Colosenses 2 - Zapoteco de Aloápam

¹ Neti nna raca lasia unale, tsitsiba ratea richacha iquia guele, gue ca benni seꞌe lheꞌe yiesi Laodicea-na lhe gue adí ca benni bittu chi anca biaquinna neti lhe

² raca lasia unale qui ebequi rea lele. Lania nna ttuba eseꞌele de raquin gue loesle, qui gatta itú recha elha rieni guele lhe. Aníachu nna ttedaatseenle gue ca tisa te gatsini Tata Do Iyyabaaha bittu utedaani ca benni useꞌe atti nía. Gue Cristuba Benniha bittu ute daaquinna.

³ Len Ben-na saxxacari iyáloba nu te lidhacani anca gue elha rieni na lhe nu runi ritelínri lhe.

⁴ Rixxiꞌatia le unní qui nuttu nu dhi yienle leni ca tisa ridí yie.

⁵ Masquiba nuttu neti du len lebiꞌi, ttiaca satíaba rexxa lasia le. Neti nna reꞌo lasia runa lhatsirba seꞌele, tsitsiba seꞌele ria lele Cristuha lhe.

Leni Cristuha te elha nabani gueri

⁶ Larcala nna attiba chi güia lele Jesucristu anque Benni bananie ri, aníaguaba nna gualtseꞌe gualuni nu raca lee Ben-na.

⁷ Tsitsi gualtseꞌe lo neda gue Ben-na, itú iqui itú lele gualtsia lele Ben-na lhe gualtseꞌe gualuni attiba chi bidetile lhe bittu udú sile ugüele Tata Do Iyyabaaha ixquixarue lhe.

⁸ Gualuyú guele. Bittu ugüelhale dhi yie ca nu requina le leni ca tisa elha nu bittu lidhaca-ni te. Gue nu rulaba lee ca benni seꞌe yies lo yu-ni bunna rinne ca unná. Gue nu anca gue yies lo yu-niba rudaxxu niꞌacani, läga rudaxxu niꞌa ca unná gue nu rá Cristu.

⁹ Cumu Cristu Benni uque benni attiba riꞌi, atti bite yies lo yu-ni nna anque itútteba atti anca Tata Do Iyyabaaha.

¹⁰ Larca lebiꞌi nna tsa lärgabi reasinle qui acale benni gue Tata Do Iyyabaaha cumu chiba babale len Cristu. Benniha anque nu lo gue iyába ca nu anca nu rinnabiana, ca nu ra tsitsi lequinna lhe.

¹¹ De chi babale len Cristu nna nuarca chi ancale attiba benni ren senni, unná nna läga ancana loesi nu runi ca unbiyuu Israel. Cumu nu ribequi senni ca unbiyuu runi Cristuha nna ancana, Benniha utúe itú recha nu lä anca tsee ridá lele runleha.

¹² Atti udile indaha nna lania bigatsile lheꞌe baa leni Cristuha. Aníaguaba nna beacaguabinle attu libe attiba Benniha, cumu de güia lele anca Tata Do Iyyabaaha Benni ra xxeni lee. Lee benie beaquin Cristu, belhidhe Benniha lheꞌe baa atta yuꞌu ca nu yatti-na.

¹³ Ca tu ttuha nna lebiꞌi attiba benni yattiba ucale lo Tata Do Iyyabaaha cumu ucale nu runi nu bittu anca tsee, de bittu ancale nu ribe senni attiba ca unbiyuu Israel-na lhe. Nnanna nna chiba beni Tata Do Iyyabaaha beaquinle lenle Cristuha atti uxíe elha xen lasi gue iyába nu lä anca tsee benleha.

¹⁴ Tata Do Iyyabaaha nna chiba utúe sitsi nu dia loni iyába nu lä anca tsee benriha, cumu unnuha nua rudelha iyyan ri. Atti utá Jesucristuha lo ya crusiha, lania utúe nua. Bennihaba utixa nu dica quixari.

¹⁵ Anía liba nna utúe nu runi ra tsitsi lee iyárecha ca nu rinnabia lhe ca nu ra xxeni lecani lhe gue nu xxegüiha. Atti utá Cristuha lo ya crusiha lania ude locani, nianna benie bettuquinna aní lo iyá benni.

¹⁶ Larcala nna läganu dica inne güeena guele gue nu role lhe gue nu lä role lhe niguaba gue nu dica iꞌiyale lhe gue nu lä dica iꞌiyale lhe niguaba gue biaca bittu runle casu gue ca sá laní-na lhe attiba gansi chi redá beo cubi lhe gue bixa sá dica edí lee benni lhe.

¹⁷ Iyába unní nna ancana suntterba lixxina benni chi te tisa isía, nu anca gualígaha nna anque Cristu.

¹⁸ Bittu dhielhale utsiatta ca nu runi ancacana nu siꞌi le rudú xibicani lo ca ingeli-na le lo neda gue Tata Do Iyyabaaha, qui lä unnittile elha tsee ralha le dhíleha. Cumu ca unná nna cuentaba racana dequi ruleꞌequinna ttu bixa. De unnuha nna runcana dequi tsitsiba xxeni ra lecani leni nu rulaba lecani anca gue la labacana.

¹⁹ Ca unná nna läga seꞌecana leni Cristu. Benniha anque benni rinnabie itúba cuerpu guee, delába riꞌi ca benni ria lerie. Attiba yieti roꞌo loesi itúba nu anca cuerpu gueri, anáguaba yietie len riꞌi. Lee runie tseꞌe tsitsi chiettiri lo neda guee attiba raca le Tata Do Iyyabaaha.

²⁰ Lebiꞌi nna attisiba uttiguabale atti utti Cristu. Denua nna nuarca bitturu rudole tisa unle nu rotsiꞌinu le ca nu runi nu anca gue yies lo yu-ni. Gansi anía anca, nianna, ¿biacala nna rudole tisa gue ca nu rá:

²¹ “Bittu canalu unná lhe bittu golu unná lhe bittu udaxxulu unná lhe”?

²² Iyába nu rácana lhe nu ruleꞌecana lhe rinnena gue nu isíaba sá luxana cua diaba benni rixuinna na, cumu ancabana nu ruxxe le ca benni seꞌe yies lo yu-ni.

²³ Gualígala guannalu dequi guateba lidhaca nu ruleꞌe ca unná, cumu duelhaba runcana acacana benni rudoru leni gue nu anca gue yotu. Runcana ancacana nu siꞌi le lhe nu rutte elha disa cuerpu guecani lhe ttiaca läga ridá unná cuana nu lä anca tsee ridá lecani uncana.