Efesios 3 - Zapoteco de Aloápam

¹ Lo niꞌa gue unnuha bunni nna neti Pablo tea lisiyya, de requia rixxiꞌatia le ca tisa gue Jesucristuha, lebiꞌi, ca benni bittu anca benni Israel.

² Neti racatia nna lebiꞌi nna chiba binale, Tata Do Iyyabaaha nna de anque benni ratúa lee nuarca bocaꞌane sina-ni las náya, qui anáchu quixiꞌatia le ca tisa guee-ni.

³ Tata Do Iyyabaaha benie guadú lasia gue nu chi gaꞌananie unie, attiba chi rixxiꞌatia le saroꞌo lo sitsi-ni. Unní nua bittu chi yuri ca tu ttuha.

⁴ Gansi chi belabale lo sitsi-ni nna guate daattebinle, neti nna chi yua gue nu chi gaꞌanani Cristuha unie, nu bittu chi yu benni ca tu ttuha.

⁵ Ca tu atti nía nna läga beni Tata Do Iyyabaaha ttedaani ca benni useꞌe lania gue nu chi gaꞌananie unie, ttiaca nnanna nna leni Espíritu guee-na chi benie ttedaani ca apóstol guee-na lhe ca profeta guee-na lhe gue nu chi gaꞌananie unie.

⁶ Nu bittu utedaani ca benni nna ancana: Ca benni bittu anca benni Israel-na, de tsia lecani Jesucristuha lhe de acacana benni gue Ben-na lhe dhíguabacana nu ralha ca benni Israel-na dhicana, acaguabacana la ttuba benni len ca biꞌin-na lhe. De Jesucristuha nna dhíguabacana nu chi begüee Tata Do Iyyabaaha tisa utee len ca benni Israel-na lhe.

⁷ Neti nna lägabi elha ralha aca benni quixxiꞌa ca tisa gue Jesucristuha, ttiaca Tata Do Iyyabaaha nna chi anque benni ratúa lee, lee nna benne ttu elha tsee quia, delába betee sina-ni len neti. Aná nna beleꞌe loe anque Benni ra xxeni leni.

⁸ Delo iyá ca benni seꞌe riesi anca gue Tata Do Iyyabaaha nna netiba anca nu xubana bittu daca, ttiaca lee nna betee elha tsee-ni len neti qui quixxiꞌatia ca benni bittu anca benni Israel ca tisa guee-ni, rixxiꞌatia cana gue nu gaꞌana tsee bittu lhuxa te gueri len Cristuha.

⁹ Bocaꞌane len neti quixxiꞌatia iyáxea benni gue nu chi gaꞌananie aca. Tata Do Iyyabaaha, Benni beni iyáxea nu seꞌe bittu benie ttedaani benni gue unnuha ca tu atti nía,

¹⁰ qui anáchu nnanna nna ca benni ria le ca tisa gue Jesucristuha nna runcabi ruleꞌe lo elha rieni ra xxeni leni te gue Tata Do Iyyabaaha leni ca nu rinnabia lhe leni ca nu ra xeni leni lhe seꞌe lo bea-na.

¹¹ Atti deobali cue yies lo yu-ni chi gaꞌanani Tata Do Iyyabaaha unie unní, leni Jesucristu Benni bananie ri-na benie nu chi gaꞌananie unie.

¹² De ria leri Jesucristuha, nuarca de ben-narba nna gua yali lo neda gueri qui ribigari lo Tata Do Iyyabaaha.

¹³ Larcala nna rinnaba lenle, bittu aquinle eyadi gále lo neda gue Tata Do Iyyabaaha de ratea ruyúa elha disa lo niꞌa guele, cumu unná ancana ttu nu tsee len lebiꞌi.

¹⁴ Denuala nna rudú xibia lo Tata Do Iyyabaaha, Tata gue Jesucristu, Benni bananie ri.

¹⁵ Lee benie iyáxeaba nu seꞌe iyyabaaha lhe yies lo yu-ni lhe.

¹⁶ Rinnaba lo Tata Do Iyyabaaha qui unie cuequi tsitsi Espíritu guee-na lele leni elha ra xxeni lee gaꞌana tsee guee na.

¹⁷ Rinnabaguaba loe unie dho Cristuha lheꞌe lastoole de ria lele Ben-na, anáguaba qui acale benni seꞌe tsitsi racaruni gue loesni lhe

¹⁸ qui acale benni dhale sadú lele lenle iyába ca benni seꞌe riesi chi anca gue Tata Do Iyyabaaha, Cristuha nna itú iqui itú le Benniha racanie guele.

¹⁹ Rinnabaguaba lo Ben-na qui unie ttedeenle gaxasná anca elha siꞌi le gue Ben-na. Elha siꞌi le gue Ben-na anque ttu nu xxeni, ttu nu bittu ridári ttedeenri gaxasná anque. Qui gansi chi udále ttedeenle gue elha siꞌi le gue Ben-na nna lania nna acale nu rapa itúba nu anca Ben-na.

²⁰ Tata Do Iyyabaaha anque Benni ra xxeni lee. Guacaba guee unie ttu nu xxenirla attichula nu rinnabari o nu rulaba leri. Runie unná leni elha ra xxeni lee guee runi sina lhiꞌu lheꞌe lastoori.

²¹ De ancari benni gue Jesucristuha, iyábari ca benni ria leri Ben-na, ttu dia lii cuequi xenri Tata Do Iyyabaaha, nnanna lhe ca sá chi daba lhe. Amén.