Apocalipsis 6 - Zapoteco de Aloápam

Benni anque Carneꞌeha rigúe xxupa ca sellu re roꞌo sitsiha

¹ Neti nna beleꞌetia atti betseꞌe lo Benni anca Carneꞌeha sellu primero gue delo gasi ca sellu re roꞌo sitsiha. Nianna bienttebatia tsiꞌi ttu ca nu delo ttapa ca nu baniha rábi: ―¡Utá, begüia! Tsiꞌibiha nna bienina attiba rieni atti ruꞌu be.

² Atti begüiaya nna beleꞌettebatia ttu coayu sitsi. Nu do cuꞌe nua nna denna ttu arco. Unnuha nna uxína ttu corona. Tsitsiba run nua biríana de ancana nu ridá lo ca nu ritilha lenna. Lana nna diana qui dhana lo adí ca nu itilha lenna.

³ Atti betseꞌe lo Benni anca Carneꞌeha berupa sellu re roꞌo sitsiha nna bienttebatia tsiꞌi nu bani berupaha rábi: ―¡Utá, begüia!

⁴ Nianna biríatteba attu coayu xinaa. Nu do cuꞌe nua nna uxína ttu espada xxeni. Lana nna uxína derechu qui unna bitturu aca uyú loes ca benni seꞌe yies lo yu-ni, qui unna utti loescani lhe.

⁵ Atti betseꞌe lo benni anca Carneꞌeha nu beyonna sellu re roꞌo sitsiha nna bienttebatia tsiꞌi nu bani beyonnaha rábi: ―¡Utá, begüia! Atti begüiaya nna beleꞌettebatia ttu coayu yadhi. Nu do cuꞌe nua nna denna ttu xia libra.

⁶ Lagüi gue ttapa ca nu baniha nna bientia tsiꞌi ttu benni re: ―Sunruba ttu kilo xua xuxtila gaxa ca benni gue ttu sá sina, o tsunna kilorba cebada lhe, ttiaca vinu-na leni seti-na nna bittubi udhaquinlu cana.

⁷ Atti betseꞌe lo benni anca Carneꞌha nu betapa sellu re roꞌo sitsiha nna bienttebatia tsiꞌi nu bani betapaha rábi: ―¡Utá, begüia!

⁸ Atti begüiaya nna beleꞌettebatia ttu coayu yatsi chulha. Nu do cuꞌe nua nna lána Elhutti. Cuꞌe elhuttiha nna denalha nu te láni atta yuꞌu ca nu yatti-na. Ca nua nna uxícana derechu qui utticana ca benni seꞌe yaba salhaꞌa gue salhe yies lo yu. Utticana ca benni leni espada lhe leni ubina lhe leni isagüe lhe leni ca nimala runi lisía seꞌe ca iꞌiyattoo lhe.

⁹ Atti betseꞌe lo Benni anque Carneꞌeha nu gayu sellu re roꞌo sitsiha nna beleꞌettebatia becoa do iyyabaaha. Xaniꞌa becoha nna seꞌe ca benni betticana de güequicabi utixxiꞌacabi ca tisa gue Tata Do Iyyabaaha, de ucacabi benni bedo tisa utixxiꞌa nu anca gualí gue Jesús lhe.

¹⁰ Ca biꞌiniha nna ribesiꞌacabi idisa rácabi: ―Tata Do Iyyabaaha benni ra xxeni lee, lu ancalu Benni nari do riesi lhe ancalu Benni gualí runi nu rinnelu lhe. ¿Núcala unlu elha uxtisi gue ca nu betticana riꞌitu seꞌe yies lo yu-na, qui quixacana gue elhutti guetu?

¹¹ Lania la nna uxí coa ttu ttu ca biꞌiniha xo sitsi qui ucucabi. Nianna rá Tata Do Iyyabaaha ca biꞌiniha cuedacabi attu satti, axta liba edaꞌa ca benni loes lacabi ria le Jesús runguaba sina gue Ben-na, uttican cabi attiguaba bettican cabi.

¹² Atti betseꞌe lo Benni anca Carneꞌeha nu xxupa sellu re roꞌo sitsiha nna beleꞌettebatia bixú idíru. Tatubisa-na nna beacattebe yadhi attiba ttu lari yu. Nanto beo-na nna beacatteba itúbe xinaa attiba reni,

¹³ ca beli sia lo bea-na nna binnattebacana yies lo yu attiba rinna igu sia lo ttu yaga gansi chi riría ttu be idí rucuibin na.

¹⁴ Lo bea-na nna benitti lottebe attiba retúbi ttu sitsi betubie, iyába ca iꞌiya-na lhe ca yu bisi seꞌe lagüi indattoo-na lhe bisílacana atta siacana.

¹⁵ Ca nu rinnabia ca yiesi seꞌe yies lo yu nna becatsitteba locani lheꞌe ca belea, lati ca iyyattoo-na lhe lencana ca nu ra xxeni lecani lhe ca nu texxatta guecani lhe ca nu lo gue ca soldado-na lhe ca nu ra tsitsi lecani lhe iyába ca nu ttoꞌo lo sina lhe ca nu bittu ttoꞌo lo sina lhe becatsi locani,

¹⁶ Atti rulisacana ca iꞌiya-na lhe ca iyyatoo-na lhe rácana ca unná: ―¡Gualiyinna iquitu, gualucatsi riꞌitu lhe lo Benni rinnabia do lo xxila-na, lo elha disa lä tsuꞌubia utte Benni anque Carneꞌe-na riꞌitu lhe.

¹⁷ Cumu chiba bisía sá xeni atti gaꞌana ute Ben-na elha disa gue ca benni. Tsa läganu te dhana dhuna lo nu un Ben-na.