Efesios 5 - Zapoteco de Aloápam

Gualuni atti runi benni chi seꞌe lheꞌe xieni

¹ Lebiꞌi nna chi ancale xiꞌini Tata Do Iyyabaaha ca nu racaxxattanie guele, de nua nna gualuni atti runi Benniha.

² Gualtseꞌe gualaquin gue iyába benni attiba ucani Jesús gueri. Benniha nna ucaba lee bete elha nabani guee qui uttie lo niꞌa gueri. Lee nna uque attiba ttu úna nu rure xixxi lo Tata Do Iyyabaaha.

³ Lebiꞌi nna gualuni atti runi benni seꞌe riesi chi anca gue Tata Do Iyyabaaha, qui bittu dha tisa guele ancale nu rutsá roꞌoni nutti nuttiba, niguaba lä innácana dequi lebiꞌi runle iyáloba nu satsa lhe o si innácana dequi ancale nu ridáxxatta leni gatta gueni lhe.

⁴ Bittuguaba innele tisa satsa lhe niguaba tisa lä diquixuu lhe bittuguaba innele tisa güitta nu rinne tisa satsa lhe cumu läga raxxína innele aná. Delába unnua nna gualugüe Tata Do Iyyabaaha xquixarue.

⁵ Cumu lebiꞌi nna guayúbale, ni ttu ca nu requi manni-na lhe ni ttu ca nu runi nu satsa-na lhe bittu ralhacana dhicana elha tsee dhi ca benni rinnabia Cristuha lhe Tata Do Iyyabaaha lhe. Niguaba ca benni ridá xxatta lecani gatta guecani lhe cumu unnaba anca diosi guecani.

⁶ Tsa bittu ugüelhale dhi yiecana le leni ca tisa lä dica ixuu, cumu lo niꞌa gue unná nna utee Tata Do Iyyabaaha elha disa gue ca nu lä rudo tisa guee.

⁷ Larcala nna bittu iselale unle nu run ca unná.

⁸ Cumu atti bittu chi benbiale Cristuha nna attiba nu requi lheꞌe chulhaba ancale de güequile benle nu satsa, ttiaca nnanna nna de chi ancale benni gue Jesucristuha nna chiba requile lheꞌe xieni. Larcala nna gualuni nu anca tsee de chi ancale benni seꞌe lheꞌe xieni.

⁹ Cumu ca benni requi lheꞌe xieni nna ancacana benni ratúa leni adí benni, nu runi nu anca tsee lhe nu rinne nu anca gualí lhe.

¹⁰ Gualtsatsa niꞌa qui ttedeenle gaxasná anca nu radi le Benni bananie ri-na.

¹¹ Bittu igutsale unle nu satsa run ca nu requi lheꞌe chulha-na, delába unnuha nna gualcuequi la nu runicana lolia qui una ca benni, satsaba anca nu runi ca unná.

¹² Cumu rettulinri rinneri gue nu run ca nu bittu rudo tisa-na atta gatsi.

¹³ Ttiaca iyába nu raca atta gatsiha runa benni, gansi chi ribequi xianiha nua lolia.

¹⁴ Denuala nna rá ca benni: Bebani lu nu anca attiba nu tiꞌedhi, guadha lagüi gue ca benni anca attiba nu yatti-na, Cristuha nna gudanbe guelu.

¹⁵ Larcala nna tsitsi gualudo cuidadu gue gaxasná seꞌele. Bittu tseꞌele unle attiba runi nu bittu elha rieni gueni te, gualtseꞌe gualuni atti runi benni te elha rieni gueni.

¹⁶ Gualuni duelha gualuni nu anca tsee, nnanna gua racaru, cumu ca sá seꞌeri nnanna nna lärga anca ca unní sá tsee.

¹⁷ Larcala nna gualiyienini bittu acale nu diti, gualuni qui ttedeenle bi nua raca le Benni bananie ri-na unle.

¹⁸ Bittu iꞌiyale nu unna dhusinle, cumu unnuha nna unna unle bixaba nu bittu anca tsee. Lebiꞌi nna gualugüelha Espíritu gue Tata Do Iyyabaaha tsuꞌe itú lhiꞌu lheꞌe lastoole qui innabie le.

¹⁹ Gualuttipa le loesle len ca salmo-na, gualulha gue Tata Do Iyyabaaha lhe. Itú iqui itú lele gualulha gue Jesús, Benni bananie ri-na,

²⁰ Satía gualugüe Tata Do Iyyabaaha Benni anque Tata gueri ixquixaru gue iyátte, de nu beni Jesucristu Benni bananie ri-na.

²¹ De te elha rasi guele lo Cristuha nna gualudo tisa gue loesle.

²² Lebiꞌi, ca benni nuila, udole tisa gue ca unbiyuu guele-na attiba rudole tisa gue Jesús Benni bananie ri-na.

²³ Cumu ca unbiyuu anca latsela ca nuila-na ancacana nu lo gue ca nuila anca latselacani, attiba Cristuha anque Benni lo gue ca benni ria lecanie. Lee anque attiba iqui ca benni chi ria lecanie, ca biꞌin-na nna ancacabi attiba cuerpu gue Ben-na, laguabe rodile ca biꞌin-na lhe.

²⁴ Larcala nna attiba ca benni ria lecabi Cristuha rudocabi tisa gue Ben-na, aníaguaba un ca nuila-na, udocana tisa gue iyá nu inná ca unbiyuu guequinna.

²⁵ Lebiꞌi nna ca unbiyuu, aquinle gue ca nuila guele-na, attiba racani Cristuha gue ca benni ria lecanie, de unnuha nna nuarca bete elha nabani guee qui uttie cuenta gueri,

²⁶ aníaba benie qui ucari benni seꞌe riesi anca guee, lee nna bixuunie ca tisa guee-na qui beonie ri benni anca nari lo Tata Do Iyyabaaha, unnuha nua ruleꞌe lori atti radiri inda,

²⁷ qui gansi chi benie utsá duri loe nna ancari benni ruꞌuni xieni gaꞌana tsee gueni, nu bittu runi nu lä anca tsee lhe nu bittu tulha gueni te lhe nu tsa chi anca nari lhe cumu riꞌi nna ancari benni seꞌe riesi anca guee, nu runi ttagaꞌa nu anca tsee.

²⁸ Aníaguaba nua lebiꞌi ca unbiyuu, aquinle gue ca nuila guele-na attiba raquinle gue cuerpu guele-na. Nu raquin gue la labana nna racaguabin nua gue nuila gueniha.

²⁹ Cumu läganu benni te bittu raca uyúna cuerpu gueni, delába nua nna rotseelana lhe ruyútseelana cuerpu gueni lhe anáguaba unná runi Cristuha, lee nna ruyú tsee ca benni guee,

³⁰ cumu riꞌi ancari benni selarie, attiba sitta gue cuerpu guee lhe bela gue cuerpu guee lhe.

³¹ “Denua nna unbiyuuha nna udhába iqui nua tata gueniha lhe nan gueniha lhe qui utsá náni leni nuila aca latselani, lania nna attiba ttuba benni eyaca ca unnuha.”

³² Xxeniba anca nu diale ca tisa rixxiꞌaya-ni, läga ritedaatseenri gueni, delába nu rixxiꞌa gue Cristuha lenie ca benni chi ria lecanie.

³³ Larcala nna lebiꞌi ca unbiyuu, coa ttu ttule aquinle gue ca nuila guele-na attiba raquinle gue la lebiꞌiba. Lebiꞌi nna ca nuila, gualgapa respeto ca unbiyuu guele-na.