Efesios 6 - Zapoteco de Aloápam

Gaxasná dica udú le ca tata lhe ca xiꞌincani lhe

¹ Lebiꞌi ca benni seꞌe tata nan gueni, de chi ancale benni gue Jesucristuha nna gualudo tisa gue ca tata guele-na lhe gue ca nan guele-na lhe cumu unní anca nu dica unle.

² Lo ca ley gue Tata Do Iyyabaaha nna rá: “Gapalu respeto tata guelha lhe nan guelha lhe cumu ley-ni anque benni che elha tsee guelu,

³ qui anáchu salía tseenlu lhe itienlu lhe yies lo yu-ni.”

⁴ Lebiꞌi nna ca tata, bittu utseꞌenle ca xiꞌinle-na sinuqui gualuleꞌelaquinna lhe gualunla qui udheticana lhe nu raca le Benni bananie ri-na uncana.

⁵ Lebiꞌi nna ca benni ttoꞌo lo sina, len respeto lhe len elha rasi lhe gualdo tisa gue ca nu banquinna le yies lo yu-ni, itú iqui itú lele gualuni nu racana attisiba sina gue Jesucristuhaba nua runle.

⁶ Bittu suntteba gansi chi seꞌe ca nu banquinna le-na jertteba ugüe lele qui eyaꞌan tseele lencana. Lebiꞌi ancale nu ttoꞌo lo sina gue Jesucristuha, itú iqui itú lele gualuni nu raca le Tata Do Iyyabaaha.

⁷ Itú iqui itú lele gualcuen sina, attiba ttu nu ttoꞌo lo sina gue Benni bananie ri-na, bittu attiba ttu nu ttoꞌo lo sina que ca benni seꞌe yies lo yu-ni.

⁸ Cumu guayuxeabale Benni bananie ri-na gutebe ttu nu tsee gue ttu tturi gue coa ancaba nu tsee benri, si ancari benni ttoꞌo lo sina, o si bittu ancari benni ttoꞌo lo sina.

⁹ Anáguaba lebiꞌi ca benni beaca xxana ca sina-na, lhatsiru gualuni len ca nu ttoꞌo lo sina guele-na, bitturu cuentaba udhaca disale cana, gualorexxa lele, lebiꞌi lhe lacana lhe la ttuba Benni do iyyabaaha anque Benni bananie le. Ttuba daca iyábari lo Benniha.

Gualtseꞌe tsitsi lo neda gue Tata Do Iyyabaaha

¹⁰ Qui ulhuxa nu rpea le-ni nna tsitsi guatseꞌe lo neda gue Benni bananie ri-na. Tsitsi gualudaxxu elha ra xxen le gue Ben-na.

¹¹ Gualuni atti runi ttu soldado duna nucuna ca xoni anca leni iyya qui bittu acana güee atti itilhana, denna iyába nu rixxuina lhe aníaguaba lebiꞌi gualudaxxu itú nu ra tsitsi lee gue Tata Do Iyyabaaha, qui anáchu dhale tseeꞌe tsitsi le lo nu lä anca tsee re le nu xxegüiha udhacan le.

¹² Cumu riꞌi nna läga len ca benni seꞌe yies lo yu-ni ritilhari, len ca nu lo gue ca be xxegüi requi lo bea-na liba unná ritilhari, len ca nu rinnabia gue ca be xxegüi lhe ca nu xxegüi runi mandadu atta raca nu lä anca tsee anca gue yies lo yu-ni.

¹³ Larcala nna gualudaxxu itú elha ra xxeni le gue Tata Do Iyyabaaha, qui dhale uchíale lo nu satele gansi chi bisía ca sá uyú ca benni elha disa, dequide chi udále lo nu sateleha nna lebiꞌi nna chi tseꞌe tsitsirle.

¹⁴ Tsitsi gualtseꞌe, suntteba nu anca gualí gualnne, attiba ttu soldado chi du tseena di sinchu lheꞌeni qui tsiana itilhana. Gualtseꞌe gualuni nu anca tsee, attiba ttu soldado chi du tseena ta iyya lo cuꞌebani qui bittu acana güee gansi chi bitilhana.

¹⁵ Gualeseꞌe tsee qui iríale tsiale satixxiꞌale ca tisa gue Jesucristuha, ca tisa runi qui reseꞌe tseeri len Tata Do Iyyabaaha.

¹⁶ Tsitsi gualtsia lele Tata Do Iyyabaaha qui dhale lhále lo nu re lee nu xxegüiha udhacanle, cumu unná ancana attiba ttu escudo che ttu soldado nu bittu ugüelhana aca nua güe.

¹⁷ Attiba ruxxen le ttu soldado bittubi dhacana de yuꞌu iquini cascu gueniha, aníaguaba lebiꞌi gualuxxen tsitsi lele godilába Jesucristuha le qui bittu tsia nittile. Gansi chi run nu xxegüiha dhiyienle nna gualixuuni ca tisa gue Tata Do Iyyabaaha qui ecabile gueni, cumu ca tisa gue Ben-na ancaque attiba espada rute Espírituha len lebiꞌi.

¹⁸ Larcala nna satía gualtseꞌe gualnne len Tata Do Iyyabaaha, Espíritu gue Ben-na aca lanie le atti seꞌe ditile rinnabale lo Ben-na nu raca lele, gue nu reasa lhe. Satía gualtseꞌe tenná, bittu saxxaquinle, gualnnaba aca lani Tata Do Iyyabaaha ca benni seꞌe riesi chi anca gue Ben-na.

¹⁹ Gualnnabaguaba len Tata Do Iyyabaaha aca lanie neti lhe qui utee ca tisa dica innea, qui eyaxtia quixxiꞌaya ca tisa bittu chi yu benni gueni lhe delába ca tisa rixxiꞌa gue Jesucristuha.

²⁰ Cumu Tata Do Iyyabaahaba udhele neti qui aca benni quixxiꞌa ca tisa guee-na, lo niꞌa gue unnuha nna tea lisiyya. Gualnnaba len Benniha aca lanie neti qui bittu gastia quixxiꞌaya ca tisa guee-na, attiba daa loa unia.

Pablo rechú tisabi ca benni seꞌe lheꞌe yiesi Éfeso

²¹ Tíquico biꞌini ria le Jesús attiba riꞌi, benni rudo tisa rixuu lo sina gue Tata Do Iyyabaaba, labi quixxiꞌenbi le gue iyába nu runia lhe iyába nu ratea lhe.

²² Denuala nna ridhelha bi atta seꞌele-na qui quixxiꞌenbi le gue gaxasná seꞌetu, qui odú ittabi lele lhe.

²³ Tata gueri do iyyabaaha lenie Jesucristu Benni bananie ri-na unque tseꞌele xen su lee, unque aquin gue loesle lhe tsia tsitsiru lele guee lhe.

²⁴ Laque aca lenque iyába ca benni racani ttu dia liiba gue Jesucristu Benni bananie ri-na. Amén.