Efesios 2 - Zapoteco de Aloápam

De Jesucristuhaba nna bodilá Tata Do Iyyabaaha ri

¹ Jesucristuha betee elha nabani guele atti ancale attiba nu yatti de güequile benle nu lä anca tsee, de ucale nu lä rudo tisa gue Tata Do Iyyabaaha lhe.

² Anába benle, güequile benle nu lä anca tsee runi ca nu seꞌe yies lo yu-ni. Useꞌebale benle nu rába nu xxegüi rinnabia ca be xxegüi requi lo be-na. Unnuonna rinnabia lheꞌe lastoo ca nu lä rudo tisa gue Tata Do Iyyabaaha.

³ Anáguaba beni iyábari ca tu ttuha, attiba beni ca unná, benbari nu ucaba leri, benbari nu lä anca tsee ridá le cuerpu gueri-ni lhe nu lä anca tsee belaba leri lhe. Denuala nna ralhabari dhíri elha disa xeni la tsuꞌu bia attiba adí benni.

⁴ Ttiaca Tata Do Iyyabaaha nna anque benni ratúaxxatta lee, tsitsiba racanie gueri.

⁵ Denuala nna atti ancari attiba nu yatti de seꞌeri runri nu bittu anca tsee, lee nna betee elha nabani gueri, itupa lenri Cristuha atti benie beaquin Benniha. Larcala nna de guatúaba le Tata Do Iyyabaaha le, nuarca bodile le.

⁶ Benniha nna benie beaquinri len Cristuha atti belhidhe Benniha lheꞌe baa atta yuꞌu ca nu yatti-na, benie qui tseꞌeri len Benniha iyyabaaha lhe.

⁷ Anába uca lee benie qui uleꞌe loe elha ratúa lee xeni guee bedá lee betee len riꞌi, gansi chi bisía tiempu nu chi daba isía, cumu de chi ancari benni gue Cristuha nuarca besiꞌinie ri.

⁸ Larcala nna de guatúarba le Tata Do Iyyabaaha le nuarca bodile le qui bittu tsia nittile, atti güia lele Ben-na. Läga lebiꞌi beni ttu bixa nu tsee qui lhále, Tata Do Iyyabaahaba dedaa lee bodile le cuentaba.

⁹ Läga de runri nu anca tsee rodilá Ben-na ri, qui bittu unle ttaba innále dequi de runbari nu anca tsee nuarca rodilá Ben-na ri.

¹⁰ Cumu Tata Do Iyyabaahaba benie ri, chiba ancanie unri nu anca tsee de ancari benni gue Jesucristuha, attiba chi gaꞌananie unri desdeba ttuha.

Jesucristuha benie eseꞌe tsee iyába benni leni Tata Do Iyyabaaha

¹¹ Denuala nna gualorexxa lele lebiꞌi ca benni bittu anca benni Israel, ca benni teni ca benni Israel-na láni: “Nu bittu reni senni nu labi ca unbiyuu Israel runcana, loesi nu runi senni leni ca unbiyuu Israel.” Unnuha nna la labacana runi nua.

¹² Lania nna läganu Cristuha du len lebiꞌi, läbiguaba babale lo yiesi gue ca benni Israel lhe. Bittuguaba yule gue ca tisa begüee Tata Do Iyyabaaha gue nu tsee unie lhe. Lebiꞌi nna suntteba aná seꞌele yies lo yu-ni, tsaba lägabi te ttu bixa uxxen lele, nuttuguaba Tata Do Iyyabaaha du len lebiꞌi lhe.

¹³ Ttiaca nnanna nna de chi ancale benni baba len Jesucristuha, lebiꞌi ca benni useꞌe idittu len Tata Do Iyyabaaha, Benniha nna chi benie bebígale gaxxa len lee de reni belali Jesucristuha atti uttie.

¹⁴ Cristuha benie beaca tsee len loesri. Lee benie beaca ca benni Israel-na len ca benni bittu anca benni Israel-na benni la ttuba lo yiesi. Utúe nu runna bittu raca uyú loesriha, cumu unnua nua rilhaꞌana lheꞌe loesri.

¹⁵ Atti uttie lo ya crusiha nna utúe ca ley bocaꞌana Moisés, ca nu rixxiꞌa bipaxa daa lo benni unna. Aníaba benie qui boseꞌe tsee ca benni bittu seꞌe tsee len loescaniha, delo chupa xxia benni nna ttu xxiaba benni cubi beonie.

¹⁶ Cristuha benie beaca tseeri len Tata Do Iyyabaaha atti uttie lo ya crusiha, lania benie beaca tsee len loesi irpa loba ca benni bittu seꞌe tsee len loescaniha, qui beacari attiba ttuba.

¹⁷ Cristuha bite utixxiꞌanie iyába benni ca tisa guee-na. Ca tisa gue Ben-na runi reseꞌe tseeri, utixxiꞌe ca tisa-na leni ca benni Israel lhe leni ca benni dittu lhe.

¹⁸ De Jesucristuharba nna si ancari benni Israel o si bittu lhe iyábari chi yali lo neda gueri ibigari lo Tata Do Iyyabaaha. Cumu la ttuba Espíritu gue Benniha yuꞌu lheꞌe lastoo iyábari.

¹⁹ Larcala nna lebiꞌi nna lärgaga ancale benni dittu bittu seꞌe lo yiesi gueni, chiba ancale benni baba lo yiesi gue ca benni seꞌe riesi anca gue Tata Do Iyyabaaha, benni seꞌe lisi Bennihaba chi ancale nnanna.

²⁰ Lebiꞌi ancale attiba ttu yoꞌo bicoa iqui ttu cimientu ca benni uca profetaha lencabi ca biꞌini bedheti ca tisa beleꞌe Jesús ancacabi attiba cimientu gue yoꞌoha. Jesucristuha nna anque attiba iyya nu ribe riden tsitsina yoꞌoha,

²¹ De Jesucristuhaba nna tseeba dia ricoa yoꞌoha. Unnuha nna diabana radhana, axta liba eꞌeyuna acana ttu yotu anca leꞌa gue Benni bananie ri-na.

²² Anáguaba lebiꞌi ca benni bittu anca benni Israel, de Jesucristuhaba nna chi ancale benni baba leni ca benni Israel qui acale attiba lisi Tata Do Iyyabaaha atta do Espíritu gue Benniha.