2 Timoteo 4 - Zapoteco de Aloápam

¹ Aní lo Tata Do Iyyabaaha lhe lo Jesús Benni anque Cristu chi gaꞌana esíe innabie, qui unie elha uxtisi gue ca benni chi uttina lhe gue ca benni seꞌe bani lhe rinnaba lenlu,

² duelha beni utixxiꞌa ca tisa gue Cristu, atti udo nagacani guelu lhe atti bittu raca lecani udo nagacani guelu lhe. Leni pasensi utixxiꞌaquinna gue nu bittu anca tsee runcana, utisacana lhe bettipa lecani lhe lhatsiru beleꞌequinna.

³ Cumu chi isía sá atti bitturu aca le ca benni udo nagacani ca tisa gue Cristuha rixxiꞌa gue nu anca gualí ruleꞌeri. Lacana nna unbacana nu ridá lecani, tsialacana satilacana ixe ca nu uleꞌequinna cana attiba reꞌoba lecani.

⁴ Bitturu udo nagacani gue ca tisa rixxiꞌa nu anca gualí, gue ca cuentu otsiꞌinu le ca benni la udo nagacani.

⁵ Ttiaca lu nna Timoteo, uca ttu benni ridána rinnabia elha rieni gueni, bittu bitti unlu. Uchíalu lo ca elha disa daa uyúlu. Utixxiꞌani ca benni ca tisa gue Jesús. Lhatsiru beni sina bete Tata Do Iyyabaaha unlu.

⁶ Cumu neti nna chi dabiga utticana neti. Elhutti quiaha nna ancana attiba ttu úna dhi Tata Do Iyyabaaha.

⁷ Neti nna itú iqui itú lasia besiguiba lo neda gue Tata Do Iyyabaaha. Udába lhuxatia sina betee len neti, tsa bittu bedhequia ria lasia Cristuha lhe.

⁸ Denuala nna chiba tua tsee ttu corona quia, delába elha tsee nu ridí ca benni runi nu anca tsee lo Tata Do Iyyabaaha. Benniha nua ute Jesús Benni anque Cristu len neti gansi chi bisía sá unie elha uxtisi lhatsiru gueri. Läga suntteru neti unne Benniha quia, uteguabe Benniha gue iyába ca benni seꞌe ribeda esíe.

Pablo rixxiꞌenbi Timoteo nu dica unbi

⁹ Duelhaba beni utáttegaba bettenalhi neti,

¹⁰ cumu Demas nna de ridárba leni nu te yies lo yu-ni nna nuarca bodhaꞌanna neti nna deyyana lheꞌe yiesi Tesalónica. Crescente nna daca lo yu te láni Galacia la diabi, Tito nna diabi daca lo yu te láni Dalmacia.

¹¹ A sunruba Lucas gua dorbi len neti. Uchechi Marcos nna utá lenbi-ni, cumu tseeba ixuutia bi quixxiꞌabi ca tisa gue Jesús.

¹² Tíquico nna udhelhaba bi lheꞌe yiesi Éfeso.

¹³ Gansi chi dalu nna ttelu lheꞌe yiesi Troas qui ujalu gabana quia bocaꞌana lheꞌe yoꞌo gue Carpo. Ujalu ca libro quia ca benni dia tisa gue Tata Do Iyyabaaha loque, ca nu reasa ttetia nna ca libro anca leni yietiha.

¹⁴ Alejandro nu raya iyya ruꞌu lo gui-na, tsitsiba nu chi bedhacana neti. Cuinaba Benni bananie ri-na ugüena elha disa gue nu benna.

¹⁵ Anáguaba lu, Timoteo, cuidadu bedo leni unná cumu tsitsiba chi bedú disana lo ca tisa gue Jesús rixxiꞌari-na.

¹⁶ Atti primerba betsá dua lo ca uxtisi-na qui unia exúa nna niba ttu ca benni ria le Jesús bittu useꞌe len neti, iyábacabi bedhá iquicabi neti. Tata Do Iyyabaaha aca lenie cabi qui bittu bi satecabi de aníala bencabi.

¹⁷ Ttiaca Benni bananie ri-na udúbe len neti, bedú tsitsie neti lhe qui udáya utixxiꞌaya ca tisa gue Cristuha. Anía liba nna qui bienini iyába ca benni bittu anca benni Israel ca tisa-ni. Lee nna bodilábe neti lo ná ca benni attiba ttu nu rilá lo besi.

¹⁸ Laba Cristuha odile neti lo iyá nu lä anca tsee, echeguabe neti atta rinnabie iyyabaaha lhe. ¡Lee anque Benni ra xxeni lee ttu dia lii! [Amén].

¹⁹ Bete ttu padiuxi quia leni Prisca-na lhe Aquila-na lhe anáguaba leni iyába ca benni seꞌe lheꞌe yoꞌo gue Onesíforo.

²⁰ Erasto nna beꞌanbabi lheꞌe yiesi Corinto, Trófimo nna ranba biꞌiniha, níaba bodhaꞌana bi lheꞌe yiesi Mileto.

²¹ Utattegaba antisla isía ca sá aca idilha. Eubulo lhe Pudente lhe Lino lhe Claudia lhe iyába ca benni ria le Jesús seꞌe-ni ridhelhacabi ttu padiuxi guelu.

²² Cuina Jesucristu, Benni bananie ri dhue lenlu. Tata Do Iyyabaaha aca lanie lu. Amén.