Gálatas 1 - Zapoteco de Aloápam

¹ Neti, Pablo anca apóstol benni che ca tisa gue Jesús. Läga benni seꞌe yies lo yu-ni bodúna neti aca apóstol, niguaba la lacana udhelhacana neti lhe. Jesucristuhaba bodúe neti, lenie Tata gueri do iyyabaaha, Benni benie beacani Jesús.

² Neti lenia iyába ca benni ria le ca tisa gue Jesús seꞌe len neti nii ridhelhatu sitsi-ni guele, iyábale ca benni ria le Jesús seꞌe itúba daca Galacia.

³ Tata gueri do iyyabaaha lenie Jesucristu Benni bananie ri edá leque aca lenque le, unque tseꞌele xen su le lhe.

⁴ Jesucristuha uxielhabe betticane lo niꞌa gue ca tulha gueri. Anía uca qui bodile ri lo nu lä anca tsee raca yies lo yu-ni. Benbe attiba raca le Tata Do Iyyabaaha Benni anque Tata gueri.

⁵ ¡Benniha innári anque Benni ra xxeni lee ttu dia lii! Amén.

Sunruba ttu tisa te anque benni gualí rixxiꞌa gue Cristuha

⁶ Raca guatelhabatia bina dequi lebiꞌi nna ririeschile Tata Do Iyyabaaha, Benni uxie le qui acale guee de ucaxxattin Cristuha guele. Lebiꞌi nna attu tisa subila chi rudo nagale, lärga rudo nagale gue ca tisa tsee rixxiꞌa gue Cristuha.

⁷ Läga gualí te attu tisa subi. Gueba nna seꞌele ca nu rucannacana iquile, rdacacana otsiacana ca tisa rixxiꞌa gue Cristu.

⁸ Ttiaca gansi nuxa benni o masquiba riꞌitu lhe o ttu ingeli daa iyyabaaha lhe isíana quixxiꞌenna le attu tisa subi nu bittu raxxína leni nu chi utixxiꞌentu leha, attulade xxeni anca elha disa ute Tata Do Iyyabaaha gueni.

⁹ Nu chi rpea le ttuha nna unnuhaguaba rpea le nnanna: attulade xxeni anca elha disa ute Tata Do Iyyabaaha gue nuxaba isía quixxiꞌenna le attu tisa subi nu bittu raxxína leni ca tisa tsee rixxiꞌa gue Cristuha, delába ca tisa chi güia leleha.

¹⁰ Atti rinnea ria aní nna: “¿Bi raca lasia? ¿Si raca lasia eyaꞌan tseea leni ca benni, aca? ¿Len Tata Do Iyyabaaha, aca? ¿Si requiba runia nu tsuꞌu le ca benni, aca?” Cumu gansi requirba runia nu tsuꞌu le ca benni, lania nna lärga anca nu rixuu lo sina gue Cristuha.

Cristuhaba betee ca tisa rixxiꞌa Pablo

¹¹ Raca lasia quixxiꞌatia le, xa benni ria le Jesús, ca tisa rixxiꞌaya gue Ben-na nna läga ancaque tisa botsiꞌinu le ca benni seꞌe yies lo yu-ni,

¹² cumu läganu benni beleꞌenna neti Ben-na, nuttuguaba nu betene len neti lhe. Jesucristuhaba beleꞌenie neti Ben-na.

¹³ Lebiꞌi nna chiba binale gue bixa benia ca tu ttuha atti anca nu ria leni attiba ria le ca benni quia anca benni Israel. Lania nna tsitsiba nu benia güequia bería laya ca benni chi anca gue Tata Do Iyyabaaha, benia ulhuxa cabi.

¹⁴ Netiba uca nu bedaxxu tsitsirua nu labi ca benni quia runcana atti delo iyába ca nu ttubatia, cumu tsitsiba benia aca iyá nu labi ca benniola quiaha runcana.

¹⁵ Ttiaca Tata Do Iyyabaaha nna chi becuee neti atti deobali galia, de anque Benni siꞌi le nna ucanie quia, nuarca uxie neti lo neda guee.

¹⁶ Atti uca lee nna benie benbiaya Xiꞌinie Jesús qui anáchu tsiaya quixxiꞌatia ca benni bittu anca benni Israel ca tisa gue Ben-na. Neti nna tsa läganu güiaya sannaba tisa bixanca nu unia,

¹⁷ lä güiaguaba lheꞌe yiesi Jerusalén sannaba tisa ca biꞌini bedheti ca tisa beleꞌe Jesús ucacabi primero atti neti lhe. Nu benla nna diatteba deca lo yu te láni Arabia, lenla nna bequia besíaya lheꞌe yiesi Damasco.

¹⁸ Dequide liba ute tsunna ida nna güiaya lheꞌe yiesi Jerusalén qui benbiaya Pedro. Len labi udoa tsinu (15) sá.

¹⁹ Ttiaca tsa läganu adí ca biꞌini bedheti ca tisa nu beleꞌe Jesús bilátia, sunruba Jacobo betsi Benni bananie ri-na biyúha.

²⁰ Tata Do Iyyabaaha gua yube, nu runia lo sitsi-ni nna ancana nu gualí. Neti nna lägabi run lasia.

²¹ Lenla nna dedaaya deca lo yu te láni Siria leni lo yu te láni Cilicia.

²² Ca benni ria le Jesús seꞌe itúba deca Judea nna läga chi anca biaquinbi neti lania.

²³ Sunruba rienincabi rácana: “Nu requi ruría lan ri ttuha nna nnanna nna requina riguixxiꞌa-na ca tisa ria leri gue Jesús. Ca tisa-ni nua uxacana ulhuxana ca tu ttuha.”

²⁴ Lacabi nna ribequi xencabi le Tata Do Iyyabaaha de nu benie len neti.