3 Juan 1 - Zapoteco de Aloápam

¹ Neti Juan biꞌini chi anca benniola, ridhelha sitsi-ni guelu, xa biꞌini lá Gayo. Neti nna gualíga racatia guelu.

Gayo ancabi biꞌini du tsee lebi

² Xa benni ria le Jesús, racatia guelu, rinnaba len Tata Do Iyyabaaha qui attiba do tseelu len Benniha nna aníaguaba salía tseen lu leni iyába nu runlu, dho tseelu bittu bi dhacalu lhe.

³ Beꞌolhaba lasia atti utixxiꞌen ca benni ria le Jesús bita-ni neti, lu nna gualíba du tsitsi lu lo neda gue Tata Do Iyyabaaha, rudolu tisa gue nu anca gualí rixxiꞌa ca tisa gue Ben-na lhe.

⁴ Bitturu attu bixa te unna eyoꞌoxxatta lasia, atti reꞌo lasia runa ca benni ancacana attisiba xiꞌinba, seꞌecana rudocana tisa gue nu anca gualí rixxiꞌa ca tisa gue Tata Do Iyyabaaha.

⁵ Benni ria le Jesús, racatia guelu, tsee juisionna runlu runlu yuda adí ca benni ria le Jesús. Lu nna chi rerlu balaꞌana runlu aná leni ca benni dittu bittu anca bienlu.

⁶ Lacabi nna chi utixxiꞌacabi lo iyába ca benni ria le Jesús ritupa-ni, lu nna ancalu ttu benni racaxxattinlu gue ca benni. Benchicabi yuda leni nu reasaquinbi qui usiguicabi neda guecabi. Aná beni attiba reꞌo le Tata Do Iyyabaaha.

⁷ Cumu lacabi nna biríacabi diacabi rixxiꞌacabi ca tisa gue Jesucristu. Ca biꞌin-na nna bittu ridícabi ni saroꞌo nu te gue ca benni dittu bittu ria lecani Tata Do Iyyabaaha.

⁸ Denua nna riꞌi daa lori uteri nu reasaquinbi. Aná nna riselari lheꞌe sina runcabi-na requicabi rixxiꞌacabi nu anca gualí gue Tata Do Iyyabaaha.

Nu beni Diótrefes

⁹ Neti nna chi benia lo ttu sitsi udhelha gue ca benni ria le Jesús ritupa naa, ttiaca Diótrefes-na de rdacaxxattana acana nu lo qui innabiana, nuarca bittu rudo nagani guetu.

¹⁰ Larcala nna gansi neti ita atta seꞌele-na, lania nna quisaba na de biaca runna aná, cumu de requina rinne güena guetu. Lana nna bittu raca xen leni runna aná, bittuguaba rulabina ca benni ria le Jesús requi rixxiꞌa ca tisa gue Ben-na risina lheꞌe lisni lhe lä rugüelhaguabana ca benni echecabi ca biꞌin-na lheꞌe liscabi lhe lana nna ruríalattebana ca biꞌini reche ca biꞌin-na, bitturu rugüelhana iselacabi ca benni ria le Jesús.

¹¹ Xa benni ria le Jesús, racatia guelu, bittu unlu nu lä anca tsee run attu nu subi, beni nu anca tsee. Cumu nu runi nu anca tsee nna gue Tata Do Iyyabaahaba anca unnuha. Nu runi nu lä anca tseeha nna läga chi anca bien nua Tata Do Iyyabaaha.

Demetrio ancabi ttu benni runi nu anca tsee

¹² Biꞌini lá Demetrio nna iyába ca benni rinnetseecana guebi. La nu tsee runbi naba ruleꞌe lo ancabi benni tsee. Anáguaba riꞌitu, ráguabatu, labi ancabi benni tsee. Lebiꞌi nna gua yubale riꞌitu nna rinnebatu nu anca gualí.

Ni riluxa run Juan lo sitsi-ni

¹³ Ixeru nu racatia upea lu, ttiaca bittu raca lasia unia na lo sitsi,

¹⁴ cumu neti nna xen lasia gaxa uyúba loesri, qui inne lania cuinaga luu.

¹⁵ Ca benni ancabienlu seꞌe-ni ridhelhacabi ttu padiuxi guelu. Anáguaba luu, bete ttu padiuxi guetu len ttuttu ca benni ancabienri seꞌe atta dolha. Tata Do Iyyabaaha aca lanie lu qui dholu xen su lee.