Filipenses 3 - Zapoteco de Aloápam

Pablo rixxiꞌabi Cristuha anque benni dacaru

¹ Nnanna nna ca benni ria le Jesús attiba neti, a suna unníba reasa upea le: gualedacani de ancale benni baba len Benni bananie ri-na. Neti nna lägabi ritisitia runia lo sitsi-ni attu libe nu chiba ria le, cumu ancana nu raca duelha unale qui bittu ixú yiele.

² Gualudo cuidadu leni ca nu runi nu lä anca tsee requi-na. Ca nu rácana dequi ancacana nu requi rixxiꞌa ca tisa gue Jesús, ca nu requicana rácana dequi raca duelha cue senni ca unbiyuu, nu run ca unbiyuu Israel, qui acacana benni gue Tata Do Iyyabaaha.

³ Tiaca riꞌila unní nna nu gualíga ancari benni gue Tata Do Iyyabaaha, cumu cuinaba Espíritu gue Ben-na runie rudú xibiri loe. Riꞌi nna redaca leri de babari len Jesús Benni anque Cristu, läga xen leri lhári de nuxa ancari lhe o si gansi guayuꞌuri senni lhe.

⁴ Masquiba neti nna guateguaba roꞌa uxxen lasia odilá nu runia na neti. Ttiaca gansi nuxa raquinna dequi nu runna lhe nu ancana lhe uni qui lhána, adílaba neti teerla roꞌa uxxen lasia odilá unná neti.

⁵ Neti nna anca benni Israel, berencana neti senni nu runcana leni ca unbiyuu Israel, atti uca xxunu ubisa ulia. Datíaya ca benni gue Benjamín lhe anca benni hebreo de anca tata nan quia benni hebreo lhe. Neti nna uca nu baba len ca benni fariseo, ca nu tsitsiba runcana dho tisa gue ca ley bocaꞌana Moisés.

⁶ Ttsitsiba bedona lasia dho tisa gue nu rá lo ca ley-na. Denuala nna guanoa ca benni ria le Jesús qui udhaca güea cabi. Ni ttu benni bittu te roꞌoni inne güena quia cumu netiba nu bedorua tisa gue iyátte nu rá lo ca ley-na, benba attiba rába lo ley-na aca.

⁷ Ttiaca nnanna nna iyába nu racatia ancana nu te lidhacani len neti ttuha, ancana nu bittu lidhacani te len neti, de chi ria lasia Cristuha.

⁸ Anáguaba nnanna. Iyába ttu bixa runia ancana nu bittu daca, cumu nu daca len neti nna ancana benbiaya Jesucristu Benni bananie neti. De Cristuha nna iyába nu racatia anca nu te lidhacani len neti bocaꞌana. Iyába nua nna runia ancana attiba ttu ixi qui dhaya dhoa len Cristu,

⁹ qui aca benni du len Ben-na lhe. Läga anca benni tsee de bedoa tisa gue ca ley bocaꞌana Moisés, sinuqui anca benni tsee de ria lasia Cristu. Tata Do Iyyabaaha runie anca benni tsee de ria lasie.

¹⁰ Neti nna rdaca unbia tseerua Cristu, dhia elha ra xxen lee bete Tata Do Iyyabaaha len Benniha qui beacanie dequide uttie lhe rdaca guaba satea loesi nu guate Benniha lhe dhielha utticana neti attiguaba uxielha Benniha betticane lhe.

¹¹ Anía liba nna nicadi ga güeyacabatia gansi chi beacani ca nu yatti-na.

Pablo runbi duelha eꞌeyubi acabi atti raca le Cristu

¹² Neti nna läga ria dequi chi udáya benbiaga iyá nu anca gue Cristu, bittuguaba ria dequi chi anca nu runi ttagaꞌa nu anca tsee lhe. Ttiaca diaba rusiguia qui nicaga guadába eꞌeyua aca atti raca lee Jesucristuha. Denuala nna benie uca benni guee.

¹³ Ca benni ria le Jesús, neti nna läga ria le chi udáya beꞌeyua aca atti raca le Benniha aca. Nu diala runia nna ixulhatia gue iyába nu chi benia ttuha, duelhaba runia tsaba rusía loa nu chi daba,

¹⁴ qui anáchu isína eꞌeyua atta raca le Tata Do Iyyabaaha eꞌeyua. Lania nna dhia ttu elha tsee nu ralha dhia iyyabaaha. Tata Do Iyyabaaha uxie ri qui dhíri elha tseeha de ancari benni baba leni Jesús Benni anque Cristu.

¹⁵ Larcala iyábari atta chi seꞌe tsitsiri lo neda gue Jesús, aná ulaba leri. Gansi lebiꞌi seꞌele rulaba lele dequi läba aná anca, Tata Do Iyyabaaha gunbe qui ttedeenle läga anca tsee nu rulaba leleha.

¹⁶ Ttiaca raca duelha tseꞌeri usiguiri unri iyába nu chi yuri raca le Tata Do Iyyabaaha unri.

¹⁷ Ca benni ria le Jesús, gualtseꞌe gualuni atti runia. Gualgüia gue ca benni seꞌe runi attiba beleꞌenttule unleha lhe.

¹⁸ Cumu na requi ixeru ca nu riguꞌu niꞌacani bixa lo niꞌa gue utti Jesús lo ya crusiha. Unná ruleꞌe lo lacana ancacana nu bittu raca uyúcana Benniha. Neti nna ixeru libe chi utixxiꞌatia le gue nu run ca unná, nnanna nna ribesnia rixxiꞌatia le attu libe gue nu runcana.

¹⁹ Ca unná nna dia nittibacana de runcana aná. Nu ridá le cuerpu guebacani anca dios guecani. Tsitsiba ttaba runcana gue nu dica ettúquinna runcana. Suntteba gue nu anca gue yies lo yu-ni do lecani.

²⁰ Riꞌi nna chi ancari benni baba iyyabaaha, nía guaba dedaa Benni seꞌeri ribedari esíe odile ri lhe. Benniha nua Jesucristu Benni bananie ri.

²¹ Ben-na otsie ca cuerpu gueri-ni ca nu reaca yu, qui eyonie cana atti anca cuerpu gaꞌana tsee guee. Unní unie leni elha ra xxen le guee rixuunie rinnabie iyáxeaba nu tee.