Apocalipsis 10 - Zapoteco de Aloápam

Ingeli deni sitsi güexxaha

¹ Beleꞌeguabatia attu ingeli ancabi benni ra xxeni lee biríabi iyyabaaha dabi guadibi tubibi ttu bea. Iquibi nna du ttu arco iris, lobi nna riguꞌuna xieni attiba tatubisa-na, ca niꞌabi nna ancacana attiba belha gue gui.

² Las nábi nna yuꞌu ttu sitsi güexxa du yali loni. Niꞌa derechu guebi nna bedúbi lo indattoo-na, niꞌa rabesa guebi nna bedúbi lo yu.

³ Biꞌin-ni nna uresiꞌabi idisa attiba tsiꞌi ttu besi gansi chi rutuxxuna. Atti uresiꞌabi nna bieni gasi ca tsiꞌi diu.

⁴ Dequide chi ute bieni ca tsiꞌiha nna neti nna bedo tseetteba qui unia lo sitsi nu bientiaha, nianna bienttebatia tsiꞌi ttu benni unnee iyyabaaha re neti: ―Bittu quixxiꞌalu nu bieninlu atti unne gasi ca diu, bittu unlu na lo sitsi.

⁵ Ingeli beleꞌetia du ttu lhaꞌa niꞌabi lo indattooha nna attu lhaꞌa niꞌabi du lo yu nna ulhidhatteba ná derechu guebi daca lo bea-na,

⁶ atti bodhaꞌan tsitsittebabi tisa lo Benni do ttu tsaba, Benni beni lo bea-na lhe yies lo yu lhe indattoo-na lhe iyába nu seꞌe locani lhe rábi: ―Lärga birua isá reasa isía sá aca unní.

⁷ Gansi chi bisía sá ucuesi nu aca gasi ingeliha trompeta denbiha nna lania nna uni Tata Do Iyyabaaha nu chi gaꞌananie aca, nu bittu chi yu benni, attiba chi re ca profeta bixuu lo sina guee.

⁸ Nianna bedeyien dacabatia tsiꞌi benni unnee iyyabaaha belise neti attu libe re: ―Güia guadaxxu sitsi yali loni deni ingeli du ttu lhaꞌa niꞌabi lo indattoo-na attu lhaꞌa niꞌabi nna du lo yu.

⁹ Neti nna güiatteba atta du ingeliha guayúa bi utebi sitsi güexxaha len neti. Labi nna rábi neti: ―Nina te-ni. Bedaxxu na nna utotte na. Roꞌolu nna ettinlu na xixxi attiba besintoo, lhiꞌu lheꞌelu nna eyacana ilhá yatoo.

¹⁰ Laniala nna bedaxxua sitsi güexxa deni ingeliha utoa. Roꞌa nna bettitiana xixxi attiba besintoo, ttiaca dequide chi utoa nua nna beacatteba nua ilhá yatoo lhiꞌu lheꞌa.

¹¹ Nianna bientia rá ttu benni neti: ―Raca duelha quixxiꞌalu attu libe gue nu chi gaꞌana sate ixeru ca benni seꞌe lheꞌe ca yiesi seꞌe yies lo yu, ca benni rinne iyáloba tisa lhe ca nu rinnabia seꞌe yies lo yu lhe.