Colosenses 3 - Zapoteco de Aloápam

Nu dica un ttu benni chi te elha nabani gueni lo Tata Do Iyyabaaha

¹ Larcala nna ganna si gualínle chi ancale benni beacani len Cristuha, gualusía lole nu anca gue iyyabaaha atta do Cristu daca ná derechu gue Tata Do Iyyabaaha.

² Gualulaba lele gue nu anca gue iyyabaaha, bittu ulaba lele gue nu anca gue yies lo yu-ni.

³ Cumu lebiꞌi nna leni nu anca gue yies lo yu-ni nna chiba uttile, leni Cristuha liba ancale benni te elha nabani gueni ttu dia lii, Benniha nua tua tsee-ni Tata Do Iyyabaaha.

⁴ Gansi chi beacaxxe Cristu, benni rute elha nabani gueri-na dedee iyyabaaha, anáguaba lebiꞌi eyacaxxeguale lenie seꞌele atta ruꞌu xieni gaꞌana tsee guee.

Bittu unle nu lä anca tsee, gualunle nu anca tsee

⁵ Larcala nna chinca gualcua lheꞌe iquile nu lä anca tsee gue yies lo yu-ni: bittu tsequi mannile, bittu unle nu utsiganle lo Tata Do Iyyabaaha lhe bittu ulaba lele gue nu lä anca tsee ridá lele unle lhe bittu dhaa lele gatta nu te gue attu benni subi guele lhe. Cumu nu ridá leri acari nu teru gueni nna reacana attiba ttu diosi len riꞌi.

⁶ De lo niꞌa gue unná nna isía sá ute Tata Do Iyyabaaha elha disa xeni la tsuꞌubia gue ca nu bittu rudocana tisa guee.

⁷ Lebiꞌi nna iyába unná benle ca tu ttuha atti requile runle nu lä anca tsee.

⁸ Ttiaca nnanna nna chinca gualcua nu cuentaba rilá xxaxxaba lele-na: nu riseꞌen loesle-na lhe nu rutía di lele-na lhe nu riguele-na lhe ca tisa satsa rinnele-na lhe.

⁹ Bitturu un lele aníba lo loesle cumu lebiꞌi nna lärga nu seꞌele ttuha seꞌele nnanna chiba bodhaꞌanle nu lä anca tsee benleha, lärga dica unrule aná.

¹⁰ Tata Do Iyyabaaha chi benie beacale benni cubi, ttuttu sá runie diale acale attiba lee. Anía liba nna qui eꞌeyule un bia tseele.

¹¹ Ttu benni chi becubi nna lärgabi runna gue nuxa anca nua: si ancana benni Grecia, o si ancana benni Israel, si ancana nu ren senni nu runcana leni ca unbiyuu Israel, o si bittu lhe si ancana benni te elha rieni gueni, o si nu lä caa elha rieni gueni lhe si ancana benni ttoꞌo lo sina, o si benni bittu ttoꞌo lo sina lhe. Cumu nu racaru duelha nna Cristuha anque benni xeni. Benniha anque benni rinnabie iyá, doe lhiꞌu lheꞌe lastoo iyári lhe.

¹² Tata Do Iyyabaaha racanie guele. Benniha becuee le qui acale benni seꞌe riesi lheꞌe nu lä anca tsee. Larcala nna gualaca benni ratúa leni, nu du tsee leni lhe nu du siꞌi leni lhe nu bittu runi gue nu ra xxeni leni lhe nu rapa pasensi gue ca benni lhe.

¹³ Gualuchía lo nu rudhaca loesle lhe gualdhí elha xen lasi gue loesle gansi bixa runi gue loesle lhe. Attiba beni Cristu uxíe elha xen lasi guele, lebiꞌi nna aníaguaba gualuni.

¹⁴ Delo iyátte nna unníba nu racaru duelha aca, delába aquin gue loesle cumu nu raquin gue loesri-na runna riseꞌe tsee len loesi beni qui ttuba tseꞌe iyábari.

¹⁵ Elha xen lasi rute Cristuha nna innabie lheꞌe lastoole qui tseꞌe tseele, cumu de nuala nna uxi Tata Do Iyyabaaha le qui acale ttuba benni len lee. Gualute xquixaru lenie gue nu runie len lebiꞌi.

¹⁶ Satía tsuꞌu ca tisa gue Cristuha leni itúxea elha tsee gue Ben-na lheꞌe lastoole. Gualuleꞌen loesle lhe gualuttipa le loesle lhe leni elha rieni rute Tata Do Iyyabaaha. Gualute xquixaru len Ben-na, itú iqui itú lele, gualulha gue Benna leni ca salmo lhe leni ca nu rulhale guee lhe.

¹⁷ Exxa lele Jesús Benni bananie ri-na, atti unle ttu bixa o innele lhe cumu de Benniha nna rugüele Tata Do Iyyabaaha ixquixaru.

Nu daa lo ca benni chi ria le ca tisa gue Jesús uncana

¹⁸ Lebiꞌi ca benni nuila chi betsá náni, gualudo tisa gue nu inná ca unbiyuu guele-na, cumu aná gaꞌana uni ca benni ria le Jesús Benni bananie ri.

¹⁹ Anáguaba lebiꞌi, ca unbiyuu chi betsá náni, aquinle gue ca nuila guele-na, bittu udhaca güeele cana.

²⁰ Lebiꞌi, ca uncuiti, gualudo tisa gue iyá nu rá tata guele lhe nan guele lhe cumu aná ruꞌu le Cristu.

²¹ Lebiꞌi ca tata lhe ca nana lhe bittu udhaca siꞌile ca xiꞌinle-na qui bittu saxxacaquinna.

²² Lebiꞌi ca nu ttoꞌo lo sina gue ca benni, gualudo tisa gue iyá nu inná ca benni anca xxanle seꞌe yies lo yu-ni, bittu sunru atti riseꞌecana rugüiacana guele qui eyaꞌan tseele locani, sinuqui itú iqui itú lele gualuni sina guecani, cumu lebiꞌi nna guayúbale Tata Do Iyyabaaha nna doe rugüie guele.

²³ Bixaba unle nna gualun na itú iqui itú lele, attisiba sina gue Jesús Benni bananie ri-naba nua runle, bittu gue ca benni seꞌe yies lo yu-ni.

²⁴ Lebiꞌi nna chiba yule guadíbale nu ute Jesucristu Benni bananie ri-na guele cumu sina gue Bennihaba runle.

²⁵ Ttiaca nu runi nu lä anca tsee nna dhiba nua elha disa ralhana dhína de benna nu lä anca tsee, cumu Tata Do Iyyabaaha nna ttulapaba run Benniha elha uxtisi.