Apocalipsis 3 - Zapoteco de Aloápam

Sitsi-ni nua udhelha Juan atta seꞌe ca benni ria lecabi Jesús lheꞌe yiesi Sardis

¹ ’Benguaba lo sitsi-ni udhelha gue ingeli rapa ca benni ria lecani neti seꞌe lheꞌe yiesi Sardis, gus cana: “Aní rá Jesús Benni bananie gasi lo nu anca Espíritu gue Tata Do Iyyabaaha, Benni denie gasi ca beli lhe. Neti nna yuxeaba gue iyába nu runle. Ca benni nna rácana dequi lebiꞌi nna ancale benni yuꞌu elha nabani gueni, ttiaca neti nna yua lebiꞌi nna nu yattiba ancale.

² Gualebani, tsitsi gualseꞌe, gualedulo gualeoni attu libe nu tsee tsaba chi diale rudhequile na, cumu neti nna chi bilátia, läga anca nu runle-na nu radi lee Tata Do Iyyabaaha.

³ Gualorexxa lele gue nu rá ca tisa chi bieninle-na lhe gue nu chi bidetile lhe. Unnuha gualusigui gualuni. Gualodú xiyyanle gue nu runle-na, gualequi gualodaxxu neda gue Tata Do Iyyabaaha. Gansi bittuba tseꞌele tennále nna iyyaba lele esíaya guele attiba ttu ubana, bittu yule nucaxa isíana guele.

⁴ Ttiaca gua seꞌerba attu chupa ca benni sela len lebiꞌi lheꞌe yiesi Sardis-na bittu chi bitsigacabi cumu bittu runcabi nu lä anca tsee. Ca biꞌin-na nna ralhacabi tsequicabi len neti nucu xo sitsi guecabi de bencabi nu anca tsee.

⁵ Ca benni dhacana uchíacana lo iyá nu satecana lo niꞌa quia nna ugucuacana xo sitsi, tsa bittu oxía lácani lo libro atta dia lá ca benni gatta elha nabani guecani ttu dia lii. Neti nna dhi roꞌa ancabiatia cana lo Tata quiaha lhe lo ca ingeli gue Benniha lhe.

⁶ Atta rieninle nu ria-ni, gualdo nagale gue nu rá Espíritu gue Tata Do Iyyabaaha ca benni ria lecani neti.”

Sitsi-ni nua udhelha Juan atta seꞌe ca benni ria lecabi Jesús lheꞌe yiesi Filadelfia

⁷ ’Benguaba lo sitsi-ni udhelha gue ingeli rapa ca benni ria lecani neti seꞌe lheꞌe yiesi Filadelfia, gus cana: “Aní rá Jesús Benni do riesi anca gue Tata Do Iyyabaaha, Benni gualíga anque Cristo. Lee denie yagüi gue David biꞌini uca nu rinnabia. Benniha nna nuttu nu te dhana idhalna atta rottoe, nuttuguaba nu te dhana ottona atta ridhalie lhe.

⁸ Neti nna yuxeaba gue iyába nu runle. Gualgüiarga, neti nna chi udhalia puerta guele nu nuttu nu te dhana odheana. Masquiba bittu runle tsitsi de bittu raca ixele, ttiaca bedobale tisa gue nu rpeale, bittuguaba chi bedhea lele lä dhi roꞌole ancabienle neti lhe.

⁹ De unnuha nna ca nu anca gue nu xxegüiha ca nu run lecani rácana ancacana benni Israel, ttiaca läga gualíquinna ancacana benni becuee Tata Do Iyyabaaha, neti unia itacana ettedú xibicani lole qui tti ugüiacana lebiꞌi ancale ca nu racatia gueni.

¹⁰ De bedole tisa gue nu benia mandadu unle bego bechíale lo nu guatele, bittu bedhanle ria lele neti lhe denua nna neti nna guapaba le gansi chi bisía sá uyú ca benni seꞌe yies lo yu-ni elha disa qui tsuꞌubiacana.

¹¹ Neti nna ya mertte eta. Gualudo lele gualtseꞌe tsitsi lo neda quia-na qui bittu ettettua attu nu subi nu tsee ralhale dhíle-na.

¹² Ca benni dhacana uchíacana lo iyá nu satecana lo niꞌa quia, neti unia acacana attiba ca pilari gue yotu gue Tata Do Iyyabaaha benni anque Dios quia. Lacana nna tsa lärgaga eríacana lheꞌe yotuha. Lastoocani nna unia lá Tata Do Iyyabaa quiaha, lá yiesi gue Benniha lhe delába Jerusalén cubi daa iyyabaaha, yiesi nu idhelha Benniha yies lo yu-ni. Unguaba lá cubi quia lastoocani lhe.

¹³ Atta rieninle nu ria-ni, gualdo nagale gue nu rá Espíritu gue Tata Do Iyyabaaha ca benni ria lecani neti.”

Sitsi-ni nua udhelha Juan atta seꞌe ca benni ria lecabi Jesús lheꞌe yiesi Laodicea

¹⁴ ’Benguaba lo sitsi-ni udhelha gue ingeli rapa ca benni ria lecani neti seꞌe lheꞌe yiesi Laodicea, gus cana: “Aní rá Jesús Benni lá Amén. Benni rixxiꞌa nu anca gualí gue Tata Do Iyyabaaha, Benni rinnee nu anca gualí lhe. Benni beni leni Tata Do Iyyabaaha iyáxeaba nu seꞌe yies lo yu-ni lhe iyyabaaha lhe.

¹⁵ Neti nna yuxeaba gue iyába nu runle. Gua yuba, lebiꞌi nna lä riseꞌe tsitsiguale itú iqui itú lele lo neda gue Tata Do Iyyabaaha, lä readi gaguale ttu tsala lo neda gue Ben-na lhe. ¡Locala ttirca ttu tsala eyadi gále o ttu tsala tseꞌe tsitsile itú iqui itú lele lo neda gue Ben-na!

¹⁶ Ttiaca cumu de ancale nu guacala tseꞌe tsitsile, nu guacala bittu lhe de ancale nu yuꞌu ttu caaba leni, nuarca cuꞌunaba le nnanna.

¹⁷ Lebiꞌi nna rále: Riꞌitu ancatu nu te gueni. Tsapa tsee ralíana riꞌitu. Tsa lägabi reasintu. Ttiaca bittu ritedeenle, lo Tata Do Iyyabaaha nna ancale nu bittu seꞌe tsee, nu riguꞌu niꞌa benni lhe benni di lhe nu xua loni lhe nu ttunttu lhe.

¹⁸ Larcala nna neti rpea le, gualtá len neti gualgoꞌo oro nu chi beoni gui tagaꞌa nu tsee, qui acale nu gualíga te gueni. Anáguaba gualtá len neti gualgoꞌo xo sitsi guele ucule qui eyaya lo nu rettuinle de ancale nu ttunttu. Len neti gualtá gualgoꞌo ramedi caꞌa lole qui ilenle lhe.

¹⁹ Neti nna iyába ca nu racatia guecani nna rísa cana lhe roseꞌe lhixxa cana lhe. Larcala nna gualequi gualtsia lele Tata Do Iyyabaaha itú iqui itú lele, gualodú xiyyanle gue nu lä anca tsee runle-n lhe.

²⁰ Gualgüiarga, neti nna dua roꞌo puerta-ni rinnea. Gansi nuxa iyieninna tsiꞌa nna idhalna puerta-na, neti nna gaꞌaya atta donaha qui ttulapaba go rse lania na.

²¹ Ca benni dhacana uchíacana lo iyá nu satecana lo niꞌa quia, neti nna unia qui cuiacana len neti lo xxila atta doa rinnabiaya, attiba neti chi udáya, denuala nna doa lenia Tata quia-ni lo xxila atta doe rinnabie.

²² Atta rieninle nu ria-ni, gualdo nagale gue nu rá Espíritu gue Tata Do Iyyabaaha ca benni ria lecani neti.”