Apocalipsis 8 - Zapoteco de Aloápam

Benni anque Carneꞌeha rutseꞌe loe nu gasi sellu re roꞌo sitsiha

¹ Atti betseꞌe lo benni anque Carneꞌeha nu gasi sellu re roꞌo sitsiha nna síba beaca iyyabaaha attiba tu salhe ura.

² Nianna beleꞌetia gasi ca ingeli seꞌe lo Tata Do Iyyabaaha. Ca biꞌiniha nna uxícabi gasi trompeta.

³ Dequide unnuha nna bisía attu ingeli udúbi atta do becoaha denbi ttu besíu ancana leni oro. Labi nna uxíbi xxeniru yala qui utseelabi nua ca tisa gue iyába ca benni chi anca gue Tata Do Iyyabaaha rulisacabi Benniha qui uttebi na lo becoa anca leni oro do daca atta du xxila do Benni rinnabiaha.

⁴ Las ná ingelihaba yuꞌu besíuha riría seni gue yala yuꞌu lheꞌeniha ropina risinna lo atta do Tata Do Iyyabaaha, itupa lenna ca tisa gue ca benni chi anca gue Ben-na rulisacabi Ben-na.

⁵ Ingeliha nna bedaxxuttebabi besíuha bodisábi na bexura gui re lo becoaha, atti bedelhabi nua yies lo yu. Nianna utsá teba lhe uyuꞌu betteba lhe gopitteba edha lhe bixútteba lhe yies lo yu.

Ca ingeliha becues ca bi primerba ttapa ca trompetaha

⁶ Iyába gasi ca ingeli deni ca trompetaha beseꞌe tseecabi qui ucuescabi cana.

⁷ Atti becuesi ingeli primeroha trompeta denbiha nna biyinnatteba iyya leni gui selana reni yies lo yu. A saroꞌoba la uca yaba salhe gue yies lo yu bettecana, anáguaba a saroꞌoba la uca salhe ca yaga lhe ixxi gaꞌa lhe bite.

⁸ Atti becuesi ingeli berupaha trompeta denbiha nna biyinnatteba ttu nu anca attiba ttu iꞌiya ritena lo indattoo-na. Lania nna a saroꞌoba la uca yaba rulha indattoo-na beacana reni.

⁹ A saroꞌoguaba lä uca yaba salhe iyába nu bani yuꞌu lheꞌe indattoo-na utti lhe a saroꞌoguaba la uca yaba salhe ca barco dia lo indattoo-na biseꞌe lo lhe.

¹⁰ Atti becuesi ingeli beyonnaha trompeta denbiha nna biríatteba ttu beli xxeni lo bea-na attiba ralha ttu yanalha gui. A saroꞌoba la uca yaba salhe ca yoo-na lhe ca atta sia ca roꞌo dina-na lhe binnana.

¹¹ Beliha nna te láni Nu Ilhá. A saroꞌoba lä uca yaba salhe ca inda te yies lo yu beacacana ilhá. Ixeru benni utti lo niꞌa gue de uꞌuyacana inda beaca ilháha.

¹² Atti becuesi ingeli betapaha trompeta denbiha nna a saroꞌoba la uca rulha gue tatubisa-na lhe nanto beo-na lhe bechulha locani, a saroꞌoguaba la uca yaba salhe ca beli-na lhe bitturu bedáni. Larcala nna a saroꞌoba la uca rulha gue nu anca resá-na bechulha, aníaguaba rela-na lhe.

¹³ Laca dua nía rugüiaya nna beleꞌettebatia ttu bedhía diana rulha xeaba gue lo bea-na rinnena idisa rána: ―¡Gualichiaru le ca benni! ¡Gualichiaru le ca benni! ¡Gualichiaru le ca benni seꞌe yies lo yu gansi chi uresi ca trompeta ucuesi a tsunna ca ingeli-na!