Apocalipsis 4 - Zapoteco de Aloápam

Juan beleꞌenbi iyyabaaha atta do Tata Do Iyyabaaha rinnabie

¹ Dequide unnuha nna begüiatteba nianna beleꞌetia ttu puerta du yali-na iyyabaaha. Tsiꞌi Benni unnee len neti primeroha, Benni bieni tsiꞌe attiba tsiꞌi ttu trompeta, Benniha unnee re neti: ―Gopi nii. Neti nna uleꞌetia lu nu labíaba aca dequide nu chi bilenlu-na.

² Laniatteba nna bisía Espíritu gue Tata Do Iyyabaaha uyuꞌe lheꞌe itúba cuerpu quia. Neti nna beleꞌettebatia ttu xxila du iyyabaaha, lo nua nna do ttu Benni rinnabia.

³ Benni do lo nua nna ruleꞌe attiba iyya xcaragalha te láni jaspe lhe cornalina lhe. Sa biꞌaba xxilaha nna yequi ttu arco iris raca galhana attiba ttu iyya te láni esmeralda.

⁴ Beleꞌeguabatia a ttapa erúa (24) xxila seꞌe sabiꞌaba xxila atta do Benni rinnabiaha. Lo ca nua nna sia ttapa erúa ca benniola nucu xo sitsi guecabi yuꞌu corona anca leni oro iquicabi lhe.

⁵ Atta du xxila do benni rinnabiaha nna riría edha lhe ruꞌu be lhe ratsa lhe. Daca lo xxila atta do Benniha nna sia gasi ca yanalha gui ralha. Ca guiha nna ancaque gasi espíritu rixuuque lo sina gue Tata Do Iyyabaaha.

⁶ Daca lo xxila atta do Benni rinnabiaha nna re attiba ttu indattoo, de ancaba indattooha yaa nna rilá sába lheꞌeni attiba lheꞌe ttu iyya guana. Rulha gue atta du xxila do Benni rinnabiaha nna seꞌe sa biꞌaba xxilaha ttapa ca nu bani, itúba daca locani lhe daca cuꞌecani lhe sia ca iyya lo.

⁷ Nu bani do primeroha nna ancana attiba besi, nu berupaha nna ancana attiba uꞌuna, nu beyonnaha nna anca loni attiba lo benni, nu betapaha nna ancana attiba bedhía daa lo be.

⁸ Coa ttuttuba ca nu baniha nna sia xxupa xxilacani. Itúba lo cuꞌe ca xxilacaniha nna sia ca iyya lo. Rela resába nna tsa bittu redí lecani rácana: ¡Tata Do Iyyabaa, Benni bananie riꞌitu. ¡Lu ancalu Benni nari do riesi! ¡Lu ancalu Benni nari do riesi! ¡Benni nari do riesi ancalu, xa Tata Do Iyyabaa benni raxxatta tsitsi lee! ¡Lu ancalu benni dolu nnanna lhe benni ttu dola lhe benni dho tiempu chi daba lhe!

⁹ Gansi chi rá ca nu baniha Benni do lo xxilaha, Benni ttu dia liiba anca banie: “¡Xquixabalu xa tata, lu ancalu Benni ra xxeni leni lhe Benni satía gapatu respeto lhe!”

¹⁰ Iyába ttapa erúa (24) ca benniolaha rudú xibicabi lo Benni do lo xxilaha Benni ttu tsaba anca banie, qui rutsá locabi Benniha. Atti ribeattebacabi ca corona guecabiha rudelhacabi ca nua lo Benniha, nianna rácabi:

¹¹ Tata guetu do iyyabaa Benni bananie riꞌitu, lu ancalu Benni ralhalu gátu lu Benni ra xxeni lee lhe Benni ra tsitsi lee lhe Benni ralha gapatu respeto lhe cumu cuinalu benlu iyába nu seꞌe. Cuinalu uca lelu useꞌecana lhe ucacana lhe.