Apocalipsis 22 - Zapoteco de Aloápam

¹ Ingeliha nna beleꞌenbi neti ttu yoo nari che inda rute elha nabani ttu dia lii. Indaha nna anque yaa rilá saba lheꞌe attiba lheꞌe tu iyya guana, benniha nna riríe atta du xxila do Tata Do Iyyabaaha rinnabie, atta do Benni anque Carneꞌeha lhe.

² Rulha xeaba gue neda xeni te lheꞌe yiesiha ridá inda. Ladu laduba gue roꞌo yooha nna daa ca yaga rute elha nabani ttu dia lii. Ca unnuha nna daa beoba ribía guecani, tsiꞌinu libe ribía guecani ttu ida. Ca lhaga gue ca yagaha nna rixúcana raca ca benni seꞌe lheꞌe ca yiesi seꞌe yies lo yu ramedi.

³ Lheꞌe yiesiha nna tsa lärgabi nu bittu anca tsee la raca uyú Tata Do Iyyabaaha aca nía. Xxila atta do Tata Do Iyyabaaha rinnabie lenie Benni anque Carneꞌehaba tseꞌe lheꞌe yiesiha. Ca benni rixuu lo sina gue Benniha nna cuequixxencane.

⁴ Lania nna aníga iláquinbi Benniha, tsia lá Benniha lo xeacabi lhe.

⁵ Tsa lärgaga aca rela nía. Ca benni tseꞌe nía nna lärgabirua eyasaquinbi gui udani guecabi, niguaba xieni gue tatubisa-na lhe cumu Tata Do Iyyabaaha Benni bananie ca biꞌinihaba udanie guecabi. Lacabi nua innabiacabi ttu dia liiba.

Jesús re: Neti nna chi tte deoba esíaya

⁶ Ingeliha nna rábi neti: “Ca tisa-ni nna ancaque nu gualí, ancaque tisa dica uxxen le benni gue nu ráque lhe. Tata Do Iyyabaaha Benni bananie ri, Benni rute Espíritu guee leni ca profeta rixxiꞌa ca tisa guee-na lhe lee udhelhe ingeli guee-na qui uleꞌenbi ca benni rixuu lo sina guee nu chi daa ribiga aca.”

⁷ Jesús re: “¡Chi tte deoba esíaya! ¡Carbáru ca benni udocana tisa gue nu rixxiꞌa lo libro-ni chi daa ribiga aca!”

⁸ Neti Juan anca benni bilátia lhe bientia lhe ca unní. Dequide bilátia lhe bientia lhe ca unní nna bedútteba xibia lo ingeli beni beleꞌenbi neti iyá ca unní qui utsá loa bi.

⁹ Ttiaca labi nna ráttebabi neti: “Bittu unlu aná cumu nu runi sina gue Tata Do Iyyabaaha guaba anca neti attiba luu lhe attiba ca profeta raca betsi loeslu utixxiꞌa ca tisa bete Tata Do Iyyabaaha len lacabi lhe attiba iyába ca biꞌini rudo tisa gue nu rá lo libro-ni lhe. Lo Tata Do Iyyabaaha bedú xibilu, Benniha ulequi xxenie.”

¹⁰ Ráguabi neti: “Bittu aquinlu aca silu lä quixxiꞌabalu ca tisa rixxiꞌa gue nu chi daaba aca dia lo libro-ni, cumu chiba daa ribiga aca nu rá loe.

¹¹ Begüelha nu runi nu lä anca tsee-na, usiguina unna nu lä anca tsee, begüeelha nu runi nu anca tsiga lo Tata Do Iyyabaaha, usiguina unna nu anca tsiga, begüeelha nu runi nu anca tsee na, usiguina unichiettina nu anca tsee, nu chi ancana nu do riesi anca gue Tata Do Iyyabaaha nna usiguichattina acana nu do riesi anca gue Ben-na.”

¹² Jesús re: “Gualíba. Neti nna chi tte deoba esíaya, denoja ttu nu utea len lebiꞌi nu ralhale dhíle cua ancaba nu benle.

¹³ Neti anca Benni du atti udulo lhe Benni du atti lhuxa lhe attiba letra A lenna letra Z, anca Benni udo primerba lhe Benni do ttu dia liiba lhe.”

¹⁴ Carbáru ca benni rii xocani qui acacana nari lo Tata Do Iyyabaaha. Anía liba nna gatta derechu guecani gocana nu sia lo yaga rute elha nabani ttu dia lii. Lania nna guacaba etaꞌacana roꞌo ca puerta sia gue yiesiha.

¹⁵ Ttiaca ca benni runi nu lä anca tsee-na lhe ca nu run gue güesaa-na lhe ca nu rutsá roꞌocani nutti nuttiba lhe ca nu rutti benni-na lhe ca nu rudú xibicani lo ca nu bittu gualí anca diosi-na lhe ca nu ridá lecani run lequinna lhe ca unnuha nna tsa bittu etaꞌacana lheꞌe yiesiha.

¹⁶ “Neti, Jesús, udhelha ingeli quia-ni qui quixxiꞌenbi le, lebiꞌi ca benni ria lele neti iyá unní. Neti anca Benni datía David. Anca attiba beli raca galha riria ca dila-na lhe.”

¹⁷ Espíritu gue Tata Do Iyyabaaha lenie benni utsá náque leni Benni anque Carneꞌeha, ráque Benniha: “¡Betaa!” Ca benni iyienini ca tisa-ni nna innáguabacana: “¡Betaa!” Benni rebisi inda nna gansi raca leni nna itana iꞌiyana inda rute elha nabani ttu dia lii. Lana nna tsa lägabi dhaquinna inda-na.

¹⁸ Iyába ca benni rienini ca tisa rixxiꞌa gue nu chi daa aca dia lo libro-ni, neti nna rixxiꞌatia cana, gansi nuxa udianna nu rixxiꞌa lo libro-ni, Tata Do Iyyabaaha udianie ca elha disa daa lo libro-ni qui ugüe unnuha.

¹⁹ Gansi nuxa cuana ttu ca tisa rixxiꞌa gue nu chi daa aca dia lo libro-ni, Tata Do Iyyabaaha cuee derechu te gueni edí baana nu ralhana dhína sia lo yaga rute elha nabani ttu dia lii, bittu ugüelhe na etaꞌana lheꞌe yiesi gue Benniha lhe. Gue unnuha unní dia lo libro-ni.

²⁰ Jesús benni rixxiꞌa unní nna re: “¡Gualíba, neti nna chi tte deoba esíaya!” Amén. ¡Betaa Jesús Benni bananie riꞌitu!

²¹ Jesús Benni bananie ri-na aca lanie iyá rechale. Amén.