Gálatas 4 - Zapoteco de Aloápam

Nnanna chi ancari xiꞌini Tata Do Iyyabaaha

¹ Arcaguaba lasia upea le: Laca nu dhi interésiha sna ancabana unto, ttuba anca nua len ttu benni ttoꞌo lo sina, masquiba lana chi ancana nu beaca gueni iyába nu te gue tata gueniha.

² Sna rudoba nua tisa gue ca nu beꞌana ruyúcan-na, gue ca nu rapacana nu anca gueniha lhe axta liba isía sá chi gaꞌanani tata gueniha dhína nu ralhana.

³ Anáguaba guateri ttuha attiba ttu unto ancari lania. Larcala attiba ttu nu ttoꞌo lo sina ucari, bedori tisa gue ca nu bittu gualí anca diosi-na.

⁴ Ttiaca atti chi bisía tiempu gaꞌanani Tata Do Iyyabaaha idhelhe Xiꞌinie Jesús yies lo yu-ni, laniala nna udhelhe Benniha. Benniha nna ttu nuilaba uluꞌune. Lee nna uque Benni bedo tisa gue ca ley bocaꞌana Moisés.

⁵ Anioca nna bisía Benniha bete elha nabani guee qui bodile ca benni seꞌe rudo tisa gue ca ley bocaꞌana Moisés. Anía liba nna beon xiꞌini Tata Do Iyyabaaha ri.

⁶ De chi ancari xiꞌinie nna nuarca udhelhe Espíritu gue Xiꞌinie lheꞌe lastoori. Espírituha Ben-na rinnee atti rári Tata Do Iyyabaaha: “¡Tata xisto quia!”

⁷ Larcala lebiꞌi nna lärga ancale benni ttoꞌo lo sina gue ca ley-na, xiꞌini Tata Do Iyyabaahaba chi ancale. De chi ancale xiꞌinie nna dhíguabale interés nu chi rá Ben-na utee de nu guate Cristuha.

Pablo richacha iquibi gue ca benni seꞌe Galacia

⁸ Ttiaca ca tu ttuha atti bittu chi ancabienle Tata Do Iyyabaaha, nu ttoꞌo lo sinaba ancale gue ca nu bittu gualí anca diosi-na. Ca unnába bedole tisa bixuule locani.

⁹ Nnanna nna de chi ancabienle Tata Do Iyyabaaha, o tseerla innía Ben-na chi ancabiene le. Nianna, ¿gasná nua nna rdaca dacabale eyequile odidole tisa gue ca nu bittu gualí anca diosi-na ca nu bittu lidhacani te qui edeacale nu ttoꞌo lo sina guecani?

¹⁰ Lebiꞌi nna sna rutebale lidhaca ca sá laní-na, ca beo cubi-na lhe ca laní raca lheꞌe ca ida-na lhe.

¹¹ ¡Neti nna rixxusatia guele, cadirba bittubabi bixuu sina benia, lania nna cuentarba beleꞌetia le!

¹² Ca benni ria le Jesús, rinnaba lenle unle atti runia, cumu neti nna benba atti runle. Lebiꞌi nna lhatsirba biyúle neti lania.

¹³ Gua yuxeabale, lo niꞌa gue isagüe rdacahaba nuarca uleda atta seꞌele-na. Lania primerba utixxiꞌatia le ca tisa gue Jesús.

¹⁴ Isagüe bilenle rdacaha nna läga ben nua cuꞌu niꞌale neti, bittuguaba bixxinle neti lhe. Delaba unnuha nna attiba nu belabi ttu ingeli gue Tata Do Iyyabaaha belabile neti, attisiba cuinaba Jesucristuhaba Benniha bisía atta seꞌele.

¹⁵ ¿Bila uca len elha redaca le guele tee lania? Neti nna rorexxa lele nu benle lania: ttirca nu uca nna axtaba ca iyya lole ulequile betele len neti.

¹⁶ Nnanna nna ¿si bitturba raca uyúle neti de utixxiꞌatia le nu anca gualí?

¹⁷ Ca nu rucannacana iquile requi na nna runcana dequi richachalhaba iquicani guele, ttiaca läga gualíquinna. Sunruba rdaca ca unná ebequiescan le len neti qui dequila nna suntteba lacana udo nagale guecani.

¹⁸ Tseeba anca ichacha iqui ca unná guele, ladiba anca nua nu uni qui salía tseenle. Gueba nna satía anía uncana len lebiꞌi, bittu suntteba gansi chi doa len lebiꞌi.

¹⁹ Ca xiꞌinto quia, lo niꞌa guele nna ruyúa elha disa attu libe attiba ttu nuila rutía lheꞌeni cuꞌu xiꞌinni. Anába usiguia satea axta liba isía sá innabia Cristuha lheꞌe lastoole.

²⁰ Attulaba rdaca nnannatte chila dua len lebiꞌi qui otsia tsiꞌa latsirba ulisa le, cumu bittu yua bixa unia len lebiꞌi.

Agar leni Sara ancacana nu raxxína leni nu dia le chupa ca tisa bocaꞌan Tata Do Iyyabaaha

²¹ Lebiꞌi, ca benni rdacale udole tisa gue nu rá lo ca ley bocaꞌana Moisés, gualquixxiꞌen neti: ¿si bittuba chi bieninle nu rá lo ca ley-na?

²² Cumu lo ca sitsi gue Tata Do Iyyabaaha rá: Abraham useꞌe chupa xiꞌin biyuubi, ttu nua ancana xiꞌini Agar nuila ttoꞌo lo sina guebiha, attu nua nna ancana xiꞌini latselabi lá Sara biꞌini bittu ttoꞌo lo sina.

²³ Gueba nna xiꞌin biyuubi uli leni nuila ttoꞌo lo sina guebiha nna ulba nua cumu de labacabi uca lecabi gali nua, xiꞌini nuila anca latselabi biꞌini bittu ttoꞌo lo sinaha nna ulba nua cumu aníaba chi begüee Tata Do Iyyabaaha tisa leni Abraham.

²⁴ Nu guate ca nuilaha raxxína len chupa ca tisa begüee Tata Do Iyyabaaha. Ttu tisaha anque ca ley uxí Moisés iqui iꞌiya lá Sinaí. Tisaha nna raxxína anque attiba nuila ttoꞌo lo sina lá Agar, lana ancana attiba nan gue ca benni ttoꞌo lo sina, ca nu daa locani udocana tisa gue nu rá lo ca ley-na.

²⁵ Agar ancana attiba iꞌiya Sinaí do lo yu te láni Arabia. Lana raxxína ancana attiba yiesi Jerusalén re yies lo yu-ni nnanna cumu yies-ni nna ancana attiba nu ttoꞌo lo sina lenna iyába ca benni seꞌe loni de ancacana nu raca duelha gueni uncana iyába nu rá lo ca ley-na.

²⁶ Ttiaca Jerusalén anca gue iyyabaaha nna anque attiba Sara nuila bittu ttoꞌo lo sinaha. Biꞌiniha nna ancabi attiba nan gueri, riꞌi ca nu bittu daa lori unri nu rá lo ca ley-na.

²⁷ Cumu lo sitsi gue Tata Do Iyyabaaha nna rá: Bedaca lelu, lu, nuila bittu raca uja xiꞌinni, uresiꞌa de reꞌoba lelu, lu nu bittu ancabienlu gaxasná rutía lheꞌe ttu nuila cuꞌu xiꞌinni. Cumu adíla ixe xiꞌini nuila bedhá iquicaniha raca attichula nuila do len unbiyuuha.

²⁸ Larcala, riꞌi ca benni ria le Jesús, ancari attiba Isaac. Biꞌiniha nna ulbi de begüee Tata Do Iyyabaaha tisa len Abraham gali ttu xiꞌinbi, anáguaba lebiꞌi, de chi begüee Tata Do Iyyabaaha tisa leni Abraham nna nuarca ancaguabale xiꞌinbi.

²⁹ Cumu attiba uca lania, aníaguaba raca nnanna. Xiꞌini Abraham nu uli de aníaba uca lecabi, bittu uca uyúna betsini nu Espíritu gue Tata Do Iyyabaaha beni qui ulina.

³⁰ Ttiaca, ¿bi rá lo ca sitsi gue Tata Do Iyyabaaha? Lo ca sitsi-na rá: “Ulea nuila ttoꞌo lo sina-na lenna xiꞌinin-na lheꞌe yoꞌo guelha, cumu tsa lägabi elha ralha xiꞌini unná dhína salhe interés ralha xiꞌini nuila bittu ttoꞌo lo sina-na dhína.”

³¹ Larcala nna riꞌi nna xa benni ria le Jesús, läga ancari xiꞌini nuila ttoꞌo lo sina, xiꞌini nuila bittu ttoꞌo lo sinahaba ancari.