Apocalipsis 15 - Zapoteco de Aloápam

Gasi ingeli dencabi gasi loo elha disa daa uyú ca benni

¹ Beleꞌeguabatia iyyabaaha attu senni xeni nu rebaninri atti rilenri na. Lheꞌe nu beleꞌetia nna bilátia gasi ingeli dencabi gasi lo elha disa daa uyú ca benni. Bedá ca elha disa-ni ute Tata Do Iyyabaaha leni ca benni qui lhuxa nu risaꞌanie.

² Beleꞌeguabatia ttu indattoo ancana attiba iyya guana selana gui. Roꞌo indattooha nna beleꞌetia seꞌe ca benni udácabi lo nimala biría lheꞌe indattooha, lo mentu anca attiba unnuha lhe lacabi nua bittu unnácabi tsia númeru gue lá nua lhe senni gue nua lhe cuerpu guecabi. Ca biꞌiniha nna dencabi ca arpa bete Tata Do Iyyabaaha len lacabi.

³ Nianna rulhacabi cantu bilha Moisés biꞌini bixuu lo sina gue Tata Do Iyyabaaha, cantu bilha Benni anque Carneꞌeha lhe rácabi: Xxeniba anca ca nu runlu, tsitsiba rebanintu atti rilentu cana xa Tata Do Iyyabaa Benni ra tsitsi leni, Lu ancalu Benni rinnabia ca benni seꞌe lheꞌe ca yiesi seꞌe yies lo yu, ancalu Benni runi nu anca lhixxa lhe nu anca gualí lhe.

⁴ Iyá rechaba ca benni gapacana lu respeto, xa Tata, iyárechaba ca benni cuequi xencana lelu lhe. Cumu sunruba lu ancalu Benni nari do riesi. Iyába ca benni seꞌe lheꞌe ca yies seꞌe itúba yies lo yu itacana udú xibicani lolu, cumu chiba beleꞌe lolu lu ancalu Benni runi elha uxtisi tsee.

⁵ Dequide unnuha nna begüiatteba, nianna beleꞌetia beali Atta Anca Leꞌaru do axta lhiꞌu gue yotu do iyyabaaha.

⁶ Lheꞌe yotuha nna biría gasi ingeli dencabi gasi lo elha disa nu uyú ca benni. Lacabi nna nucucabi ca lari tsee nu te láni lino ancana nari lhe ruꞌu xieni gueni lhe. Roꞌo lastoocabi nna xica ttu cinchu ancana leni oro.

⁷ Ttu ca nu delo ttapa ca nu baniha nna betebi len iyába gasi ca ingeliha ttuttu copa anca leni oro, sa ttitticana elha disa dhi ca benni de bisaꞌaxxattani Tata Do Iyyabaaha, Benni ttu tsaba doe.

⁸ Lheꞌe yotuha nna bisá tie seni gue nu ra xxeni lee gue Tata Do Iyyabaaha, gue nu ra tsitsi lee lhe. Tsaba nuttu nu te dhana gaꞌana lheꞌe yotuha axta liba chi guate ca benni iyá gasi ca elha disa che ca ingeliha.