Colosenses 4 - Zapoteco de Aloápam

¹ Lebiꞌi ca benni xxana lhatsiru gualudú lele len ca nu ttoꞌo lo sina guele-na, gualuni nu anca tsee lencana. Gualorexxa lele anáguaba lebiꞌi lhe Tata Do Iyyabaaha anque Benni bananie le.

² Satía gualudo lele gualinnaba leni Tata Do Iyyabaaha, bittu tseꞌe xulhale, gualugüe Benniha ixquixaru.

³ Gualinnabaguaba lenie guetu qui idhalie neda guetu quixxiꞌatu ca tisa gue Cristu te gatsi bittu chi yu benni desdeba atti nía. Cumu de lo niꞌa gue ca tisa-ni nna tea lisiyya.

⁴ Gualinnaba guaba leni Tata Do Iyyabaaha qui aca lanie neti quixxiꞌaya ca tisa-ni lhixxa su attiba daa loa unia.

⁵ Lhatsiru gualtseꞌe leni ca nu bittu chi ria lecani Jesús. Gualuni duelha gualuni iyá nu dica unle ttuttu sá.

⁶ Satía lhatsiru innele lhe nu dica chadi le benni lhe qui anáchu te roꞌole ecabile gue ca nu innába tisacana le.

Pablo ridhelhabi ttu padiuxi gue ca benni ria le Jesús seꞌe lheꞌe yiesi Colosas

⁷ Biꞌini ria le Jesús lá Tíquico, biꞌini raquinri guebi-na. Labi ancabi ttu benni rudo tisa, tsitsiba runbi neti yuda lo sina gue Jesús. Biꞌin-ni quixxiꞌenbi le gue gaxasná doa-ni.

⁸ Denuala nna ridhelha bi atta seꞌele-na qui quixiꞌenbi le bixa ratetu, qui odú ittabi lele lhe.

⁹ Edhelhaguaba leni Tíquico-na biꞌini raquinri guebi lá Onésimo beaca lasbi lo yies guele-na, labi ancabi ttu benni ria le Jesús rudo tisa. Lacabi quixiꞌaquinbi le iyá nu raca nii.

¹⁰ Aristarco, biꞌini te lania lisiyya-ni ridhelhabi ttu padiuxi guele. Anáguaba Marcos primu gue Bernabé-ni, ridhelhaguabi ttu padiuxi guele. Neti nna chiba utixxiꞌatia le gue Marcos-ni. Gansi itabi etenalhibi le nna lhatsiru uyúle bi.

¹¹ Anáguaba Jesús, biꞌini láguaba Justo, ridhelhaguabi ttu padiuxi guele. Delo iyá ca benni Israel ria le Jesús, sunruba ca biꞌin-ni sela len ca benni runcabi riꞌitu yuda rixxiꞌatu gue gaxasná anca elha rinnabia gue Tata Do Iyyabaaha. Larbacabi gua rute elha xen lasi len neti.

¹² Anáguaba Epafras-ni ridhelhaguabi ttu padiuxi guele. Biꞌin-ni ancabi ttu benni guele, runbi sina gue Jesús Benni anque Cristu. Labi nna satíaba rinnababi guele lo Tata Do Iyyabaaha qui acale nu seꞌe tsitsi lo neda gue Ben-na, nu runi itú iqui itú leni iyá nu raca le Ben-na aca lhe.

¹³ Neti nna yuxeaba yalha richacha iquibi guele, gue ca benni seꞌe lheꞌe yiesi Laodicea-na lhe gue ca benni seꞌe lheꞌe yiesi Hierápolis lhe.

¹⁴ Lucas biꞌini anca doctor racaxxatinri guebi-ni, lenbi Demas ridhelhacabi ttu padiuxi guele.

¹⁵ Gualugüe ttu padiuxi ca benni ria le Jesús attiba riꞌi seꞌe lheꞌe yiesi Laodicea-na. Gualugüeguaba ttu padiuxi Ninfas-na lenbi adí ca benni ria le Jesucristu ritupa lheꞌe lisbi-na lhe.

¹⁶ Dequide chi uluxa belabale lo sitsi-ni nna gualidhelha na qui ulaba ca benni ria le Jesús ritupa lheꞌe yiesi Laodicea-na. Anáguaba sitsi nu udhelha len lacabiha, idhelha guabacabi nua qui ulabale na.

¹⁷ Gualgási Arquipo-na unbi duelha unbi sina lhatsiru nu chi bodhaꞌana Jesús Benni bananie ri-na las nábi.

¹⁸ Neti Pablo, leni naya-ni runia letra atta riluxa nu dia lo sitsi-ni qui ridhelha ttu padiuxi len lebiꞌi. Gualorexxa lele neti nna lisiyyaba tea. Tata Do Iyyabaaha aca lanie lebiꞌi. Amén.