

¹² Iyába ca nu rdaca eyaꞌan tseecana len benni, ca unnuha nua runcana duelha guele tsuꞌule senni, nu runcana leni ca unbiyuu Israel. Lacana runcana aná qui bittu usia le benni cana atti quixxiꞌacana: Cristuha nna chiba utixe nu dica quixari gue ca tulha gueri atti uttie lo ya crusiha.

¹³ Cumu ni ca nu yuꞌu senni, lä rudocana tisa gue nu rá lo ca ley bocaꞌana Moisés. Lacana nna sunruba raca lecani tsuꞌule senni, qui dhacana innácana dequi lebiꞌi uchúle saroꞌo yieti, delába senni, nu runcana leni ca unbiyuu Israel.

¹⁴ Neti nna niba saroꞌo bittu runia ulhopi lasia gue attu bixa, gan läba gue nu guate Jesucristu Benni bananie ri lo ya crusiha. Larcala de nu guate Benniha lo ya crusiha nna nu raca yies lo yu-ni nna attiba nu yattiba chi ancana len neti, anáguaba neti de nu guate Cristu lo ya crusiha attisiba nu yattiba anca lo nu anca gue yies lo yu-ni de bitturu runia na.

¹⁵ Cumu gansi chi babari len Jesucristu nna tsa lägabi daca si yuꞌu senni, o si bittu lhe. Nu daca nna ancana eyacari benni cubi lo Tata Do Iyyabaaha.

¹⁶ Iyába ca benni runi atti ria-ni nna Tata Do Iyyabaaha unie tseꞌecabi xen su lee, satúa le Ben-na cabi lhe. Anáguaba unie len ca benni Israel gualíga anca guee.

¹⁷ Bedaa nnanna bitturu raca lasia nuxaruha etennana elha richacha iqui quia, de ria lele nu ruleꞌeni nu subi le, cumu neti nna chi seꞌe ca berusi cuerpu quia-ni gue nu ratea de requia rixxiꞌaya gue Jesús Benni bananie ri.

¹⁸ Ca benni ria le Jesús, cuina Jesucristu Benni bananie ri edá lee aca lanie le. Amén.