Apocalipsis 11 - Zapoteco de Aloápam

Tata Do Iyyabaaha idhelhe chupa ca benni quixxiꞌa ca tisa guee

¹ Dequide unnuha nna uxítteba las náya ttu iyyaxtila. Unnuha ancana nu rixuu ribixxibia. Nianna bientia tsiꞌi Tata Do Iyyabaaha re neti: ―Udulí nna güia guarixxibia yotu quia-na, lo becoa-na lhe. Belabaguaba balhaxa ca benni seꞌe ribequixxencabi lheꞌe yotu-na lhe.

² Ttiaca bittu urixxibialu lheꞌeliꞌa gue yotu-na, cumu chiba betea unná leni ca benni bittu ria lecani neti. Ca unná utsutsa uleacana yies quia-na chua yuꞌu chupa (42) beo.

³ Neti nna idhelhaguaba chupa ca benni qui quixxiꞌacabi ca tisa quia-na delo ttu mil yuꞌu chupa gayua yuꞌu gayuna (1.260) ubisa. Ca biꞌiniha nna ucu xo ttipa guecabi.

⁴ Irupaba ca biꞌini quixxiꞌa ca tisaha ancacabi attiba chupa ca yaga gue olivo lhe attiba chupa ca candeleru sia lo Tata Do Iyyabaa Benni banani yies lo yu lhe.

⁵ Gansi nuxa unna bixa udhaquinna ca biꞌin-ni nna iríatteba gui belha roꞌocabi qui tsaba uttecabi cana. Aná gatti nuxaba unna bixa udhaquinna ca biꞌin-ni.

⁶ Ca biꞌin-ni nna ancacabi nu ra xxeni leni. Lacabi nna guacaba guecabi ottocabi lo bea-na qui bittu aca iyya ittúttuba atti tsequicabi quixxiꞌacabi gue Tata Do Iyyabaaha. Dhaguabacabi eyoncabi inda-na reni lhe utecabi ixe loba elha disa gue iyába nu seꞌe yies lo yu lhe balhaxaba libe raca lecabi.

⁷ Ttiaca gansi chi uluxa guecabi utixxiꞌacabi nna nimala xeni nu guatelaba ancana iría lheꞌe belea chulhaha nna ttilha lena cabi. Unnuha nna dhaba nua locabi, nianna utti nua cabi.

⁸ Ca cuerpu gue ca benni yattiha nna níaba dhuꞌuya ca nua lo neda te lheꞌe yiesi ra xxeni leniha atta betácana lo ya crusi Benni bananie cabi. Yies-ni nna rutácanie na Sodoma nna Egipto nna.

⁹ Delo tsunna ubisa nalha nna iyáloba benni lhe ca benni rinne iyáloba tisa lhe iyáxeaba ca benni seꞌe lheꞌe iyába ca yiesi seꞌe itúba yies lo yu lhe iláquinna ca benni yattiha. Lacana nna bittu ugüelhacana igatsi ca biꞌiniha.

¹⁰ Ca benni seꞌe yies lo yu nna tsitsiba edaca lecani de utti ca biꞌiniha. De eyoꞌoba lecani nna cuentaba ute leni loescani ttu bixa te guecani cumu irpaba ca profeta ucacabi nu bete elha disa guecani.

¹¹ Ttiaca dequide ute tsunna ubisa nalha nna benitteba Tata Do Iyyabaaha beacani ca biꞌiniha. Ca biꞌiniha nna guadhattebacabi beseꞌe racabi. Iyába ca nu biláquinna ca biꞌiniha nna usilha usi juisiabaquinna.

¹² Ca biꞌiniha nna bienttebaquinbi tsiꞌi ttu benni unnee idisa iyyabaaha li re cabi: ―Gualtsopi nii. Ca biꞌiniha nna gopittebacabi iyyabaaha lheꞌe ttu bea, aníba lo ca nu bittu uca uyúcan ca biꞌiniha.

¹³ La uratteba nna bixú lha bixú juisiaba, larcala nna tsii gue delo ttu ttu gayua ca yoꞌo sia lheꞌe yiesiha biseꞌe lo. Gasi mil benni utti. Iyába ca nu beꞌana bittu uttiha nna rasi juisiabaquinna rácana Tata Benni Do Iyyabaaha: “¡Lu ancalu Benni ra xxeni leni!”

¹⁴ Chiba ute elha disa berupaha, nnanna nna chi tte daa ribiga isía elha disa beyonna.

Unní uca atti becuesi attu ingeliha nu uca gasi trompetaha

¹⁵ Atti becuesi nu uca gasi ingeliha trompeta denbiha nna bientteba tsiꞌi ca benni unne idisa iyyabaaha ráque: Yies lo yu-ni nna bisíaba sá acana atta innabia Tata Do Iyyabaaha Benni bananie ri, lenie Cristu benni chi gaꞌananie odile ca benni. Labe innabie ttu dia lii.

¹⁶ Lania nna iyába ttapa erúa (24) ca benniola sia lo xxila seꞌe lo Tata Do Iyyabaaha, biachucabi axta liba binna lo xeacabi lo yu, nianna ulequi xencabi le Ben-na,

¹⁷ atti rácabi: Xquixabalu xa Benni bananie riꞌitu, lu ancalu Tata Do Iyyabaa Benni ra tsitsi lelu. Ancalu Benni ttu dola lhe benni do nnanna lhe. Lu nna chiba bedí ladilu qui acalu nu rinnabia ra tsitsi leni, chiba udú lolu rinnabialu lhe.

¹⁸ Ca benni seꞌe lheꞌe ca yiesi seꞌe itúba yies lo yu bisaꞌaxxattaquinna len luu, ttiaca chiguaba bisía sá atti utelu elha disa ralhacana dhicana, atti unlu elha uxtisi gue ca nu yatti-na lhe. Lania nna utelu nu tsee ralha ca profeta bixuu lo sina guelu dhicabi, uteguabalu nu tsee ralha ca benni chi seꞌe riesi anca guelu dhicabi lhe ca benni rapacabi lu respeto lhe si ancacabi nu ra xxeni leni o si nu bittu ra xxeni leni lhe. Lania nna ulhuxalu ca nu rutseꞌe lo nu te yies lo yu.

¹⁹ Nianna bealitteba yotu gue Tata Benni Do Iyyabaaha. Lheꞌe yotuha bilá xua iꞌina atta yuꞌu ca sitsi atta dia ca tisa bodhaꞌan tsitsie leni ca benni Israel. Lania nna gopitteba edha, uyuꞌu be lhe utsá lhe bixú lhe urexxatta iyya lhe.