Apocalipsis 12 - Zapoteco de Aloápam

Nuilaha lenna nimala xxegüiha

¹ Lo bea-na ucaxxe ttu senni xeni. Nía biría ttu nuila tsaba tubina tatubisa-na attisiba ben-naba anca xoni nucuna. Xa niꞌani nna do nanto beo-na, iquini nna yuꞌu ttu corona ancana leni tsiꞌinu beli.

² Nuila-ni nna nuja xiꞌinni. Lana nna ribesiꞌanina de ratena rutía lheꞌeni cumu ruyúna elha disa cuꞌu xiꞌinni.

³ Ucaxxeguaba attu senni lo bea-na. Nía biría ttu nimala xxegüi xeni, ancana xinaa, sia gasi iquini, sia tsii sittiquini lhe. Ttuttu ca iquiniha nna todhi ttuttu corona.

⁴ Leni xubanniha nna ure naꞌayana a saroꞌoba la uca yaba salhe ca beli sia lo bea-na, atti bedelhan cana lo yu. Nimala xxegüiha nna udúttebana lo nuila cuꞌu xiꞌinniha qui gona xiꞌini nua cuantusi galna.

⁵ Nuilaha nna uluꞌuna ttu unbiyuuto. Unbiyuutoha nna ancana nu tsitsiba unna innabiana ca benni seꞌe lheꞌe ca yiesi seꞌe yies lo yu. Ttiaca cuantusiba uli untoha nna bitúatteba nua deyyana besinna lo Tata Do Iyyabaaha, lo xxila atta doe rinnabie lhe.

⁶ Nuilaha nna bexunnittebana diana lo yu bisi, atta chi ancani Tata Do Iyyabaaha dhona. Cumu nía utecana nu gona itúba ttu mil yuꞌu chupa gayua yuꞌu gayuna (1.260) sá.

⁷ Lenla nna ucatteba ttu utilha iyyabaaha. Ingeli anca nu lo lá Miguel lenbi ca ingeli guebiha nna bitilhatteba lencabi nimala xxegüiha. Nimala xxegüiha lenna ca ingeli gueniha nna bitilha lencana Miguel,

⁸ ttiaca läga udá nimala xxegüiha lo ca biꞌiniha, bennittibacana. Lania nna lärga bisela gaxa tseꞌecana iyyabaaha.

⁹ Larcala nna uleaque nimala xxegüiha nía. Unnuha nua anca belha do axta ttuali, nu teeguaba láni nu xxegüi lhe Satanás lhe nu ridí yie iyába ca benni seꞌe yies lo yu. Lana lenna ca ingeli gueniha nna biruꞌunabacana yies lo yu.

¹⁰ Laniala nna bientia tsiꞌi ttu benni unnee idisa iyyabaaha re: Chi bisía sá odilá Tata Do Iyyabaa gueri-na ca benni, uleꞌe lo lee anque nu ra tsitsi lee lhe Benni rinnabia lhe. Chiguaba bisía sá uleꞌe lo, Cristu anque Benni te derechu guee innabie lhe cumu nu rudelhiyyana lo Tata Do Iyyabaa gueri-na rela resába ca benni ria lee Jesús, chiba biruꞌuna nua yies lo yu.

¹¹ Ca benni ria le Jesús nna bixuuquinbi reni belali Benni anque Carneꞌeha, ca tisa utixxiꞌacabi gue Ben-na lhe qui udácabi loni. Lacabi nna tsa bittu usquinbi gatticabi, berú iqui berúba lecabi elha nabani guecabi gatticabi.

¹² Larcala nna: “¡Bedaca lelu iyyabaa, lebiꞌi ca nu seꞌe-na lhe gualeꞌo lele! Ttiaca carusiꞌiru lebiꞌi ca nu seꞌe yies lo yu, lenle ca nu yuꞌu lheꞌe indattoo-na, cumu nu xxegüiha nna tsitsiba riseꞌenna guadina atta seꞌele-na de chi yuna bitturu isá reasa gueni.”

¹³ Atti utedaani nimala xxegüiha chiba biyinnana yies lo yu nna guanottebana nuila uluꞌu unto unbiyuuha.

¹⁴ Ttiaca nuilaha nna uxíttebana irupaba ca xxila ttu bedhía xeni qui aca dhuna uxunnina lo nimala xxegüiha, lana nna tsiana lo yu bisi atta chi gaꞌana isínna. Nía gutebacana nu gona delo tsunna ida nalha dhona nía.

¹⁵ Nimala xxegüiha nna beabittebana idilaru inda qui uca ttu yoo ujana nuilaha,

¹⁶ ttiaca yies lo yu-ni nna bodilábana nuilaha. Uꞌuyaba yies lo yu-ni inda beabi nimala xxegüiha.

¹⁷ De unnuha nna bisaꞌaxxattani nimala xxegüiha leni nuilaha. Nianna diattebana itilha lenna ca benni datía nuilaha. Ca biꞌiniha nua rudo tisa gue nu runi Tata Do Iyyabaaha mandadu aca, den tsitsicabi ca tisa utixxiꞌa Jesús lhe.