Apocalipsis 5 - Zapoteco de Aloápam

Benni anque Carneꞌeha elha ralhe idhalie lo sitsi tubiha

¹ Neti nna beleꞌetia ttu sitsi tubi deni Benni rinnabia do lo xxilaha leni ná derechu guee. Sitsiha nna lo cuꞌebe anca letra, roꞌo atta riluxa tubi sitsiha nna re gasi sellu qui nuttu nu idhalna loni.

² Beleꞌeguabatia attu ingeli ra xxeni lebi, unnebi idisa rábi: ―¿Nú elha ralhana cuana ca sellu re roꞌo sitsi-na qui idhalna loni?

³ Ttiaca ni ttu ca nu seꞌe iyyabaaha lhe ni ttu ca nu seꞌe yies lo yu lhe ni ca nu seꞌe lhiꞌu yu lhe bittu elha ralhacana idhalcana lo sitsiha, niguaba de ulabacana loni lhe.

⁴ Neti nna uresixxatta, cumu nuttu nu benni bisela te elha ralhabi idhalbi lo sitsiha, ni de ulababi nu dia lo nua lhe.

⁵ Laniala nna rá ttu ca benniola sela ca benni ttapa erúaha (24) neti: ―Bitturu cueslu. Begüiarga, Benni ra xxeni lee te lee Besi gue ca benni datía biꞌini lá Judá, benni datíaguaba David, Ben-na chi ude lo ca nu lä raca uyúcane. Lee elha ralhee cue gasi ca sellu re roꞌo sitsi-na, idhalie loni lhe.

⁶ Nianna beleꞌetia rulha gue atta du xxila do Benni rinnabiaha, rulha gue ttapa ca nu baniha lhe rulha gue ttapa erúa (24) ca benniolaha lhe du ttu carneꞌe ruleꞌe chi betticane, sia gasi sittiquie, gasi iyya loe lhe. Ca gasi iyya lo Benniha nna ancaque gasi ca espíritu rixuu lo sina gue Tata Do Iyyabaaha udhelhe itúba yies lo yu.

⁷ Benni anque Carneꞌeha nna güiattebe guadaxxue sitsi deni deca ná derechu gue Benni rinnabia do lo xxilaha.

⁸ Atti bedaxxu Benni anque Carneꞌeha sitsiha nna itapaba ca nu baniha lencabi ttapa erúa (24) ca benniolaha nna bedútteba xibicabi lo Benni anque Carneꞌeha. Iyába ca biꞌiniha dencabi nu rulha lencabi te láni arpa, denguabacabi ttuttu copa ancacana leni oro, sa ticana yala. Yalaha nna ancana ca tisa gue ca benni chi anca gue Tata Do Iyyabaaha rulisacabi Benniha.

⁹ Lacabi nna rulhacabi ttu cantu cubi rácabi benni anque Carneꞌeha: Lu ancalu Benni elha ralhalu udaxxulu sitsi-na, cualu ca sellu re roꞌo sitsi-na lhe. Cumu lu nna bettican lu, leni reni gueluha nna bodilálu iyáxeaba ca benni seꞌe lheꞌe iyába ca yiesi seꞌe itúba yies lo yu, iyáloba benni lhe ca benni rinne iyáloba tisa lhe qui acacana gue Tata Do Iyyabaaha.

¹⁰ Lu nna chi benlu acacana nu rinnabia lhe bixxudi lhe qui ixuucana lo Tata Do Iyyabaa gueri-na, innabiacana yies lo yu lhe.

¹¹ Atti begüiaya nna bienttebatia tsiꞌi ixe juisiaba ca ingeli seꞌecabi sabiꞌaba cuꞌe xxila atta do Benni rinnabiaha, cuꞌe ca nu baniha lhe cuꞌe ttapa erúa (24) ca benniolaha lhe. Ixe lha ixe juisiaba ca ingeliha raca,

¹² nianna rinnecabi idisa rácabi: Benni anque Carneꞌe betticanaha, Ben-na elha ralhe cuequi xenri lee cumu anque Benni ra tsitsi lee, anque Benni uxí elha tsee te gue Tata Do Iyyabaaha lhe anque Benni te elha rieni guee lhe anque Benni te fuerza guee lhe. Ben-na elha ralhe gaparie respeto, gárie: “Lu ancalu Benni ra xxeni lee lhe Benni udú xibitu lolu lhe.”

¹³ Bienguabatia rinne iyába ca nu beni Tata Do Iyyabaaha seꞌe iyyabaaha lhe ca nu seꞌe yies lo yu lhe ca nu yuꞌu lhiꞌu yu lhe ca nu requi lheꞌe indattoo-na lhe. Iyábacana rácana: Benni rinnabia do lo xxila-na lenie Benni anque Carneꞌe-na, ralhaque cuequi xenri leque, gapari que respeto lhe. Ralhaque gári que laque ancaque benni ra xxeni lee lhe Benni rinnabia xeni ttu dia liiba lhe.

¹⁴ Itapaba ca nu baniha nna rácabi: ―¡Amén! Iyába ttapa erúa (24) ca benniolaha nna biachuttebacabi bedú xibicabi lhe ribequi xencabi lhe ca Benniha.