Apocalipsis 16 - Zapoteco de Aloápam

¹ Neti nna bientia tsiꞌi ttu Benni unnee idisa lhiꞌu lheꞌe yotu, re gasi ca ingeliha: ―Gualtsia nna gualsalali nu risaꞌa iqui gue Tata Do Iyyabaaha taꞌa lheꞌe gasi ca copa denle-na yies lo yu.

² Ingeli primeroha nna güiattebabi gualalbi nu taꞌa lheꞌe copa denbiha yies lo yu. Nianna iyába ca benni rencana senni gue nimala biría lheꞌe indattooha, ca nu rudú xibicani lo mentu anca attiba unnuha lhe gualitteba lheꞌe cuerpu guecani yiesu satsa bixínani nu racaxxatta.

³ Ingeli berupaha nna belalittebabi nu taꞌa lheꞌe copa denbiha lo indattoo-na. Indattoo-na nna beacattebana attiba reni gue ttu nu betticana. Lania nna iyába ca nu bani yuꞌu lheꞌeni utti.

⁴ Ingeli beyonnaha nna belalittebabi nu taꞌa lheꞌe copa denbiha lheꞌe ca yoo-na, ca roꞌo dina atta riyaa ca inda-na lhe nianna beacatteba ca inda-na reni.

⁵ Neti nna bientia unnee ingeli banani inda-na rábi: Lu, Tata Do Iyyabaaha Benni nari do riesi, Benni ttu dola lhe Benni do nnanna lhe lhixxaba runlu elha uxtisi atti ridhelhalu ca elha disa-ni yies lo yu.

⁶ Cumu ca nu run nu lä anca tsee-na belalicana reni gue ca benni betticanaha, delába ca biꞌini seꞌe riesi anca guelu, ca profeta guelha lhe. Nnanna nna rugüiꞌal cana reni. ¡Lacana nna unnába ralhacana!

⁷ Bienguatia tsiꞌi ttu benni unne daca atta do becoaha rábi: —Gualíbinlu, xa Benni bananie riꞌitu, Tata Do Iyyabaa Benni tsitsi ra xxeni lee. Elha disa rutelu gue ca benni seꞌe yies lo yu nna ancana nu ralhacana dhicana cumu runbalu elha uxtisi guecani lhixxa suba attiba raxxína.

⁸ Nu betapa ingeliha nna belalittebabi nu taꞌa lheꞌe copa denbiha lo tatubisa-na. Tata Do Iyyabaaha nna begüeelhabe tatubisa-na bettee ca benni leni gui guee.

⁹ Iyába ca benni attulade bitecana leni lha gue tatubisa-na, ttiaca tsa läga bodú xiyyancana, lä ulequi xen guabacana Tata Do Iyyabaaha Benni udhelha elha disa guecaniha lhe. Lacana nna utelacana iqui Benniha.

¹⁰ Nu gayu ingeliha nna belalittebabi nu taꞌa lheꞌe copa denbiha lo xxila atta do nimala biría lheꞌe indattoo-na rinnabiana. Lania nna bechulhatteba itúba atta rinnabiana. Ca benni nna royaꞌani lhusacani de yatterba de nu ratecana.

¹¹ Ttiaca tsa läga bodú xiyancana gue nu bittu anca tsee runcana. Lacana nna utelacana iqui Tata Dios Benni do iyyabaaha de biaca raya rilá cuerpu guecani, de racacana yiesu rixinaniha lhe.

¹² Nu xxupa ingeliha nna belalittebabi nu taꞌa lheꞌe copa denbiha lo yoo xeni lá Éufrates. Yooha nna bebisiꞌattebana qui beali neda tte ca nu rinnabia seꞌe daca atta riría ubisa-na.

¹³ Nianna beleꞌetia tsunna ca be satsa ancacana attiba culhusu biría roꞌo nimala xxegüiha, roꞌo nimala biría lheꞌe indattooha lhe roꞌo nimala biría lhiꞌu yuha nu ridí yiena ca benni len nu rinnenaha lhe.

¹⁴ Ca nu ancacana attiba culhusuha nna ancacana be xxegüi gue nu lexúaha. Lacana runcana ca milagru xxeni. Anáguaba biríacana diacana sattúpacana iyába ca nu rinnabia gue yies lo yu qui chi seꞌe tsee ca nua itilhacana gansi chi bisía sá xeni gue Tata Do Iyyabaaha benni tsitsi ra xxeni lee-na.

¹⁵ Cristuha nna re: “Gualuyú guele, cumu neti nna esíaya attiba ttu ubana iyyaba le benni risinna guecani. Carbáru ca benni tenná lania, lacana nna guanucuba xocani de seꞌecana ribedacana neti, qui bittu ettúquinna ttunttucana.”

¹⁶ Ca be xxegüiha nna bottupacana ca nu rinnabia lo yu nu te láni Armagedón leni tisa hebreo.

¹⁷ Nu bedaꞌa gasi ingeliha nna belalittebabi nu taꞌa lheꞌe copa denbiha lo be. Nianna bieni tsiꞌi ttu benni unnee idisa lhiꞌu lheꞌe yotu do iyyabaaha daca atta du xxila do Benni rinnabiha. Benniha nna re: ―Chi uluxa iyá.

¹⁸ Nianna gopitteba edha, uyuꞌu betteba lhe utsátteba lhe. Yies lo yu nna bixútteba idíru. Ni ttu libe bittu chi bixú ituttu seꞌe benni yies lo yu atti bixú lania.

¹⁹ Yiesi ra xxeni leni lá Babilonia nna bilaꞌa lheꞌeni ucana tsunna lilaꞌa. Ca yiesi seꞌe yies lo yu nna bitapacana. Tata Do Iyyabaaha nna läga bixulhanie Babilonia yiesi ra xxeni leniha. Lee nna begüiꞌiye na nu taꞌa lheꞌe copa denie, unnuha anca elha disa tsitsi begüeena gue nu bisaꞌaxxattanie.

²⁰ Iyába ca yu bisi seꞌe lagüi indattoo-na lhe ca iꞌiya-na lhe benitti locana.

²¹ Ureguaba iyya elha daa iyyabaaha iqui ca benni. Ca iyyaha nna diꞌicana attiba tu chua (40) kilo. Ca benni nna utelacana iqui Tata Do Iyyabaaha de biaca ure iyyaha, cumu uca nua ttu elha disa xeni biyúcana.