Apocalipsis 7 - Zapoteco de Aloápam

Ttu gayua yuꞌu chua bixxi ttapa mil (144.000) benni Israel cue sellu xeacabi

¹ Dequide unnuha nna beleꞌetia ttapa ingeli seꞌecabi itapa laduba gue yies lo yu, dencabi itapaba ca be riría itapa laduba gueni qui bittu iría be yies lo yu lhe lo indattoo-na lhe lo ni ttu ca yaga-na lhe.

² Beleꞌeguabatia attu ingeli dabi daca atta riría tatubisa-na denbi sellu gue Tata Do Iyyabaaha Benni doe banie. Ingeli-ni nna uresiꞌenbi idisa itapaba ca ingeli chi uxícabi derechu qui bixa udhacacabi yies lo yu lhe indattoo-na lhe nianna rábi cabi:

³ ―¡Bittubi udhacaxxinle yies lo yu-na lhe indattoo-na lhe niguaba ca yaga-na lhe! Dequide liba chi ulequiri sellu lo xea ca benni runi sina gue Tata Do Iyyabaa gueri-na, lania liba unle aná.

⁴ Nianna bienttebatia balhaxacabi nua cue sellu xeacabi: ttu gayua yuꞌu chua yuꞌu ttapa mil (144.000) delo iyába ca benni tsiꞌinu (12) datía Israel cue sellu xeacabi.

⁵ Tsiꞌinu mil (12.000) ca benni datía Judá cue sellu xeacani, a tsiꞌinu mil ca benni datía Rubén, a tsiꞌinu mil ca benni datía Gad,

⁶ a tsiꞌinu mil ca benni datía Aser, a tsiꞌinu mil ca benni datía Neftalí, a tsiꞌinu mil ca benni datía Manasés,

⁷ a tsiꞌinu mil ca benni datía Simeón, a tsiꞌinu mil ca benni datía Leví, a tsiꞌinu mil ca benni datía Isacar,

⁸ a tsiꞌinu mil ca benni datía Zabulón, a tsiꞌinu mil ca benni datía José, a tsiꞌinu mil ca benni datía Benjamín.

Ca benni daa biꞌa canaba gue yies lo yu seꞌecabi lo Tata Do Iyyabaaha nucu xo sitsi guecabi

⁹ Dequide unnuha nna begüiatteba, nianna beleꞌetia ixe lha ixe juisiaba benni, tsaba nuttu nu benni te dhana ulabancabi de yatterba de recabi. Ca biꞌiniha nna ancacabi benni seꞌe lheꞌe iyába ca yiesi seꞌe itúba yies lo yu, iyáloba benni lhe ca benni rinne iyáloba tisa lhe seꞌecabi lo atta du xxila do Benni rinnabiaha, lo Benni anque Carneꞌeha lhe nucu xo sitsi guecabi dencabi dina.

¹⁰ Lacabi nna ribesiꞌacabi idisa rácabi: ¡Tata Do Iyyabaa gueri Benni rinnabia do lo xxila-na lenie Benni anque Carneꞌe-na bodiláque ri lo elha disa dica uyúri!

¹¹ Iyába ca ingeliha seꞌecabi sabiꞌaba atta do Benni rinnabiaha, atta seꞌe ca benniolaha lhe atta seꞌe ttapa ca nu baniha lhe atti bedútteba xibicabi lo Tata Do Iyyabaaha, axta binna xeacabi lo atta du xxila do Benniha, nianna ribequixxencabi Benniha.

¹² Lacabi nna rácabi: ¡Amén! Lu ulhatu guelu lhe innátu: “Lu ancalu Benni ra xxeni leni lhe ancalu Benni te elha rieni gueni yulu iyáxea lhe len cuinalu rutetu xquixaru lhe lu ancalu benni gapatu respeto lhe ancalu benni ra tsitsi leni lhe benni runi tsitsi lhe. Aná cuequixxentu lelu ttu dia lii.” ¡Amén!

¹³ Ttu ca benniolaha nna unnaba tisabi neti rábi: ¿Núnna ca nu nucu xo sitsi guequinna? ¿Ga ladu daa ca unná?

¹⁴ Neti nna becabia guebi rpea bi: Lu gua yulu, xa Tata. Labi nna rábi: Ca unní ulá lo elha disa la tsuꞌubia raca yies lo yu. Lacana nna chi utí xocani nna botsitsican cana leni reni gue Benni anque Carneꞌe-ni.

¹⁵ Denuala nna seꞌecana lo Tata Do Iyyabaaha atta doe rinnabie. Rela resába rixuuni Ben-na cana lheꞌe yotu guee-na. Benni doe lo xxila-naba due lencana. Labe rape cana.

¹⁶ Lacana nna lärga satecana ttuncana, lä ebisirguabacana inda lhe lä utterguaba ubisa-na cana lhe lä acarguaquinna lisiꞌi lhe.

¹⁷ Cumu Benni anque Carneꞌe du rulha gue atta du xxila do benni rinnabia-naba aque benni gape cana attiba ttu benni ruyú carneꞌe. Ben-na ichee cana roꞌo dina atta riyaa inda rute elha nabani ttu dia lii qui iꞌiyacana. Tata Do Iyyabaaha uxíe roꞌo locani inda ribesicana.