Apocalipsis 19 - Zapoteco de Aloápam

Ca benni seꞌe iyyabaaha ribequi xencabi Tata Do Iyyabaaha

¹ Dequide unnuha nna bientia tsiꞌi ixe lha ixe juisia ca benni seꞌe iyyabaaha unnecabi idisa rácabi: ¡Aleluya! Lu rodilálu riꞌitu. Ancalu benni ra xxeni leni lhe benni ra tsitsi leni lhe

² cumu lu ancalu Benni runi elha uxtisi lhixxa gue ca benni, gue nu anca gualí lhe. Lu nna chiba benlu elha uxtisi gue nuila requi rutesa latiniha, nu ancana yiesi ra xxeni leniha, qui cuꞌu quixa gueni. Lana benna güia nitti ca benni seꞌe yies lo yu leni nu satsa benna. Tata Do Iyyabaaha nna chi bequixe na gue elhutti gue ca benni bixuu lo sina guee, bettina.

³ Ca benni seꞌe iyyabaaha nna unnecabi attu libe rácabi: ¡Aleluya! Yiesiha nna tsaba ttu dia liiba dho seni gueni itena.

⁴ Iyába ttapa erúa (24) ca benniolaha lencabi ttapa ca nu baniha nna bedú xibicabi lo Tata Do Iyyabaaha benni do lo xxila rinnabie, axta liba binna lo xeacabi lo atta seꞌecabiha, nianna rácabi Benniha: ¡Amén! ¡Aleluya!

⁵ Nianna bien tsiꞌi ttu benni unnee daca atta du xxila do Benni rinnabia, rábi: ¡Gualcuequi xen Tata Do Iyyabaa gueri-na, iyábale atta rixuule lo sina gue Ben-na atta rapale Ben-na respeto lhe nu ra xxeni leni lhe nu bittu ra xxeni leni lhe!

⁶ Bienguabatia attiba tsiꞌi ixe lha ixe juisiaba benni, attiba rieni tsiꞌi ttu bennunni atta daxxatta idila inda lhe attiba rieni atta uyuꞌu be idisa lhe. Nianna rábi: ¡Aleluya! Cumu Tata Do Iyyabaa benni tsitsi ra xxeni lee-na, Benni bananie ri-na lhe chi uduloe rinnabie!

⁷ Edáquinri lhe eyoꞌo leri lhe gári Ben-na: “Lu ancalu Benni ra xxeni lelu cumu chi bisía sá utsá ná Benni anca Carneꞌe-na. Nuila dhi Ben-na nna chi bedú tseena.

⁸ Nuilaha nna begüeelhe na ucuna ttu lari tsee te láni lino, nu nari xuu ruꞌuni xieni gueni. Lari nucu nuilaha nna dienna nu tsee runi ca benni seꞌe riesi anca gue Tata Do Iyyabaaha.”

⁹ Ingeliha nna rábi neti: ―Beni lo sitsi: Carbáru ca benni biyaxi go elha go tsee gue laní gue utsá ná Benni anque Carneꞌe-na. Nianna rábi neti: ―Ca tisa-ni ancaque cuinaga tisa gue Tata Do Iyyabaaha.

¹⁰ Neti nna bedútteba xibia lo ingeliha qui utsá loa bi, ttiaca ingeliha nna ráttebabi neti: ―Bittu unlu aná, lo Tata Do Iyyabaaha bedú xibilu, cumu nu runi sina gue Ben-naguaba anca neti, attiba luu lhe attiba adí ca benni ria le Jesús den tsitsicabi ca tisa utixxiꞌa Ben-na lhe. Cumu ca tisa utixxiꞌa Jesús ancaque ca tisa nu ruttipaque le ca benni qui usiguicabi quixxiꞌacabi ca tisa rute Tata Do Iyyabaaha len lacabi.

Benni do cuꞌe coayu sitsiha

¹¹ Nianna beleꞌetia iyyabaaha du yalie. Nía ucaxxe ttu coayu sitsi. Benni do cuꞌe nua nna lee Benni rinne nu dica uxxen leri, nu anca gualí lhe cumu anque Benni runie elha uxtisi lhixxa, anque Benni ria ritilha attiba raxxíbana anca tsee lhe.

¹² Ca iyya loe nna ancaque attiba belha gue gui, iquie nna yuꞌu ixeru corona, diaguaba lo xea Benniha ttu lá nu nuttu nu yu, sunruba lee yue bixa lá nua dia lo xee.

¹³ Xo Benniha nucue nna tsaba chi bitiechuna reni. Lee nna te lee Tisa gue Tata Do Iyyabaaha.

¹⁴ Ca benni anca soldado gue iyyabaaha nna denocabi Benniha docabi cuꞌe ca coayu sitsi. Xocabi nucucabiha nna ancana leni lari tsee te láni lino, ancana sitsi lhe nari lhe.

¹⁵ Roꞌo Benniha nna ria ttu espada ria roꞌoni. Leni unnuha unie güee ca benni seꞌe lheꞌe ca yiesi seꞌe itúba yies lo yu. Lee nna tsitsiba unie innabie cana. Attiba rudú niꞌacani iqui besuli qui idína iría inda xixxi gueni, aníaba udhaque cana qui dhicana elha disa lä tsuꞌubia de risaꞌaxxattani Tata Do Iyyabaaha Benni tsitsi ra xxeni lee.

¹⁶ Lo lari nucu Benniha lhe lo xiche lhe dia lee, nu rá aní: “Benni rinnabia gue ca nu rinnabia-na; Benni banani ca nu ra xxeni lequinna lhe.”

¹⁷ Beleꞌeguabatia attu ingeli dubi lo tatubisa-na. Ingeliha nna uresiꞌenbi idisachiga iyáxea ca nu sia xxilani ro bela requi rulha xeaba gue lo bea-na, rábi cana: ―¡Gualtá. Gualetupa qui gole elha go xxeni utee Tata Do Iyyabaaha!

¹⁸ Nu ute Ben-na gole nna ancana bela gue ca nu rinnabia-na lhe gue ca nu lo gue ca soldado-na lhe gue ca benni ancacana nu run tsitsi lhe bela gue ca coayu lhe gue ca nu do cuꞌe ca unná lhe bela gue iyába benni lhe gue ca nu ra xxeni lequinna lhe ca nu bittu ra xxeni lequinna lhe si ancacana nu ttoꞌo lo sina lhe si nu bittu ttoꞌo lo sina lhe.

¹⁹ Neti nna beleꞌetia nimala nu guatelaba ancana biría lheꞌe indattooha, ca nu rinnabia gue yies lo yu lencana ca soldado guecaniha lhe. Iyábacana ttuba chi beseꞌecana qui ttilha lencana Benni do cuꞌe coayu sitsiha lenie ca soldado guee.

²⁰ Nimala xeni biría lheꞌe indattooha nna biaxxubana itupa lenna nimala biría lhiꞌu yuha nu ridí yiena ca benni len nu rinnena. Lana nua beni ixe lo ca milagru lo nimala biría lheꞌe indattooha. Leni ca milagru bennaha nna uxí yiena ca nu uxielha uxí senni gue nimala biría lheꞌe indattooha, bedú xibicani lo mentu anca attiba unnuha lhe. Irpabacana biruꞌunacana dia banbacana lo gui xeni ralhaxxatta leni azufre.

²¹ Adí ca nu deno ca unnuha nna utticana leni espada riría roꞌo Benni do cuꞌe coayu sitsiha. Iyába ca nu sia xxilani ro bela requi lo bea-na nna belarabaquinna de utocana bela gue ca nua.