Apocalipsis 13 - Zapoteco de Aloápam

Nimala nu guatelaba ancana biría lheꞌe indattooha

¹ Neti nna udútteba lo yuxi re roꞌo indattooha. Nianna beleꞌetia biría lheꞌe indattooha ttu nimala xeni sia gasi chuettuiquini, a tsii sittiquini lhe. Iqui ttuttu ca sittiquiniha nna yuꞌu ttuttu corona. Lo xea ca choettuiquiniha nna dia ca tisa rinne güecana gue Tata Do Iyyabaaha.

² Nimala xeni nu beleꞌetia biría lheꞌe indattooha nna ancana attiba ttu besi te láni leopardo. Ca niꞌa nániha nna ancacana attiba niꞌa ná osu, roꞌoni nna ancana attiba roꞌo besi. Nimala xxegüiha nna benna aca nua nu ra tsitsi leni attiba lana, begüeena nua xxila atta ridona rinnabianaha lhe betena derechu len nua qui aca nua nu tsitsiba innabia lhe.

³ Iqui ttu ca choettuiqui nimala biría lo indattooha nna ruleꞌe anca ttu güee xeni, nu uni qui gattina, ttiaca beacaba güee nu anca uttin nua. Nianna iyába ca benni seꞌe yies lo yu bebanxxattaquinna gue nu ucaha, atti guanottebacana nua.

⁴ Ca benni nna bedútteba xibicani lo nimala xxegüiha de bete nua derechu leni nimala biría lheꞌe indattooha qui uca nua nu innabia, bedúguaba xibicani lo nimala biría lheꞌe indattooha lhe. Nianna rácana: ―Lärga nurua attu nimala do raru xxeni leni atti ra xxeni lee nimala biría lheꞌe indattoo-na, nuttuguaba nu te dhana loni lhe.

⁵ Tata Do Iyyabaaha nna begüeelhabe nimala biría lheꞌe indattooha benna ttaba lhe unne güena gue Benniha lhe. Uxíbana derechu unna anía chua yuꞌu chupa (42) beo.

⁶ Lana nna aníaba benna. Unne güena gue Tata Do Iyyabaaha lhe utúana balaꞌana gue Benniha lhe gue atta do Benniha lhe gue iyába nu seꞌe iyyabaaha lhe.

⁷ Uxíguana derechu itilhana lenna ca benni gue Tata Do Iyyabaaha, dhana locabi lhe. Uxíguabana derechu acana nu innabia iyáxeaba ca benni seꞌe lheꞌe iyába ca yiesi seꞌe itúba yies lo yu, iyáloba benni lhe ca benni rinne iyáloba tisa lhe.

⁸ Iyába ca benni seꞌe yies lo yu udú xibicani lo nimala biría lheꞌe indattooha. Ca unnuha nua desdeba atti ure yies lo yu bittu dia lácani lo libro gue benni anca Carneꞌe betticanaha. Lo libroha nua dia lá ca benni gatta elha nabani guecani ttu dia lii.

⁹ Atta rieninle nu ria-ni, gualudo nagale.

¹⁰ Ca benni gaꞌana tsiacana lisiyya nna labíaba tsia ca nua lisiyya, ca benni gaꞌana gatticana leni espada nna labíaba gatti ca nua leni espada. Larcala nna ca benni gue Tata Do Iyyabaaha raca duelha tseꞌetsitsicabi, bittu udhancabi ria lecabi Jesús lhe.

Nimala nu guatelaba ancana biría lhiꞌu yuha

¹¹ Dequide unnuha nna beleꞌetia a ttu nimala xeni nu guatelaba ancana biríana lhiꞌu yu. Unnuha nna sia chupa sittiquini ancacana attiba sittiqui carneꞌe, ttiaca tsiꞌini nna rienina attiba rieni tsiꞌi ttu nimala xxegüi.

¹² Nimala biría lheꞌe indattooha nna betena itúba derechu te gueni rinnabiana leni nimala biría lhiꞌu yuha qui ixuu nua loni. Nimala biría lhiꞌu yuha nna runna qui iyárecha ca benni seꞌe yies lo yu udú xibicani lo nimala biría lheꞌe indattooha, nu beaca güee xeni anca iquiniha, güee nu anca uttina unnuha.

¹³ Runguana ca milagru xeni runi reban leri lhe axtaba runna riría gui lo bea-na riyinnana yies lo yu aní lo benni.

¹⁴ Leni ca milagru begüeelha Tata Do Iyyabaaha na benna lo nimala biría lheꞌe indattooha nna uxí yiena ca benni seꞌe yies lo yu. Lana nna benna mandadu un ca nua ttu mentu anca atti anca nimala biría lheꞌe indattooha nu uca güee iquini leni espada, ttiaca beacabana.

¹⁵ Begüelhaguaba Tata Do Iyyabaaha nimala biría lhiꞌu yuha unna qui eyaca mentu anca attiba nimala biría lheꞌe indattooha nu bani, qui innee mentuha lhe unna gatti iyába ca nu bittu udú xibicani loni lhe.

¹⁶ Benguana mandadu cue senni ná derechu gue iyába ca benni seꞌe yies lo yu, o si lo xeacani lhe. Si ancacana nu ra xxeni leni lhe nu bittu ra xxeni leni lhe nu te gueni lhe nu bittu te gueni lhe nu ttoꞌo lo sina lhe nu bittu ttoꞌo lo sina lhe.

¹⁷ Unna qui tsa nuttu nu aca gueni uttoꞌona lhe goꞌona lhe gansi bittuba checana senni gue lá nimala biría lheꞌe indattooha o númeru gue lá nua lhe.

¹⁸ Ni reasa elha rieni. Nu te elha rieni gueni nna ebeana cuenta númeru gue nimala biría lheꞌe indattooha. Númeru gue unnuha nna ancana nu raxxína lá ttu benni. Númeruha nna ancana xxupa gayua yuꞌu gayuna yuꞌu xxupa (666).