Filipenses 4 - Zapoteco de Aloápam

Pablo ruttipabi le ca benni ria le Jesús

¹ Larcala nna lebiꞌi ca benni ria le Jesús attiba neti, ca nu raca xxattatia gueni. Neti nna rdaca lhaba ilátia le, cumu lebiꞌi ancale nu runi redaca lasia lhe nu runi ruleꞌe lo te lidhaca sina runia gue Tata Do Iyyabaaha lhe. Gualusigui gualtseꞌe tsitsi lo neda gue Tata Do Iyyabaaha de chi babale len Benni bananie ri-na.

² Rinnaba len benni nuila lá Evodia, anáguaba len benni nuila lá Síntique lhe eyaca tseecabi, oquinna iquicabi ttuba eseꞌecabi de chi ancacabi benni baba len Benni bananie ri-na.

³ Anáguaba lu, biꞌini raca umpanieru quia, lu nu bittu rudhá iquilu neti lo sina gue Jesús, rinnaba lenlu unlu yuda ca benni nuila-ni. Ca biꞌin-ni nna tsitsiba guatecabi len neti utixxiꞌatu ca tisa gue Jesús, lencabi Clemente lhe adírba ca biꞌini bencabi neti yuda lhe. Ca biꞌin-ni nna chiba dia lácabi lo libro atta dia lá ca benni gatta elha nabani guecabi ttu dia lii iyyabaaha.

⁴ Satía gualtseꞌe gualeꞌo lele de chi ancale benni baba len Benni bananie ri-na. Rpea le attu libe: ¡Satía gualtseꞌe gualeꞌo lele!

⁵ Lhatsiru gualuni qui iláni iyá benni lebiꞌi nna ancale benni du tsee leni. Gualorexxa lele chi daa ribiga esía Benni bananie ri-na.

⁶ Bittu ichacha iquile gue ttu bixa. Nu unlale nna gualocaꞌan iyá las ná Tata Do Iyyabaaha gansi chi rinne len lee. Gualinnaba loe nu reasinle lhe anáguaba gualgási Ben-na xquixarue lhe.

⁷ Lania nna Tata Do Iyyabaaha unie gatta elha xen lhasi guele, elha xen lasi-ni nna unie ulaba tsee lele lhe bittu cuenta bitti acabinle unle lhe de chi ancale benni baba len Jesús Benni anque Cristu. Elha xen lasi-ni nna anque ttu nu xxeni, ni ttu benni bittu dhana ttedeenna gue gaxasná anque.

Gualulaba lele gue nu anca tsee

⁸ Lebiꞌi, ca benni ria le Jesús, nu reasa upea le nna ancana: gualulaba lele gue iyá nu anca gualí, gue iyá nu rapa benni respeto lhe gue iyá nu anca lhixxa lhe gue iyá nu anca ttagaꞌa tsee lhe gue iyá nu radi le benni lhe gue iyá nu anca lhatsiru lhe. Gualulaba lele gue iyá nu gaꞌana tsee lhe gue iyá nu rinne tsee benni gueni lhe.

⁹ Gualusigui gualuni nu chi beleꞌetia le, nu rpea le unle lhe nu bieninle rinnea lhe nu bilenle runia lhe. Lania nna Tata Do Iyyabaaha Benni rute elha xen lasi lenri guadúbe len lebiꞌi.

Pablo rugüebi xquixaru ca benni gue Filipos

¹⁰ Reꞌo juisia lasia lo Benni bananie ri-na cumu lebiꞌi nna chi bedulole rulaba lele quia attu libe. Läga ria dequi lebiꞌi nna chi bixulhinle neti, sinuqui de bittuba chi uca unle neti yuda.

¹¹ Läga ria aná de reasatia ttu bixa nnanna. Neti nna chiba bidetia raca xen lasia leni nu teerba quia.

¹² Guanca biabatia neti dhoa bittu te bixa len galha sá, guanca biaguabatia dhoa te iyá nu reasatia lhe. Chiba bideti neti utsá dua lo bixaba ratea, seadi yiela lhe o si ritunia lhe si texxatta quia lhe o si tsa bittu te quia lhe.

¹³ Bixaba ratea nna gua ridába ruchíaya loni cumu Cristuhaba rudú tsitsie neti.

¹⁴ Ttiaca lebiꞌi nna tseeba benle benle neti yuda lagüi lo atti doa ruyúa elha disa.

¹⁵ Lebiꞌi, ca benni seꞌe lheꞌe yiesi Filipos-na, gua yuxeabale atti chi uduloba rixxiꞌatia le ca tisa gue Jesús, tsa lärga nurua benni ria le Jesús bencana neti yuda dequide atti beríaya atta seꞌele lo yu gue Macedonia-na. Sunruba lebiꞌi bosiꞌile gue nu utixxiꞌatia le ca tisa-na.

¹⁶ Masquiba sna doba lheꞌe yiesi Tesalónica, lebiꞌi nna udhelharbale ttu chupa libe yuda len neti qui bixuutia gue nu reasatia.

¹⁷ Läga ria aná de do lasia dhichattia nu rutele. Nu rdacaba neti nna udianchattile iqui nu tsee te guele len Tata Do Iyyabaaha.

¹⁸ Iyába nu reasatia chi te quia nnanna. Careꞌaba yuda udhelhale quia leni Epafrodito-na chi te quia, axtala rexxa quia nnanna. Nu udhelhale len neti nna ancana attiba ttu úna sela nu rure xixxi betele len Tata Do Iyyabaaha. Unná ancana ttu úna reꞌo le Benniha ridíe.

¹⁹ Tata Do Iyyabaaha ute tame iyá nu reasinle de babale len Jesús Benni anque Cristu, cuaxxeniba anca elha tsee guee te.

²⁰ ¡Tata gueri do iyyabaaha garie ttu dia lii lee anque Benni ra xxeni lee! Amén.

Pablo lenbi ca benni seꞌe atta dobiha ridhelhacabi padiuxi len ca benni seꞌe Filipos

²¹ Gualgási iyá ca benni chi seꞌe riesi anca gue Tata Do Iyyabaaha ca biꞌini chi babacabi len Jesús Benni anque Cristu padiuxi cuenta quia. Ca benni ria le Jesús seꞌe len neti nii lhe ridhelhacabi ttu padiuxi guele.

²² Iyába adí ca benni chi seꞌe riesi anca gue Tata Do Iyyabaaha seꞌe lheꞌe yiesi Roma-ni, ca biꞌini riben sina lheꞌe yoꞌo gue César nu rinnabia gue yies-ni ttila ridhelhacabi ttu padiuxi guele.

²³ Cuina Jesucristu Benni bananie ri edá lee aca lanie iyá xeale. Amén.