Apocalipsis 14 - Zapoteco de Aloápam

Benni anque Carneꞌeha lenie ttu gayua yuꞌu chua yuꞌu ttapa mil (144.000) benni

¹ Lenla nna begüiaya, nianna beleꞌetia Benni anca Carneꞌeha due lo lhilhi lá Sión. Len Benniha nna seꞌe ttu gayua yuꞌu chua yuꞌu ttapa mil (144.000) ca benni. Lo xea ca biꞌiniha nna dia lá Benni anca Carneꞌeha, lá Tata gue Benniha lhe.

² Neti nna bienttebatia tsiꞌi ttu benni unnee iyyabaaha. Tsiꞌi Benniha nna bieni idisa attiba rieni tsiꞌi ttu yoo atta daxxatta idila inda, attiba atta ruꞌu be idisa lhe. Tsiꞌi bientia nna ancana attiba tsiꞌi ca arpa rulha leni ixeru ca benni.

³ Lacabi rulhacabi ttu cantu cubi lo atta du xxila do Benni rinnabiaha, lo ttapa ca nu baniha lhe lo ca benniolaha lhe. Tsa läganu te aca gueni cantuha. Sunruba ttu gayua yuꞌu chua yuꞌu ttapa mil (144.000) ca benni bodilá Tata Do Iyyabaaha atta seꞌe ca benni seꞌe yies lo yu, raca guecabi cantuha.

⁴ Ca biꞌiniha nna ancacabi nu tsa nuttu nu nuila belisacabi, denua nna ancacabi benni nari. Lacabi nna diacabi gaxaba dia Benni anca Carneꞌeha. Ca biꞌiniha nua ulá atta seꞌe ca benni seꞌe yies lo yu qui ucacabi úna primerba uxí Tata Do Iyyabaaha lenie Benni anca Carneꞌeha.

⁵ Ni ttu libe bittu ben lecabi. Benni nariba ancacabi lo Tata Do Iyyabaaha.

Tsunna ca ingeli rixxiꞌacabi nu aca

⁶ Beleꞌeguabatia ttu ingeli requibi lo be rulha xeaba gue lo bea-na, chebi ca tisa gue Jesús ca benni ttu dia liiba te lidhacaque qui quixxiꞌenbi ca benni seꞌe yies lo yu, iyáxeaba ca benni seꞌe lheꞌe iyába ca yiesi lhe iyáloba benni lhe ca benni rinne iyáloba tisa lhe.

⁷ Ingeliha nna rinnebi idisa rábi: ―Gualgapa Tata Do Iyyabaaha respeto, gualcuequi xeni lee lhe cumu chi bisía sá unie elha uxtisi. Gualudú xibile lo Benni benie iyyabaaha lhe yies lo yu lhe indattoo-na lhe ca roꞌo dina atta riyaa inda lhe.

⁸ Nu berupa ingeliha nna denottebabi rábi: ―¡Chi biseꞌe lo yiesi Babilonia! ¡Chi uluxa yiesi nu ra xxeni leniha! Anába te guatena cumu ca benni gueni beni biyieti iyáxeaba ca benni seꞌe lheꞌe ca yiesi seꞌe itúba yies lo yu nu satsa runna. Lana beni bedhá iqui ca benni Tata Do Iyyabaaha qui bedú xibicani lo ca nu bittu gualí anca diosi.

⁹ Denotteba ingeli beyonnaha rinnebi idisa rábi: ―Gansi nuxa udú xibini lo nimala biría lheꞌe indattoo-na leni mentu anca attiba unná lhe dhielhana cue senni gue unná ná derechu gueni o lo xeani lhe

¹⁰ unnuha nna dhína elha disa ute Tata Do Iyyabaaha de chi bisaꞌaxxattanie, attisiba nu tagaꞌa taꞌa lheꞌe copa den Ben-naba nua iꞌiyana. Tsitsiba satena uyúna elha disa tsiana lo gui, xxuana lo azufre qui itena lhe aní lo ca ingeli gue Ben-na, lo Benni anque Carneꞌe-na lhe.

¹¹ Seni riría gue atta yuꞌu ca nu yuꞌu lo elha disaha nna tsaba riría nua ttu dia liiba. Ttu tsaba bittu edí le ca nu uxí senni gue lá nimala biría lheꞌe indattooha, ca nu udú xibicani lo nua lhe lo mentu anca attiba unnuha lhe rela resába itecana.

¹² Larcala nna ca benni seꞌe riesi anca gue Tata Do Iyyabaaha, ca biꞌini rudocabi tisa gue nu rá Ben-na lhe ca biꞌini bittu rudhancabi ria lecabi Jesús lhe raca duelha tseꞌe tsitsicabi lo neda gue Ben-na.

¹³ Laniala nna bientia tsiꞌi ttu benni unnee iyyabaaha re neti: ―Beni lo sitsi nu innía-ni: “Bedá nnanna carbáru ca benni seꞌe leni Jesucristuha atti gatticana.” Espíritu gue Tata Do Iyyabaaha nna re: “Gualí galá, ca unná nna edí lecani gue sina bencana, lärgabi satecana. Gaxasná bedú lecani useꞌecana yies lo yu-ni nna deyyaba nua lencana.”

Juan beleꞌenbi chupa ca benni redícabi lena te yies lo yu

¹⁴ Atti begüiaya nna beleꞌettebatia ttu bea sitsi. Lo beaha nna do ttu benni ruleꞌe attiba ruleꞌe Benni unbiyuu daa iyyabaaha yuꞌu ttu corona anca leni oro iquie, denie ttu iyyarsela riaru roꞌoni.

¹⁵ Lheꞌe yotu do iyyabaaha nna biría attu ingeli ribesiꞌenbi idisaru benni do lo bea sitsiha, rábi benniha: ―Begaꞌa iyyarsela guelha lheꞌe xua xuxtila-na, chinca bedí Ben-na, cumu chiba bisía ura erú Ben-na. Lena bani te yies lo yu nna chiba ubisi ben-na.

¹⁶ Benni do lo bea sitsiha nna begaꞌattebe iyyarsela gueha yies lo yu qui bechúe lena bani te loni.

¹⁷ Lenla nna biría attu ingeli lheꞌe yotu do iyyabaaha, denguabi ttu iyyarsela ria roꞌoni.

¹⁸ Atta do becoaha nna biría attu ingeli banani gui. Biꞌin-ni nna unnebi idisa belisabi ingeli deni iyyarsela ria roꞌoniha rábi biꞌiniha: ―Bedaxxu iyyarsela ria roꞌoni guelha nna uchú ca resimu nalha lo ca ya besuli daa yies lo yu, cumu chiba ancacana ya.

¹⁹ Ingeliha nna begaꞌattebabi iyyarselaha lheꞌe ca ya besuli daa yies lo yu, atti uchúttebabi ca besuliha, nianna bedelhattebabi ca nua lheꞌe ttu yieru xeni atta ridí ca nua. Unní raxxína leni elha disa la tsuꞌubia ugüe Tata Do Iyyabaaha ca benni beni nu bittu anca tsee de risaꞌaxxattanie.

²⁰ Ca besuliha nna bidícana roꞌo yiesiha. Lheꞌe yieru atta bidí ca nua nna biría ttu yoo reni beꞌeyuna axta atta yuꞌu frenu yuꞌu roꞌo ca coayu. Attiba tu tsunna gayua (300) kilómetro udá lo reniha.