Efesios 1 - Zapoteco de Aloápam

¹ Neti Pablo anca apóstol gue Jesucristuha. Tata Do Iyyabaaha boquinna iquie aca apóstol. Runia lo sitsi-ni ridhelha guele, lebiꞌi ca benni seꞌe riesi anca gue Tata Do Iyyabaaha, ca benni rudo tisa gue Jesucristuha seꞌe lheꞌe yiesi Éfeso-na.

² Cuina Tata gueri do iyyabaaha lenie Jesucristu Benni bananie ri-na aca lenque le, unque tseꞌele lhatsiru lhe.

³ Xxeni ra lee Tata gueri do iyyabaaha, tata gue Jesucristu Benni bananie ri-na. Lee nna chi uca lanie ri betee len riꞌi iyába elha tsee anca gue iyyabaaha, de ancari benni baba len Cristuha.

⁴ Tata Do Iyyabaaha chi becuee ri qui acari benni gue Cristuha attili lani cue yies lo yu-ni, qui acari benni seꞌe riesi anca guee lhe benni chi anca nari lo Benniha lhe.

⁵ De ucanie gueri nna nuarca desdeba atti níali chi gaꞌananie edíe ri qui eyacari xiꞌinie, de nu guate Jesucristuha. Lee nna aníaba bedaa lee aca.

⁶ Denuala nna satíaba ribequi xenri Tata Do Iyyabaaha, cumu anque Benni ratúa lee riꞌi, lee nna chi uca lanie ri leni elha tsee gue iyyabaaha de chi ancari benni baba len xiꞌinie Jesucristu, Benni racanie guee.

⁷ Leni reni gue Benniha nna bodilá Tata Do Iyyabaaha ri, uxíe elha xen lasi gue ca tulha gueri lhe. Análi de xxeni anca elha tsee gue Tata Do Iyyabaaha.

⁸ De racaxxattanie gueri nna chi betee itúba elha rieni reasinri, chi udhalie iquiri qui sadú leri lhe.

⁹ Tata Do Iyyabaaha nna benie qui ttedeenri nu chi gaꞌananie aca nu bittu chi yu benni. Iyába unní nna unie-na leni Jesucristuha.

¹⁰ Gansi chi bisía sá nna acaba iyába nu chi gaꞌananie aca. Tata Do Iyyabaaha nna ottupe iyáxea ca nu seꞌe iyyabaaha lhe ca nu seꞌe yies lo yu-ni lhe qui innabia Cristuha cana.

¹¹ De ancari benni baba len Cristuha nna nuarca ralhari dhíri elha tsee utee Tata Do Iyyabaaha, cumu ttu gaꞌanalani Ben-na gaxie ri. Iyába unní nna ancana nu chi gaꞌanani Tata Do Iyyabaaha aca. Lee nna runbe iyába nu rulaba lee anca tsee.

¹² Ben-naba uca lee, qui riꞌitu ca benni Israel ca nu primerba bexxen letu Cristuha nna cuequi xentu lee de anque benni ra xxeni lee.

¹³ Anáguaba lebiꞌi, atti bieninle ca tisa rixxiꞌa nu anca gualí-na, ca tisa tsee rixxiꞌa gue gaxasná rodilá Tata Do Iyyabaaha ri qui bittu tsia nittiri, lebiꞌi nna güiatteba lele Cristuha. Lania nna uxíttebale Espíritu gue Tata Do Iyyabaaha, Benni chi begüee tisa idhelhe. Cumu Espíritu-na runie ruleꞌe lo gualíba chi ancale benni gue Tata Do Iyyabaaha.

¹⁴ Espíritu bete Benniha len riꞌi-na anque Benni runi ruleꞌe lo gualíba dhíri elha tsee nu utee Tata Do Iyyabaaha len riꞌi. Riꞌi nna dhíri nua gansi chi bisía sá odile riꞌi ttu tsaba ca benni chi anca guee, qui aníachu nna iyábari cuequi xenri Ben-na de anque Benni ra xxeni lee.

Pablo rinnababi lo Tata Do Iyyabaaha qui aca lanie ca benni ria le Jesús

¹⁵ Larcala neti nna desdeba atti bina lebiꞌi nna chi ria lele Jesucristu, Benni bananie ri-na, raquinle gue iyába ca benni seꞌe riesi chi anca gue Tata Do Iyyabaaha lhe

¹⁶ tsaba bittu rudusia rutea xquixaru leni Tata Do Iyyabaaha guele, satíaba rinnaba lo Benna qui aca lenie le gansi chi rinnea leni Ben-na.

¹⁷ Rinnabaguaba lo Dios gue Jesucristu Benni bananie ri, Tata gueri ra xxeni lee do iyyabaaha qui utee Espíritu guee-na guele. Ben-na nna utee itú elha rieni reasinle, unie ttedaatseenle gue nu anca guee lhe qui anáchu nna unbiatseele Ben-na.

¹⁸ Rinnabaguaba lo Tata Do Iyyabaaha idhalie iquile qui ttedeenle gue nu xxen lele dhíle, de unnuhala nna uxie le acale benni guee, anáguaba qui ttedeenle gue elha tsee xeni ute Benniha gue ca benni seꞌe riesi chi anca guee lhe.

¹⁹ Rinnabaguaba loe qui unie ttedeenle gue gaxasná anca elha ra xxeni le guee, gue gasná rixuunie elha ra tsitsi le guee qui raca lanie ri, riꞌi ca benni ria lerie. Elha ra xxen lee gue Ben-na nua beleꞌe loe leni itú iqui itú lee,

²⁰ atti benie beacani Cristuha belhidhe Benniha lheꞌe baa atta yuꞌu ca nu yatti-na. Nianna bodoe Benniha daca ladu ná derechu guee atta doe iyyabaaha.

²¹ Bodúe Benniha aque nu rinnabia xeni gue iyáxea ca nu rinnabia lhe ca nu ra xxeni lecani lhe ca nu ra tsitsi lecani lhe aque nu rinnabia gue iyába ca nu runi anca nu lo lhe ca nu runi mandadu lhe si seꞌecana lo bea-na lhe si seꞌecana yies lo yu lhe läga sunru nnanna rinnabia Ben-na, anáguaba innabie tiempu chi daba isía.

²² Iyáxeaba bete Tata Do Iyyabaaha las ná Cristuha qui innabie cana, bodúe Benniha aque nu innabia ca benni ria lecanie lhe. Attiba iqui ttu benni, unnuha rinnabia-na cuerpu gueni, anía anca Cristuha.

²³ Ca benni ria lecabi Benniha nna ancacabi cuerpu gue Cristuha, Bennihaba runie qui racacabi benni anca idaꞌa suu attiba anca Ben-na. Labe runi qui raca iyáxeaba nu seꞌe idaꞌa suu.