Filipenses 2 - Zapoteco de Aloápam

Elhida ga leri atti belhida ga le Cristu

¹ Larcala nna gansi guare tsitsiba lele de babale Cristuha, gansi guateba elha xen lhasi guele de racani benna guele lhe gansi guadúba Espíritu gue Ben-na len lebiꞌi lhe gansi gua ruyú siꞌiba loesle lhe gansi gua ratúaba le loesle lhe

² lania nna ittaru odúle lasia gansi ttuba anca nu rulaba lele, ttuba raquin gue loesle lhe ttuba anca nu raca lele lhe ttuba anca nu raquinle unle lhe

³ Tsa bittu unle ttaba atti bixa runle niguaba qui cue xenle lhe. Nu unlale nna: gualudá iquile gue nu rá benni, gualuni dequi yurla cana atti lebiꞌi.

⁴ Ni ttule bittu ulaba lele gue suntteba nu anca guele qui tseꞌe tseele, gualulabaguaba lele gue gasná tseꞌe tsee adí benni.

⁵ Gualulaba lele atti belaba le Jesús Benni anque Cristu.

⁶ Benniha nna masquiba satíaba anque Dios, lee nna bittu benie duelha, lee ancabe ttuba len Tata Do Iyyabaaha.

⁷ Nu benbe nna la labe belhida gaa lee, nianna uque attiba ttu benni ttoꞌo lo sina, uque attiba anca nuxaba benni.

⁸ Atti anque benni attiba riꞌi nna bedába iquie gue Tata Do Iyyabaaha, bedoe tisa uttie lo ya crusiha, masquiba anca nua ttu elhutti nu runi ettuinri.

⁹ Denuala nna beni Tata Do Iyyabaaha aca Benniha Benni ra xxeniru lee gue delo iyáxea, begüee ladi Benniha qui uque Benni rinnabia xeni gue delo iyáxea ca nu rinnabia,

¹⁰ qui anáchu nna de ra xxeni le Jesús, iyába ca nu seꞌe iyyabaaha lhe ca nu seꞌe yies lo yu lhe ca nu yuꞌu lhiꞌu yu lhe udú xibicani lo Ben-na.

¹¹ Nianna iyáxea cana dhi roꞌocani Jesucristuha anque Benni bananie ri, qui uleꞌe lo Tata gueri do iyyabaaha anque Benni ra xxeni lee.

Lhatsiru gualuni qui acale xieni gue ca benni seꞌe yies lo yu-ni

¹² Larcala nna ca benni ria le Jesús racatia gueni, lebiꞌi nna satíaba rudole tisa gue nu ria, ttiaca bittu sunru atti doa len lebiꞌi, nnanna doa idittu nna adíla gualudo tisa gue nu ria. Gualgapa Tata Do Iyyabaaha respeto, gualtseꞌe gualuni nu anca tsee qui uleꞌe lo gualí chi bodilá Ben-na le,

¹³ cumu Tata Do Iyyabaahaba runie qui roquinna iqui le unle nu raca lee, laguabe raca lanie le qui ridále runle nua lhe.

¹⁴ Bittu inne bexeale gansi chi bixa runle, lä itilha tisaguaba len loesle lhe

¹⁵ qui bittu te roꞌo benni innána ancale nu te tulha gueni o nu runi nu lä anca tsee lhe. Gualtseꞌe gualuni atti runi benni chi anca xiꞌini Tata Do Iyyabaaha anca nari lo Ben-na lagüi gue ca benni lä du ta leni runi nu lä anca tsee seꞌe yies lo yu-ni. Gualtseꞌe gualuni nu anca tsee lagüi gue ca unná attiba ca beli na riguꞌu cana xieni yies lo yu-ni.

¹⁶ Tsitsi gualtseꞌe gualuni nu rá ca tisa gue Tata Do Iyyabaaha, ca Ben-na ruteque elha nabani gatta ttu dia lii gueri, qui gansi chi besía Cristuha nna lebiꞌi uni eyoꞌo lasia de yua nna läga cuenta betú besátia güequia beleꞌetia le.

¹⁷ Masqui utticana neti, elhutti quia nna acana ttu úna utea len Tata Do Iyyabaaha itupa leni nu tsee runle lo Ben-na de ria lele, cumu unná ancana úna rutele len Ben-na. Neti nna attulade eyoꞌo lasia gansi anía aca, unguaba qui edaca lee iyábale len neti lhe.

¹⁸ Anáguaba lebiꞌi gualeꞌo lele, gualedacani len neti lhe.

Pablo rixxiꞌabi gue Timoteo lenbi Epafrodito

¹⁹ Gansi Jesús Benni bananie ri aca lee nna güidhelhattegaba Timoteo ettenalhibi le, qui eyaca xen lasia atti quixxiꞌenbi neti gue gaxasná seꞌele,

²⁰ cumu nutturu attu benni dotia ulaba leni atti rulaba lasia. Labi nna gualíguinbi richacha iquibi guele.

²¹ Adí benni nna suntteba rulaba lecani gue nu anca guecani, läga rulaba lecani gue nu anca gue Jesús Benni anque Cristu.

²² Lebiꞌi nna gua yuxeabale tseeba rudú le Timoteo. Attiba rixuin ttu tata ttu xiꞌinni rixuubi len neti, tsitsiba yuda runbi neti rixxiꞌatu ca tisa gue Jesús.

²³ Larcala nna cuantusiba una bixa anca nu satea, idhelhatteba bi atta seꞌele-na.

²⁴ Neti nna xenba lasia guacaba len Benni bananie ri-na neti qui itattegába cuinaga neti ettenalhia le.

²⁵ Lebiꞌi udhelhale Epafrodito biꞌini ria le ca tisa gue Jesús attiba riꞌi qui unbi neti yuda leni nu reasatia. Labi nna runbi sina gue Tata Do Iyyabaaha len neti, tsitsiba seꞌetu attiba ttu soldado. Nnanna nna racatia tseeba anca edhelha biꞌin-ni len lebiꞌi attu libe.

²⁶ Labi nna rdaca lhababi ilenbi iyábale, tsitsiba richacha iquibi de binale unbi.

²⁷ Gualíba unbi, a saroꞌoba lä uttibi. Ttiaca Tata Do Iyyabaaha guatúaba lee bi, läga sunru labi guatúa le Benniha, guatúaguaba lee neti lhe qui bitturu dho siꞌa adí dequi de nu chi do siꞌa-ni.

²⁸ Denua nna edhelhatteba bi, qui gansi chi bilenle bi nna eyoꞌo lele. Aná nna lätterba dhoa ichacha iquia.

²⁹ Itú iqui itú lele gualgas bi tseeba anca chi besíabi. Labi nna ralhabi gále bi aná cumu ancabi benni baba len Benni bananie ri-na, gualgapa bi respeto lenbi adí ca benni runi atti runbi lhe.

³⁰ Biꞌin-ni nna a saroꞌoba lä uttibi lo niꞌa gue de runbi sina gue Cristu. Lababi berú iqui berú lebi elha naban guebi qui bitabi benbi neti yuda, cumu lebiꞌi nna bittu uca unle neti yuda de idittuba seꞌele.