Apocalipsis 2 - Zapoteco de Aloápam

Sitsi-ni nua udhelha Juan atta seꞌe ca benni ria lecabi Jesús seꞌe lheꞌesi Éfeso

¹ ’Beni lo sitsi-ni udhelha gue ingeli rapa ca benni ria lecani neti seꞌe lheꞌe yiesi Éfeso, gus cana: “Aní rá Jesús Benni deni gasi ca beliha leni ná derechu guee, Benni requie lagüi gasi ca candeleru anca leni oroha lhe.

² Neti nna yuxeaba gue iyába nu runle. Gua yuguaba, lebiꞌi nna tsitsiba ratele runle sina gue Tata Do Iyyabaaha, anáguaba gua ruchíabale lo nu ratele lhe. Gua yuguaba nna lebiꞌi nna bittu ruchíale lo nu runi ca nu runi nu lä anca tsee-na. Lebiꞌi nna chi uluꞌubiale ca nu rácana ancacana apóstol gue Tata Do Iyyabaaha, ttiaca läga gualíquinna, biexxubinle cana run lecani.

³ Anáguaba chi bechíale lo nu ratele lhe chi biyúle elha disa lhe lo niꞌa quia. Lebiꞌi nna bittu bedhanle ria lele neti.

⁴ Ttiaca te ttu nu bittu radi lasia runle, lebiꞌi nna lärgaga raquinle quia nnanna atti uquinle quia atti chi udulobale ria lele netiha.

⁵ Larcala nna gualodhá lele, galiga unná chi besinle deyyale readi gále lo neda quia. Gualodú xiyyanle nna gualodaxxu neda gue Tata Do Iyyabaaha, gualedú lo gualuni gaxasná benle primeroha. Gansi bittuba odú xiyyanle nna itaba ettettuaya candeleru guele-na atta dona.

⁶ Ttiaca te ttu nu reꞌo lasia runle, lebiꞌi nna bittu raca uyúle nu runi ca benni te lácani nicolaítas-na, nu bittuguaba raca uyúa.

⁷ Atta rieninle nu ria-ni, gualdo nagale gue nu rá Espíritu gue Tata Do Iyyabaaha ca benni ria lecani neti. Ca benni dhacana uchíacana lo iyá nu satecana lo niꞌa quia nna ca unnuha nua ugüea cana nu xixxi sia lo ya gaꞌa rute elha nabani ttu dia lii qui gocana. Ya gaꞌaha nua duna salhe gue lo yu gaꞌana tsee gue Tata Do Iyyabaaha.”

Sitsi-ni nua udhelha Juan atta seꞌe ca benni ria lecabi Jesús seꞌe lheꞌe yiesi Esmirna

⁸ ’Benguaba lo sitsi-ni udhelha gue ingeli rapa ca benni ria lecani neti seꞌe lheꞌe yiesi Esmirna, gus cana: “Aní rá Benni udo primerba lhe Benni do ttu dia liiba lhe Benni uttie nna beacanie attu libe.

⁹ Neti nna gua yuba gue iyába nu runle, gue chi ratele ruyúle elha disa lhe gue ancale benni bittubi te gueni lhe ttiaca lo Tata Do Iyyabaaha nna ancale benni te gueni. Gua yuguaba nna ca nu rácana ancacana benni Israel-na, rinne güecana guele. Ca unná nna läga ancacana benni gue Tata Do Iyyabaaha, benni gue nu xxegüihaba anca ca unná.

¹⁰ Bittu gasinle lo nu satele, cumu nu xxegüiha nna unna udelhacana ttu chupale lisiyya quini tsuꞌubia le, delo tsii (10) ubisa satele uyúle elha disa. Lebiꞌi nna tsitsi gualtseꞌe, masquiba uttican le, neti nna guteba elha nabani gatta ttu dia lii guele, Benniha anque corona utea guele.

¹¹ Atta rieninle nu ria-ni, gualdo nagale gue nu rá Espíritu gue Tata Do Iyyabaaha ca benni ria lecani neti. Ca benni dhacana uchíacana lo iyá nu satecana lo niꞌa quia nna tsa läga uyú ca nua elhutti berupaha, nu uni gatti ca benni ttu tsaba.”

Sitsi-ni nua udhelha Juan atta seꞌe ca benni ria lecabi Jesús lheꞌe yiesi Pérgamo

¹² ’Benguaba lo sitsi-ni udhelha gue ingeli rapa ca benni ria lecani neti seꞌe lheꞌe yiesi Pérgamo, gus cana: “Aní rá benni deni espada ttutsi ria irpa ladu roꞌoniha.

¹³ Neti nna gua yuba gue nu runle, gue gaxunna seꞌele lhe. Lebiꞌi nna seꞌele atta du xxila rido nu xxegüiha rinnabiana. Läquiga de unnuha, lebiꞌi nna tsitsiba seꞌele len neti. Läga rudhanle ria lele neti, ni atti betticana Antipas biꞌini uca nu rudo tisa utixxiꞌa ca tisa quia-na. Labi nua betticana lo yu atta seꞌele-na atta rinnabia nu xxegüi-na.

¹⁴ Ttiaca seꞌe ttu chupa nu bittu radi lasia runle. Len lebiꞌi seꞌe ttu chupa ca nu bittu raca lecani odhaꞌancana nu beleꞌe Balaam. Lana nua uluꞌu tisana Balac. Unnuha nna benna beni ca benni Israel nu bittu anca tsee de utocana bela gue ca nimala betticana betecana úna lo ca nu bittu gualí anca diosi, uxí yiena ca nua betsá roꞌocani nutti nuttiba lhe.

¹⁵ Seꞌeguaba len lebiꞌi ttu chupa ca nu rudocana tisa gue nu ruleꞌe ca nu te lácani nicolaíta-na, [nu bittu raca uyúa].

¹⁶ Denuala nna gualodú xiyyanle gualequi gualodaxxu neda gue Tata Do Iyyabaaha, gansi bittuba nna guadá tte gaba atta seꞌele-na qui itilha lania ca unná leni espada riría roꞌa-ni.

¹⁷ Atta rieninle nu ria-ni, gualdo nagale gue nu rá Espíritu gue Tata Do Iyyabaaha ca benni ria lecani neti. Ca benni dhacana uchíacana lo iyá nu satecana lo niꞌa quia nna neti nna ugüea cana elha go te láni maná te gatsiha. Ugüeguaba cana ttu iyya sitsi chicaꞌa. Lo iyyaha nna dia ttu lá cubi nu tsa nuttu nu chi ancabiani, sunruba nu dhína nua yuna bixa dia loni.”

Sitsi-ni nua udhelha Juan atta seꞌe ca benni ria lecabi Jesús lheꞌe yiesi Tiatira

¹⁸ ’Benguaba lo sitsi-ni udhelha gue ingeli rapa ca benni ria lecani neti seꞌe lheꞌe yiesi Tiatira, gus cana: “Aní rá Xiꞌini Tata Do Iyyabaaha, Benni anca ca iyya loe attiba belha gue gui, ca niꞌe nna ruꞌuni xieni gueque de racalaabaque, attiba ttu iyya te láni bronce de chi bixína ttulapa.

¹⁹ Neti nna yuxeaba gue iyába nu runle. Gua yuba lebiꞌi nna ancale benni racani gue ca benni, tsitsiba ria lele neti lhe runle yuda ca benni lhe ruchíale lo nu ratele lhe. Guayúguaba nna lebiꞌi nna tseeru runle nnanna attí atti chi udulobale ria lele neti.

²⁰ Ttiaca te ttu nu bittu radi lasia runle. Lebiꞌi nna rugüelhabale sela nuila lá Jezabel nu rána dequi ancana profetisa gue Tata Do Iyyabaaha len lebiꞌi. Unná nna leni nu ruleꞌena ridí yiena ca benni runi sina quia-na utsá roꞌocani nutti nuttiba, gocana bela gue ca nimala rutticana riguꞌucana úna gue ca nu bittu gualí anca diosi-na lhe.

²¹ Neti nna isá chi uca ribeda na qui odú xiyyanna udaxxuna neda gue Tata Do Iyyabaaha, ttiaca lana nna bittu raca leni, bittuguaba rodhaꞌanna nu risána nutti nuttiba lhe.

²² Lo niꞌa gue unnuha nna unia gani Jezabel-na gattana lo taꞌa isá. Ca nu runi nu satsa runi unná nna utea ttu elha disa lä tsuꞌubia guecani gansi bittuba odú xiyyancana udhancana uncana nu runi nuila-na.

²³ Uttiguaba ca xiꞌini Jezabel-na lhe delába ca nu bideti runi atti runi unná. Anía liba nna qui ttedaani iyáxea ca benni ria lecani neti, neti nna anca nu yu iyáxeaba bixa rulaba lecani lhe bixa racaquinna lhe. Larcala nna cua ttuttubale utea nu ralhale dhíle gue nu benle.

²⁴ Adíle ca benni seꞌe lheꞌe yiesi Tiatira-na, ca nu bittu rudo tisa gue nu ruleꞌe Jezabel-na, bittuguaba chi yule gue nu rá ca unná anca elha rieni gue nu xxegüiha lhe. Neti nna lärgabi rinnaba unle attu bixarua,

²⁵ suntteba gualusigui gualtsia tsitsi lele neti, axta liba atti esíaya.

²⁶ Ca benni dhacana uchíacana lo iyá nu satecana lo niꞌa quia, ca nu usigicana udocana tisa quia uncana nu raca lasia axta atti isía sá lhuxa, neti nna utea derechu guecani acacana nu innabia ca benni seꞌe lheꞌe ca yiesi seꞌe yies lo yu-ni.

²⁷ Attiba neti bete Tata quiaha derechu quia anca nu rinnabia, anáguaba lacana tsitsiba uncana innabiacana ca benni, attiba ttu nu ruduya yedhu yu uduyacana ca unná.

²⁸ Ugüeguaba cana beli güedíla-na lhe.

²⁹ Atta rieninle nu ria-ni, gualdo nagale gue nu rá Espíritu gue Tata Do Iyyabaaha ca benni ria lecani neti.”