Gálatas 5 - Zapoteco de Aloápam

Requi lári cumu Cristuha bodile ri

¹ Cristuha chi bodile ri qui tsequi lári. Denuala nna tsitsi gualtseꞌe, bittu dhielhale edeacale attiba nu ttoꞌo lo sina gue ca ley bocaꞌana Moisés.

² Gualdo nagale quia. Neti Pablo rinnea rulisa le. Gansi sna rurenbale senni nu runcana leni ca unbiyuu Israel. Lania nna tsa lägabi ixuu len lebiꞌi elhutti gue Cristuha.

³ Rixxiꞌatia le attu libe: nuxaba unbiyuu ureni senni, nu runcana leni ca unbiyuu Israel, lana nna labíaba raca duelha udona tisa gue iyárechaba nu rá lo ca ley bocaꞌana Moisés.

⁴ Lebiꞌi, ca nu raquinle dequi de udole tisa gue ca ley-na nuarca eꞌeyule acale nu bitturu tulha gueni te lo Tata Do Iyyabaaha, chiba biriesle Cristuha, chiguaba bennittile elha tsee bedaa le Tata Do Iyyabaaha bete guele lhe.

⁵ Ttiaca riꞌitu nna de riaba letu Jesucristuha lhe de Espíritu gue Tata Do Iyyabaahaba lhe xen letu eꞌeyutu acatu benni bitturu tulha gueni te.

⁶ Cumu riꞌi atta chi ancari benni baba len Jesucristu, lärgabi daca si ancari nu ren senni nu labi ca unbiyuu Israel runcana o si bittu ren senni nu runcana leni ca unbiyuu Israel. Nu daca nna ancana ria leri Jesús, unnua runi raquin gue loesri.

⁷ Lebiꞌi nna tseeba diale lo neda gue Tata Do Iyyabaaha. ¿Núla bixa rán le qui bitturu udole tisa gue nu anca gualí?

⁸ Cumu läga Tata Do Iyyabaaha benni uxie le lo neda guee udhelhe nu uxí yiena lebiꞌi.

⁹ ¡Gualudo cuidadu! Lebiꞌi nna gua yuxeabale, saroꞌoru levadura runna radha lheꞌe itúba cua ttaxtila.

¹⁰ Neti nna xxenba lasia Benni bananie ri-na, lebiꞌi nna läga otsiale nu rulaba lele. Ttiaca nu requi rucannana iquile-na, guteba Tata Do Iyyabaaha elha disa gueni, nuxaba ancana.

¹¹ Ca benni ria le Jesús, gansi neti sna requirba rpea benni dequi raca duelha cuecabi senni, nu labi ca unbiyuu Israel runcana, loesi nu runi ca benni Israel, lania nna lärga usia le ca benni neti. Ttirca sna requirba rinnea anía nna lärgabi iyien dícani ca benni gue nu ria. Unná nna rien dilaquinna ria: Chiba utixa Cristuha lo ya crusiha nu dica quixari.

¹² ¡Ca nu requi rucannacana iquile-na, locala tsala ichecule atta riguꞌule senni-na!

Gualtseꞌe gualudo tisa gue Espíritu gue Tata Do Iyyabaaha

¹³ Lebiꞌi, ca benni ria le Jesús, uxiba Tata Do Iyyabaaha le qui tseꞌe lále, qui bitturu innabia ca ley bocaꞌana Moisés-na le. Ttiaca bittu aquinle de chi seꞌe lále-na guacaba unle nu racaba lele. Nu unlale nna gualuni nu anca tsee len loesle de raquin gue loesle,

¹⁴ cumu iyába nu rá lo ca ley bocaꞌana Tata Do Iyyabaaha leni Moisés rido tisa gueque gansi chi rudori tisa gue tisa rá: “Aquinlu gue adí benni attiba raquin gue la luba.”

¹⁵ Ttiaca gansi goyaꞌa loesiba lhe go loesiba lhe ruꞌule gualdo cuidadu qui lä ulhuxa loesle.

¹⁶ Larcala nna ria: gualtseꞌe gualudo tisa gue Espíritu gue Tata Do Iyyabaaha, tsa bittu unle nu lä anca tsee ridá lele unle.

¹⁷ Cumu nu lä anca tsee ridá le cuerpu gue ttu benni unna läga raca uyú nua Espíritu gue Tata Do Iyyabaaha. Anáguaba Espíritu gue Tata Do Iyyabaaha, läga raca uyúe nu lä anca tsee ridá le cuerpu gue ttu benni unna. Irupaba ca unní reseꞌe disa lo loescani larcala nna läga raca unle nu raca lele.

¹⁸ Ttiaca gansi lebiꞌi unle nu rá Espíritu gue Tata Do Iyyabaaha, lania nna lärga rinnabia ca ley-na le.

¹⁹ Lebiꞌi nna gua yuxeabale, ca unní anca nu lä anca tsee ridá le ca benni uncana: requi mannicana, risácana nu bittu anca latselacani lhe runcana iyáloba nu satsa ridá lecani uncana lhe

²⁰ rudú xibicani lo ca nu bittu gualí anca diosi lhe runcana gue güesaa lhe rutía di lecani lhe riguꞌu lecani lhe run yiecana lhe xalhaba risaꞌaquinna lhe ruttilhacana benni lhe rilhaꞌacana lheꞌe loes benni lhe runcana riseꞌe ixe cue benni lhe,

²¹ rapacana malisi lhe rutticana benni lhe ancacana nu dusi lhe rite bedácana riꞌa rocana atta raca laní lhe runruguabacana adí ca loesi nu lä anca tsee-ni lhe. Neti nna rixxiꞌatia le, attiguaba chi rpea le ttuha, ca nu runi aná nna lägabi elha ralhacana dhicana nu ute Tata Do Iyyabaaha len ca benni rinnabie.

²² Ttiaca nu tsee runi Espíritu gue Tata Do Iyyabaaha len riꞌi nna ancana: Acari benni raquin gue loesni, nu redaca leni lhe nu tee elha xen lasi gueni lhe benni pasensi lhe benni du tsee leni lhe benni resiꞌini adí benni lhe benni uxxen leri gueni lhe

²³ benni siꞌi le lhe benni ridá rinnabiana elha rieni gueni lhe. Tsa lägabi ley te usunana unri ca loesi nu tsee-ni.

²⁴ Ca benni chi anca gue Cristuha nna chiba bocaꞌancana iyába nu lä anca tsee runcana, nu satsa ridá lecani uncana lhe attisiba chiba betácana iyába nua lo ya crusi.

²⁵ Gansi Espíritu gue Tata Do Iyyabaaha rute elha nabani gueri, anáguaba tseꞌeguabari udori tisa gue Espíritu-na.

²⁶ Bittu acari nu ttaba, niguaba lä unri iseꞌen loesri lhe lä gapaguaba malisi gue loesri lhe.