Apocalipsis 9 - Zapoteco de Aloápam

Unní uca atti becuesi ingeliha nu uca gayu trompetaha

¹ Nu uca gayu ingeliha nna becuesibi trompeta denbiha. Neti nna beleꞌettebatia ttu beli do iyyabaaha biríana binnana yies lo yu. Unnuha nna uxína yagüi qui idhalna roꞌo belea nu anca chulha lheꞌeniha.

² Atti udhali nua roꞌo beleaha nna biríatteba seni roꞌo nua attiba seni riría iqui ttu ornu xeni. Seni biría lheꞌe beleaha nna ttuttíru bochulha nua lo tatubisa-na lhe bochulha nua be-na lhe.

³ Lheꞌe seniha nna biría ca nu anca attiba uxxaru ure yies lo yu. Ca unnuha nna uxícana derechu qui quisicana attiba risi ca lacrana-na.

⁴ Ca nu anca attiba uxxaruha nna ucacana mandadu bittu bi udhacacana ixxi te yies lo yu, ni ttu ca ya gaꞌa-na lhe ni ttu nu yaꞌa daa yies lo yu lhe. Suna ca benni bittu re sellu gue Tata Do Iyyabaaha lo xeacaniba quiscana.

⁵ Ttiaca bittu uxicana derechu utticana ca benni quiscanaha, suntteba elha disa uttecana ca nua delo gayu beo. Elha disa uyú ca nua nna ancana attiba elha disa ruyú ttu benni gansi chi risi lacrana na.

⁶ Lania nna tsitsiba eguila le ca benni gaxasná uncana qui gatticana, ttiaca bittu aca, dharu lecani gatticana lhe ttiaca läga isía elhuttiha guecani.

⁷ Ca nu anca attiba anca uxxaruha nna ruleꞌecana attiba coayu chi yuꞌu xocani seꞌe tseecana qui tsiacana lo utilha. Iquicani nna yuꞌu ca nu anca attiba corona anca leni oro, locani nna anca attiba lo benni.

⁸ Itsiquicani nna ancana attiba itsiqui ca nuila-na, ca layacani nna ancacana attiba laya besi.

⁹ Roꞌo lastoocani nna ta ttu iyya bata ancana tsitsi. Ca xxilacaniha nna ruꞌu becana attiba ruꞌu be atta daa ca carreta naꞌaya ixeru ca coayu dia utilha.

¹⁰ Doguaba xubancani attiba do xubana lacrana. Lo xubancaniha nna do xlhutsacani. Leni unnuha uttecana ca benni elha disa delo gayu beo.

¹¹ Ingeli banani belea anca chulha lheꞌeniha nna ancana nu rinnabia gue ca nu anca attiba uxxaruha. Unnuha nna te láni leni tisa hebreo Abadón, leni tisa griego nna te láni Apolión.

¹² Chiba ute elha disa primeroha, ttiaca chi dala a chupa ca elha disa.

Unní uca atti becuesi ingeliha nu uca xxupa trompetaha

¹³ Atti becuesi nu uca xxupa ingeliha trompeta denbiha nna bienttebatia tsiꞌi ttu benni dabi daca atta sia ttapa ca sittiqui sia itapa ladu squina gue becoa anca leni oro do lo Tata Do Iyyabaaha.

¹⁴ Tsiꞌi benni rinneha nna re ingeli becuesi nu uca xxupa trompetaha: ―Udhasi itapaba ca ingeli xica roꞌo yoo xeni lá Éufrates-na.

¹⁵ Laniala nna udhasie itapaba ca ingeli chi seꞌe tsee ribeda isía ura lhe sá lhe beo lhe ida lhe qui utticana a saroꞌoba la aca salhe ca benni seꞌe yies lo yu.

¹⁶ Bienguatia balha xa ca soldado gue ca nua raca chupa gayua millón ca nua sia cuꞌe ca coayu.

¹⁷ Aní beleꞌetia ca coayuha lhe ca nu do cuꞌe ca nua lhe: Ca soldadoha nna ta roꞌo lastoocani iyya ancana xinaa attiba gui, azul attiba iyya nu te láni jacinto lhe yatsi attiba azufre lhe. Ca coayuha nna anca iquicani attiba iqui besi, roꞌocani nna riría gui belha lhe seni lhe azufre lhe.

¹⁸ Lo elha disa bete gui belha biría roꞌo ca coayuha lhe seniha lhe azufreha lhe a saroꞌoba la uca yaba salhe ca benni seꞌe yies lo yu utti.

¹⁹ Cumu roꞌo ca coayuha leni lo xubancaniha do fuerza guecani, leni ca unnuha rutticana benni. Ca xubancaniha nna ancacana attiba belha. Leni iqui ca belhaha nna ro yaꞌacana ca benni.

²⁰ Ca benni beꞌana bittu utti lo ca elha disa-ni nna läga bodú xiyyancana gue nu lä anca tsee runcana, lä bedú siguacana udú xibicani lo ca be xxegüi lhe lo ca nu bittu gualí anca diosi anca leni oro lhe leni plata lhe leni bronce lhe leni iyya lhe leni yaga lhe. Ca diosi-ni nna läga rienquinna lä riláguabaquinna lhe bittuguaba ridacana lhe.

²¹ Bittuguaba bedhancana utticana benni lhe uncana gue güesaa lhe lä bedú siguabacana rutsá roꞌocani nutti nuttiba lhe lä bedú siguabacana runcana ubana lhe.