Apocalipsis 20 - Zapoteco de Aloápam

Bixa aca delo ttu mil ida

¹ Dequide unnuha nna beleꞌetia ttu ingeli biríabi iyyabaaha dabi denbi yagüi gue belea nu anca chulha lheꞌeniha, denbi ttu cadena xeni lhe.

² Ingeliha nna bedaxxubi nimala xxegüiha, delába belha nu do axta ttua li nu te láni nu xxegüi lhe Satanás lhe bexxicabi na ttu mil ida.

³ Lheꞌe belea nu anca chulha lheꞌeniha nna nía bedelhabi na, atti betto tsitsibi roꞌo beleaha, begüeebi sellu roꞌo nua lhe qui bitturu aca tsequi nua dhi yiena ca benni seꞌe lheꞌe ca yiesi seꞌe yies lo yu, axta liba lhuxa mil ida. Dequide lania liba nna labíaba eyasi nua attu satti.

⁴ Beleꞌeguabatia ca xxila atta ribía ca nu rinnabia. Lo ca unnuha nna usia ca biꞌini chi begüeelha Tata Do Iyyabaaha cabi uncabi elha uxtisi. Beleꞌeguabatia ca benni uchecucana iquicabi de den tsitsicabi ca tisa utixxiꞌa Jesús, lo niꞌa gue ca tisa gue Tata Do Iyyabaaha lhe. Ca biꞌin-ni nna läga bedú xibicabi lo nimala biría lheꞌe indattooha, niguaba lo mentu anca attiba unnuha lhe lä uxielhaguabacabi cue senni gue nua nácabi o lo xeacabi lhe. Ca biꞌin-ni nna beleꞌetia beacaquinbi, nianna unnabiacabi leni Benni anque Cristu ttu mil ida.

⁵ Ca biꞌin-ni nua ca benni yatti beacani primerba. Adí ca nu yattiha nna läga beacattequin ca unnuha. Dequide liba ute mil ida nna beacaquinna.

⁶ Carbáru ca benni eyacani primero atti eyacani ca benni chi utti, cumu ancacabi benni seꞌe riesi anca gue Tata Do Iyyabaaha. Ca biꞌin-ni nna lärga dha elhutti berupaha bixa udhaquinna cabi. Lacabi acacabi bixxudi ixuu lo Tata Do Iyyabaaha, lo Cristu lhe innabiacabi len Benniha mil ida lhe.

Nu xxegüiha biruꞌunana lo gui

⁷ Dequide lhuxa mil ida, nu xxegüiha nna eyasina eríana atta yayana,

⁸ atti iríana tsiana saxxí yiena ca benni seꞌe lheꞌe ca yiesi seꞌe itapa ladu gue itúba yies lo yu. Ca yiesiha nua lá Gog lhe Magog lhe. Lana ottupana iyá ca nua qui itilhacana. Ixe lha ixe juisia ca nua raca, merba re yuxi re roꞌo indattoo-na recana.

⁹ Ca unnuha nna biríattebacana itúba yies lo yu, atti bebiꞌattebacana lo yu atta seꞌe ca benni anca gue Tata Do Iyyabaaha, yiesi nu racani Ben-na gueni. Ttiaca lee nna benttebe biría gui iyyabaaha qui ttu tsaba bettena cana.

¹⁰ Nu xxegüi nu uxí yiena ca nua nna biruꞌunabana lo gui xeni ralhaxxatta leni azufre, attaguaba chi dia nimala xeni biría lheꞌe indattooha, nimala biría lhiꞌu yuha nu ridí yiena ca benni leni nu rinnenaha lhe. Níaba tsuꞌucana uyúcana elha disa la tsuꞌubia ttu dia lii rela resába.

Ca benni yatti aca elha uxtisi guecani lo Tata Do Iyyabaaha

¹¹ Dequide unnuha nna beleꞌetia Tata Do Iyyabaaha doe rinnabie lo ttu xxila sitsi xeni. Aníba lo Benniha benitti lo yies lo yu leni lo bea-na, tsaba nutturucana bilá.

¹² Neti nna beleꞌetia ca nu yattiha, ca nu bittu ra xxeni lecani lhe ca nu ra xxeni lecani lhe seꞌecana lo Benni do lo xxilaha. Nianna bealitteba lo ca libro seꞌe atta do Benniha, bealiguaba lo attu libro lhe. Lo benniha nua dia lá ca benni gatta elha nabani guecani ttu dia lii. Ca nu yattiha nna ucaba elha uxtisi guecani attiba rába lo ca libroha, cua nu benbacana lhe.

¹³ Indattoo-na botena ca nu yatti utti lheꞌeni qui uca elha uxtisi guecani. Elhutti-na lenna atta seꞌe ca nu yatti-na botecana ca nu yatti seꞌe len lacana. Iyába ca nu yattiha uca elha uxtisi guecani cua nu benbacana.

¹⁴ Elhuttiha lenna atta seꞌe ca nu yattiha biruꞌunacana lo gui xeni ralhaxxattaha. Lo gui atta biruꞌuna ca nua ancana elhutti berupa.

¹⁵ Níaguaba biruꞌuna ca nu bittu besela lácani lo libro atta dia lá ca benni gatta elha nabani guecani ttu dia lii.