Apocalipsis 18 - Zapoteco de Aloápam

Yiesi lá Babilonia biseꞌe lona

¹ Dequide unnuha nna beleꞌetia attu ingeli guadibi dabi iyyabaaha, labi nna ancabi ttu ingeli begüeelhe bi rinnabiabi. Yies lo yu-ni nna beleꞌetteba yani de uyuꞌu xieni guebi.

² Ingeli-ni nna uresiꞌabi idisa rábi: ¡Chi biseꞌe lo yiesi Babilonia! ¡Chi uluxa yiesi nu ra xxeni leniha! Lisi ca be xxegüiba chi beacana, lisi iyáloba ca be satsa lhe atta retaꞌa iyáloba ca nu sia xxilacani anca tsiga rixxini benni lhe.

³ Cumu lo niꞌa gue yiesiha biyieti iyáxeaba ca benni seꞌe lheꞌe ca yiesi seꞌe itúba yies lo yu nu satsa runna leni nu subi subi, attisiba len vinuba nua udusiquinna. Ca nu rinnabia seꞌe yies lo yu-ni nna betsá roꞌocani unná, bencana nu satsa lenna lhe ca nu ruttoꞌo seꞌe yies lo yu-ni nna chi ucacana nu te xxatta gueni de uyoꞌo yiesi-na iyába nu ridá leni ruttoꞌocana.

⁴ Bienguatia tsiꞌi attu benni iyyabaaha re: Lebiꞌi, ca benni chi anca quia, gualiría lheꞌe yiesi-na qui bittu iyietile unle nu satsa run ca nu seꞌe naa, qui bittu uyúle ca elha disa uyú ca unná lhe.

⁵ Cumu nu satsa run ca unná chi guanixxattana, axtaba lo bea-ni chi beꞌeyuna. Neti nna läga chi bixulhatia gue nu lä anca tsee runcana,

⁶ gualudhaca yies-na attiba bedhacan leha, chupa libe loesi nu bedhacan leha, gualudhaca na. Gualuchixxi loesi nu iꞌiyana chupa libe leni nu anca tagaꞌaru tsitsi atti nu betena uꞌuyaleha.

⁷ Attiba bedí baana nu utta gueni, benna ttaba leni unnuha lhe aníaguaba gualuni len lana qui satexxata-na lhe uyúna elha disa lhe cumu unnena lhiꞌu leni rána: “Neti nna doba attiba nu rinnabia. Läga nuila bidabi neti, tsa läga isía sá elentia lhe.”

⁸ Denua nna lheꞌe ttu sába isía iyáloba ca elha disa uyúna: nu uni eleninna lhe gattina ubina lhe tsiana lo gui lhe elhutti gueni lhe cumu xxeni ra lee Tata Do Iyyabaaha Benni bananie ri. Lee nna chi benie elha uxtisi gueni qui cuꞌu quixa gueni.

⁹ Ca nu rinnabia seꞌe yies lo yu nna betsá roꞌocani unná, bencana nu satsa lenna lhe bedí baacana leni unná nu te gueni lhe lacana nna elenquinna lhe cuescana lhe gueni gansi chi biláquinna radha seni gueni ritena lo gui.

¹⁰ Idittu liba tseꞌecana de gasquinna lo elha disa uxí nua. Nianna innácana: ¡Carusiꞌirulu, xa yiesi Babilonia nu ra xxeni leni! ¡Gualichiaru lelu, xa yiesi nu ra tsitsi leni! Ttu ca lha lo nedaba bisía elha disa guelu.

¹¹ Ca nu ruttoꞌo seꞌe yies lo yu nna elenquinna lhe cuesicana lhe gue yiesiha, cumu nutturu nu te goꞌona nu ruttoꞌocana.

¹² Nu ruttoꞌocana ancana: oro lhe plata lhe ca iyya daca yaxi lhe perla lhe lari tsee nu te láni lino lhe lari seda nu anca muradu lhe xinaa lhe iyáloguaba ca yaga rure xixxi lhe iyáloba nu anca leni sitta te láni marfil lhe nu anca leni ca yaga tsee daca yaxi lhe nu anca leni iyya te láni bronce lhe nu anca leni iyya lhe nu anca leni iyya raca galha te láni mármol lhe.

¹³ Ruttoꞌoguabacana canela lhe iyáloba nu rure ixixxi lhe yala lhe vinu lhe seti lhe yiedi lhe xua xuxtila lhe uꞌuna lhe carneꞌe lhe coayu lhe carreta lhe axtaba ca benni bettoꞌocana qui cuen ca nua sina gue ca nu uyoꞌocan cana.

¹⁴ Nianna gácana yiesi Babilonia: ¡Garua te iyába ca nu tsee ridáxxatta leluha, ttu tsaba bennittilu iyába nu daca te gueluha lhe nu ruꞌuxxatta leluha lhe!

¹⁵ Ca nu ruttoꞌo uttaxxatta guecani de uyoꞌocana lhe bettoꞌocana lhe leni yiesi Babiloniaha nna idittu liba tseꞌecana de gasquinna lo elha disa ruyú nua, elenquinna lhe cuescana lhe.

¹⁶ Nianna innácana: ¡Carusiꞌiru yiesi ra xxeni leniha! ¡Gualichiaru le yiesi rucu lari tsee te láni lino, nu rucu lari muraduha lhe lari xinaa lhe nu gaꞌana tsee cuerpu gueni leni oro lhe perla lhe leni ca iyya raca la daca yaxi lhe!

¹⁷ ¡Ttu ca lha lo nedaba biseꞌe lo iyárechaba nu daca te gueni! Iyába ca nu banquinna ca barcoha lhe ca nu reopi lheꞌe ca nua deyyacana attu atta subi lhe ca nu riben sina lheꞌe ca nua lhe iyába ca nu riben sina lo indattoo-na lhe idittu liba seꞌecana.

¹⁸ Gansi chi biláquinna seni riría gue yiesiha ritena, ribesiꞌattebacana rácana: ―¡Tsa lärga nurua attu yiesi te ra xxeni leni atti ra xxeni le yies-ni!

¹⁹ Atti bedelhatteba biste iquicani, ribescana lhe ribesiꞌanicana de re lenquinna lhe. Nianna rácana: Carusiꞌiru yiesi ra xxeni len-ni! ¡Gualichiaru leni! Leni nu te gue yies-naba uca ca nu seꞌe barco guecani lo indattoo-na nu texxatta gueni. ¡Nnanna nna ttu ca lha lo nedaba biseꞌe lona!

²⁰ Gualedacani gueni, lebiꞌi ca nu seꞌe iyyabaaha, gualedacani lebiꞌi ca nu seꞌe riesi anca gue Tata Do Iyyabaaha lhe lebiꞌi ca benni bedheti nu beleꞌe Jesús lhe ca profeta gue Tata Do Iyyabaaha lhe cumu chi beni Tata Do Iyyabaaha elha uxtisi gueni qui cuꞌu quixana gue iyá nu bedhacana lebiꞌi.

²¹ Nianna ttu ingeli ra xxeni lebi nna ulhidhabi ttu iyya nu ancana attiba ttu iyya gue ttu mulinu xeni, uruꞌunabi na lheꞌe indattooha, atti rábi: Aníba iruꞌunalu liree, yiesi Babilonia ra xxeni leni, qui tsa ttualu nutturu nu ilenna lu yies lo yu-ni.

²² Ttu tsa bitturu iyieni ulha ca benni leni arpa lhe flauta lhe trompeta lhe lo ca neda guelha. Nutturguaba nu ca nu runi iyáloba ca nu rixuuni benni lhe tseꞌe guelu, lä iyienruguaba uttu ca mulinu-na xua lhe.

²³ Ni ttu gui bitturu udani lo ca neda guelha, lä iyienruguaba edacacani ca nu utsá nácani lhe cumu ca nu ruttoꞌo gueluhaba uca ca nu ra xxeni leni gue yies lo yu-ni, lu nna uxí yielu iyába ca benni seꞌe lheꞌe ca yies seꞌe itúba yies lo yu leni elha güesaa guelu.

²⁴ Cumu lo ca neda guelha bilali reni gue ca profeta gue Tata Do Iyyabaaha, reni gue ca benni seꞌe riesi anca gue Ben-na lhe reni gue iyába adí ca benni betticana yies lo yu lhe.