Filipenses 1 - Zapoteco de Aloápam

¹ Neti Pablo lenia Timoteo ancatu benni rixuutu lo sina gue Jesús Benni anque Cristu. Runtu lo sitsi-ni ridhelhatu gue iyábale ca benni chi anca gue Tata Do Iyyabaaha babale len Jesucristu seꞌe lheꞌe yiesi Filipos, len ca benni anca nu lo guele-na lhe ca benni beseꞌe qui uncabi le yuda lhe.

² Tata gueri do iyyabaaha lenie Jesucristu Benni bananie ri-na edá leque aca lenque le, uteque elha xen lasi lenle lhe.

Pablo rutebi xquixaru len Tata Do Iyyabaaha gue ca benni ria le Jesús seꞌe Filipos

³ Satíaba gansi chi rexxa lasia le nna rutea xquixaru len Tata Do Iyyabaaha guele.

⁴ Satíaba gansi chi rinne lanie nna rinnaba aca lanie iyábale. Neti nna reꞌoba lasia runia aná,

⁵ cumu lebiꞌi nna desdeba atti bieninle ca tisa gue Jesús axtaba nnanna runle neti yuda qui runa adí benni ca tisa gue Benna.

⁶ Neti nna xen lasia, Tata Do Iyyabaaha Benni uduloe runie nu tsee lhiꞌu lheꞌe lastoole, usiguibe unie unná idaꞌa su axta atti esía Jesús Benni anque Cristu.

⁷ Gualíbatia tseeba anca rulaba lasia gue iyábale aná de satíaba yuꞌule lheꞌe lastooa, cumu iyábale redí baale len neti elha tsee rute Tata Do Iyyabaaha gueri, atti tea lisiyya lhe atti rutsá dua lo ca uxtisi qui runia exuu ca tisa gue Jesús, rixxiꞌatia cana ca tisa gue Benna ancaque nu gualí.

⁸ Guayuxeaba Tata Do Iyyabaaha, attiba racani Jesús Benni anque Cristu guele, aníaba raca tsitsiatia guele.

⁹ Rinnaba lo Tata Do Iyyabaaha unie aca chiattin gue loesle adí, unie sadúru lele gue nu anca guee lhe gattaru elha rieni guele lhe

¹⁰ qui satíaba aca guele ucuele nu anca tsee. Anía liba nna acale benni nari nu bitturu runi nu lä anca tsee qui bittu bi te bixa lo niꞌa gue itisale gansi chi besía Cristu.

¹¹ Jesucristuha unie acale nu tsapaba uni nu anca tsee, qui cuequi xxen ca benni Tata Do Iyyabaaha, innácana Ben-na anque Benni ra xxeni lee.

Pablo rábi: Cristuhaba rudo lasia ixúa loe laca do bania

¹² Lebiꞌi, ca benni ria le Jesús, raca lasia unale, iyába nu chi guatea nna ancana nu rixuu qui ria le adí benni ca tisa gue Jesús.

¹³ Larcala nna iyába ca soldado seꞌe roꞌo yoꞌo lagüi leni adírba benni lhe chi yucana, neti nna de requiba rixxiꞌaya gue Cristu, nuarca tea lisiyya.

¹⁴ Atti biyuu ca benni ria le Jesús tea lisiyya, ixerucabi de xen lecabi Benni bananie ri-na chi bebequi rearu lecabi bitturu rasquinbi rixxiꞌacabi ca tisa gue Tata Do Iyyabaaha.

¹⁵ Gualíba ttulhe benni nna requicana rixxiꞌacana ca tisa gue Cristu de rutía diba lecani neti lhe de runbacana ichúcana loa lhe, adí benni nna de tseebaquinbi riguixxiꞌacabi ca tisa-na.

¹⁶ Ca nu rutía di lecani neti nna läga de elha tseequinna rixxiꞌacana ca tisa gue Tata Do Iyyabaaha; runbacana aná qui richúcana loa, racaquinna de runcana aná nna uyúrua adí elha disa lheꞌe lisiyya-ni.

¹⁷ Ttiaca adí ca benni nna de racabaquinbi quia nuarca rixxiꞌacabi ca tisa-na cumu yubacabi Benni bananie ri-naba bodúe neti qui edí edenia ca tisa guee-na.

¹⁸ Ttiaca lägabi duna. Si de tseequinna o si de bittu lhe labíaba gue Cristuhaba rixxiꞌacana. Unná nna runna reꞌo lasia. Chi eyoꞌorla lasia adí,

¹⁹ cumu neti yua nna de rinnabale lo Tata Do Iyyabaaha aca lanie neti, de raca leni Espíritu gue Jesús Benni anque Cristu neti lhe larcala iyába unní nna uni lháya lheꞌe lisiyya-ni.

²⁰ Nu ridá lasia lhe xen lasia aca lhe bittu isía sá ettútia gue nu runia. Sinuqui attiba satíaba runia, usiguiba nnanna itú iqui itú lasia uleꞌe loa len nu runia, Cristuha anque Benni ra xxeni lee, sila gattia o sila dho banruha lhe.

²¹ Cumu neti nna laca do bania nna Cristuhaba rudo lasia ixuua lo sina guee, gansi gattia nna salía tseerlana neti.

²² Ttiaca laca do bania nna rixuurua rixxiꞌaya gue Jesús Benni anque Cristu qui tsia le adíru benni ca tisa gue Ben-na. Larcala nna bittu yua bi anca tseeru len neti.

²³ Tsitsiba anca len neti ucueea delo chupa ca unní: ttu rita racatia nna güenrula anca gattia qui eyyaꞌaya atta do Cristu, cumu unní ancana ttu nu tseeru len neti.

²⁴ Attu nna de lebiꞌi nna racarla duelha dho banruha yies lo yu-ni.

²⁵ Neti nna chiba uca xen lasia, yuba nna eyaꞌanruba len lebiꞌi qui unia le yuda usiguile tseꞌe tsitsi chiattile lo neda gue Tata Do Iyyabaaha, qui eyoꞌo chiatti lele de ria lele Jesús lhe.

²⁶ Larcala nna güitarba atta seꞌele-na attu libe. Lania nna eyoꞌoru lele de ilenle nu runi Jesús Benni anque Cristu len neti.

²⁷ Suntteba nu raca lasia unle nna: gualtseꞌe gualuni atti raxxína rá ca tisa gue Cristuha. Aná nna si ita atta seꞌele-na lhe si requia idittu lhe raca lasia iyientia inná benni, lebiꞌi nna gua seꞌe tsitsibale, ttuba anca nu rulaba lele lhe. Iyábale ttuba rudo duelhale runle qui tsia le adí benni ca tisa gue Jesús.

²⁸ Tsa bittu gasinle lo ca nu lä raca uyúcan le-na. Nu run ca unná ancana nu ruleꞌe lo lacana nna dia nittibacana. Unnáguaba ancana nu ruleꞌe lo lebiꞌi nna gua labale läga tsia nittile. Unní ancana nu uni Tata Do Iyyabaaha.

²⁹ Tata Do Iyyabaaha bedaa lee uca lanie le tsia lele Cristu, ttiaca anáguaba bedaa lee satele lo niꞌa gue Ben-na.

³⁰ Lebiꞌi nna ratebale loesi nu begüiale guateha, unnuha guabunna runale ratea nnanna lhe.