Apocalipsis 21 - Zapoteco de Aloápam

Yiesi Jerusalén cubi

¹ Dequide unnuha nna beleꞌetia ttu yies lo yu cubi lenna ttu lo bea cubi. Cumu yies lo yu ure primeroha lenna lo bea nu ure primeroha nna benitti lobacana, bitturguaba indattoo-na te lhe.

² Neti, Juan, beleꞌetia Jerusalén cubiha, yiesi gue Tata Do Iyyabaaha, biríe atta do Benniha iyyabaaha guadie dee. Yiesiha nna chi gaꞌana tsee, attiba ttu nuila chi bedú tseena qui dhína unbiyuu.

³ Nianna bientia tsiꞌi ttu benni unnee idisa iyyabaaha re: ―Gualgüiarga. Niba do Tata Do Iyyabaaha atta seꞌe ca benni. Len labacana dhoe nnanna lacana nna acacana benni guee. Cuinaba lee dhoe len lacana, aque Dios guecani lhe.

⁴ Lee nna uxíe locani inda ribesicana. Tsa lärga nurua gatti lhe nutturguaba nu cuesi lhe lä elenruguabaquinna lhe lä uyúrguabacana elha disa lhe cumu iyába nu uca ttuha nna chiba ute nua.

⁵ Benni rinnabia do lo xxilaha nna re: ―Neti rocubia iyába. Ráguabe neti: ―Beni lo sitsi nu ria-ni, cumu ca tisa-ni nna ancaque nu gualí, ancaque tisa dica uxxen le benni gue nu ráque lhe.

⁶ Dequila nna re neti: ―Chiba uluxa iyá. Neti anca Benni du atti udulo lhe Benni du atti lhuxa lhe attiba letra A lenna letra Z. Nuxa benni rebisna inda, neti utea inda riyaa roꞌo dina rute elha nabani ttu dia lii iꞌiyana. Lana nna tsa lägabi dhaquinna indaha.

⁷ Benni dhana uchíana lo iyá nu satena lo niꞌa quia nna dhína iyá nu tsee utea-ni. Neti nna aca Dios gueni, lana nna acana xiꞌinia.

⁸ Ttiaca ca nu rasini bittu reaxani, ca nu bittu ria lecani neti lhe ca nu runi nu satsa rixxin ca benni lhe ca nu rutti benni lhe ca nu rutsá roꞌocani nutti nuttiba lhe ca nu runi gue güesaa lhe ca nu rudú xibicani lo ca nu bittu gualí anca diosi lhe iyába ca nu run lecani lhe ca unná nna ralhacana tsiacana lo gui xeni ralhaxxatta leni azufre. Lo gui atta tsiacanaha ancana elhutti berupa.

⁹ Ttu ca nu gasi ingeli deni ca gasi copa nu sa ti elha disa daa xubana dhi ca benni seꞌe yies lo yu, bisíabi atta duha rábi neti: ―Utá qui uleꞌetia lu nuila utsá ne nna nuila dhi Benni anque Carneꞌe-na.

¹⁰ Nianna Espíritu gue Tata Do Iyyabaaha nna uyuꞌuttebe itúba lheꞌe cuerpu quia, atti uchetteba ingeliha neti iqui ttu iꞌiya xeni yadha. Nía beleꞌenbi neti Jerusalén, yiesi xeni anca leꞌa gue Tata Do Iyyabaaha biríe atta do Benniha dee guadie.

¹¹ Yiesiha nna raca galhe leni xieni gue Tata Do Iyyabaaha attiba raca galha ttu iyya gaꞌana tsee daca yaxi, attiba iyya raca galha te láni jaspe nu rilá saba lheꞌeni.

¹² Sa biꞌaba yiesiha du ttu deꞌe xeni yadha. Sia tsiꞌinu puerta gueni. Roꞌo ttuttu ca puertaha nna seꞌe ttuttu ingeli. Lheꞌe ttuttu ca puertaha nna dia lá ttuttu ca cue gue ca benni tsiꞌinu (12) datía Israel.

¹³ Daca atta riría ubisa-na sia tsunna puerta, daca norti-na sia a tsunna puerta, daca sur-na sia a tsunna puerta, daca atta radi bisa-na sia a tsunna puerta.

¹⁴ Xana deꞌe du biꞌaba yiesiha nna yuꞌu tsiꞌinu iyya cimientu. Lo ttuttu ca iyyaha nna dia lá ttuttu ca benni uca tsiꞌinu ca biꞌini bedheti nu beleꞌe Benni anque Carneꞌeha.

¹⁵ Ingeli rinne len netiha nna denbi ttu iyyaxtila ancana leni oro. Leni unnuha nna urixxibiabi yiesiha lhe ca puerta gue benniha lhe deꞌe yequi itúba roꞌo yiesiha lhe.

¹⁶ Yiesiha nna anque cuadradu, ttuba anque de bata lhe de ttuni lhe. Ingeliha nna berixxibiattebabi yiesiha leni iyyaxtila anca leni oro denbiha. Yiesiha nna rena chupa mil chupa gayua (2.200) kilómetro, ttuba anque de bata lhe de ttuni lhe de dhue lhe.

¹⁷ Dequila nna berixxibiattebabi deꞌe du sabiꞌaba yiesiha. Deꞌa nna yadhe attiba gayuna yuꞌu gayu metro (65). Ingeliha nna berixxibiabi deꞌeha leni medida rurixxibia ca benni seꞌe yies lo yu.

¹⁸ Deꞌe du roꞌo yiesiha nna anque leni iyya xcaragalha te láni jaspe. Yiesiha nna anque leni ttagaꞌa oro, chi ancana yani rilá saba lheꞌeni attiba lheꞌe ttu iyya guana.

¹⁹ Ca tsiꞌinu iyya cimientu yuꞌu xan deꞌeha nna gaꞌana tseeque leni iyáloba ca iyya daca yaxi. Nu primeroha nna anque leni iyya jaspe, nu berupaha nna anque leni iyya zafiro, nu beyonnaha nna anque leni iyya ágata, nu betapaha nna anque leni iyya esmeralda,

²⁰ nu gayuaha nna anque leni iyya ónice, nu xxupaha nna anque leni iyya cornalina, nu gasiha nna anque leni iyya crisólito, nu xxunuha nna anque leni iyya berilo, nu jaaha nna anque leni iyya topacio, nu tsiiha nna anque leni iyya crisopraso, nu siniaha nna anque leni iyya jacinto, nu tsiꞌinuha nna anque leni iyya amatista.

²¹ Iyába tsiꞌinu ca puertaha nna ancaque leni tsiꞌinu perla. Ttuttu ca puertaha nna ancaque ttu perla. Neda xeni te salhe lheꞌe yiesiha nna anque leni ttagaꞌa oro. Ancana yani, rilá saba lheꞌeni attiba ttu iyya guana.

²² Ni ttu yotu bittu bilátia lheꞌe yiesiha cumu Tata Do Iyyabaaha Benni bananie ri-na, Benni tsitsi ra xxeni lee-na lenie Benni anque Carneꞌeha ancaque yotu gue yiesiha.

²³ Yiesiha nna lägabi reasanie xieni gue tatubisa-na, niguaba gue nanto beo-na lhe cumu xieni gue Tata Do Iyyabaahaba rudani lheꞌe yiesiha, Benni anque Carneꞌehaba anque gui gue yiesiha lhe.

²⁴ Xieni gue yiesihaba udani gue ca benni seꞌe lheꞌe ca yiesi seꞌe yies lo yu tseꞌe lheꞌe yiesiha qui iláquinna dhacana. Ca nu rinnabia seꞌe yies lo yu nna itacana qui utecana iyába nu te guecani runi ra xxeni lecani len yiesiha.

²⁵ Etú sába dhu yali ca puerta gue yiesiha, lärgabirua aca lo rela nía.

²⁶ Ca benni seꞌe lheꞌe ca yiesi seꞌe yies lo yu utecana iyába nu gaꞌana tsee te guecani leni yiesiha.

²⁷ Ni ttu benni runi nu lä anca tsee bittu aca gaꞌana lheꞌe yiesiha, lä gaꞌaguaba benni runi nu rixxinri lhe nu run leni lhe. Sunruba ca benni dia lácani lo libro gue Benni anque Carneꞌeha atta dia lá ca benni gatta elha nabani guecani ttu dia lii, guaca gaꞌacana lheꞌe yiesiha.