Apocalipsis 17 - Zapoteco de Aloápam

Nuila rutesa latiniha dona cuꞌe ttu nimala xinaa

¹ Ttu ca nu gasi ingeli deni ca gasi copaha nna bisíabi atta duha rábi neti: ―Utá qui uleꞌetia lu elha disa dhi nuila ra xxeni leni requi rutesa latini do lo atta te idila inda-na.

² Ca nu rinnabia gue yies lo yu-ni nna betsá roꞌocani nuila rutesa latin-na. Ca benni seꞌe yies lo yu nna biyieticana nu satsa runi unná, lacana nna bedhá iquicani Tata Do iyyabaaha qui bedú xibicani lo ca nu bittu gualí anca diosi. Attisiba vinu gue nu requi satsa unnába nua uꞌuyacana.

³ Nianna bisíatteba Espíritu gue Tata Do Iyyabaaha uteꞌe lheꞌe cuerpu quia, atti uchetteba ingeliha neti daca lo yu bisiha. Nía beleꞌetia ttu nuila dona cuꞌe ttu nimala xinaa nu guatelaba ancana sia gasi choettuiquini, a tsii sittiquini nna. Itúba cuerpu gue nimalaha nna dia ca tisa rigúa balaꞌana gue Tata Do Iyyabaaha.

⁴ Xo nuila do cuꞌe nua nna ancana xinaa leni muradu. Itúba cuerpu gueni nna gaꞌana tsee leni oro lhe perla lhe leni ca iyya raca galha daca yaxi lhe. Las náni nna yuꞌu ttu copa anca leni oro sa tina nu tsiga rixxini benni gue nu satsa benna betesa latini.

⁵ Lo xeani nna dia ttu lá nu bittu yu benni bixa dia leni. Aní rá nu dia lo xea nua: Babilonia ra xxeni leni, nan gue ca nuila requi rutesa laticani lhe nan gue iyá nu tsiga rixxini benni raca yies lo yu-ni lhe.

⁶ Neti nna beleꞌetia nuilaha dusinna de uꞌuyana reni gue ca benni seꞌe riesi anca gue Tata Do Iyyabaaha, ca benni betticana de utixxiꞌacabi ca tisa gue Jesús. Neti nna tsitsiba bebantia atti beleꞌetia nua.

⁷ Ingeliha nna rábi neti: ―¿Biaca reban xxattinlu? Neti quixxiꞌatia lu bixa dia-ni nu bittu yu ca benni gue nuila-na, gue nimala nu do nuila-na cuꞌeni nu sia gasi choettuiquin-na, a tsii sittiquini lhe.

⁸ Nimala xinaa bilenlu-na, lana nua udo ttuha, nnanna nna lärga nuna do, ttiaca chi tte deoba eríana lheꞌe belea nu anca chulha lheꞌeniha, qui lenla nna tsiana atta tsaba inittina. Ca benni seꞌe yies lo yu bittu dia lácani lo libro atta dia lá ca benni gatta elha nabani guecani ttu dia liiba desdeba atti deobali cue yies lo yu, lacana nna tsitsiba ebanquinna gansi chi biláquinna eyacaxxe nimala udo ttuha, nu nnanna nna lärga nuna do.

⁹ ’Nii reasa elha rieni qui ttedeen benni gue unní. Ca gasi choettuiqui nimala-na ancacana ca gasi iꞌiya do nuila-na iquicani,

¹⁰ anáguaba ancacana gasi ca nu rinnabia lhe. Gayu ca unná nna bitturu rinnabiacana, nu xxupa-na ancana nu rinnabia nnanna nu gasiha nna chi isíala nua. Gansi chi bisía nua nna ttu sattirba dho nua innabiana.

¹¹ Nimala nu udo ttuha, nu do nnanna nna lärga nuna do, unnuha ancana nu xxunu innabia. Lana nna selana ca nu gasi rinnabiaha, dequide chi unnabiana nna tsiaguabana atta ttu tsaba inittina.

¹² ’Ca tsii sittiqui bilenlu-na, ancacana tsii ca nu innabia. Ca unná nna läga chi udulocana innabiacana. Lacana nna ttu sattirba dhicana derechu qui innabiacana leni nimala xeniha.

¹³ Iyába tsii ca nu innabiha nna ttuba eseꞌecana oquinna iquicani utecana nu ra tsitsi le guecani lhe derechu te guecani rinnabiacana lhe las ná nimala xeniha.

¹⁴ Lacana nna ttilha lencana Benni anca Carneꞌeha, ttiaca dhaba Ben-na locani cumu lee anque Benni bananie ca nu ra xxeni lequinna anque Benni rinnabia gue ca nu rinnabia-na lhe. Dhaba Benni anque Carneꞌe-na locani itupa lenie ca benni seꞌe len lee, ca biꞌin-ni nna tsa bittu rudhancabi ria lecabi Ben-na, ancacabi benni uxi Tata Do Iyyabaaha lhe benni becuee Ben-na lhe.

¹⁵ Ráguaba ingeliha neti: ―Ca inda nu bilenlu do nuila requi rutesa latin-na locani nna ancacana iyáxeaba ca benni seꞌe lheꞌe iyába ca yiesi seꞌe itúba yies lo yu, iyáloba benni lhe ca benni rinne iyáloba tisa lhe.

¹⁶ Iyába tsii sittiqui bilenlu-na lencana nimala-na bittu aca uyúcana nuila requi rutesa latin-na, lacana nna tsaba uttuntucan na, a suna anába udúcan na, gocana bela gueni lhe uttecan na lo gui lhe.

¹⁷ Tata Do Iyyabaaha nna chiba benie qui uncana nu raca lee uncana. Lacana nna ttuba eseꞌecana oquinna iquicani qui utecana leni nimalaha itúba derechu te guecani rinnabiacana, axta liba sadona gue nu chi gaꞌanani Tata Do Iyyabaaha aca.

¹⁸ Nuila bilenlu-na ancana yiesi ra xxeni leni rinnabia ca nu rinnabia seꞌe lheꞌe iyába ca yiesi seꞌe yies lo yu.