2 Timoteo 3 - Zapoteco de Aloápam

Aní un ca benni gansi chi deoba sia sá esía Jesús

¹ Timoteo, racaguaba duelha unalu gue nu innía-ni, cumu gansi chi deoba isía sá atti esía Jesucristuha nna tsitsiba nu sate ca benni.

² Lania nna tseꞌe ca benni ca nu suntteba gue nu anca guecani ulaba lecani: ca nu dha lecani belhi-na lhe ca nu ttaba lhe ca nu uni dequi ancacana nu ra xxeni leni lhe ca nu inne güeecana gue adí ca benni lhe ca nu bittu udocana tisa gue bixa ga tata nan guecaniha cana lhe ca nu niba xquixarulu lä gacana benni lhe ca nu bittu gapacana respeto Tata Do Iyyabaaha lhe niguaba nu anca guee lhe

³ ca nu bittu satúa lecani adí benni lhe ca nu bittu dhicana elha xen lasi gue adí ca benni lhe ca nu uncana xiyya gue ca benni lhe ca nu uncana nu racaba lecani lhe ca nu udhaca disaxxattacana ca benni lhe ca nu bittu aca uyúcana nu anca tsee lhe

⁴ ca nu lä lattebacana bixa udhacacana ca benni seꞌe tsee lencana lhe ca nu eyaxani uni nu racaba lecani lhe ca nu uni ttaba lhe ca nu udorlana lecani uncana nu reꞌoba lecani anca gue yies lo yu-ni attichula acaquinna gue Tata Do Iyyabaaha lhe.

⁵ Ca unnuha nna unicana dequi ancacana nu ria yotu runi nu anca gue Tata Do Iyyabaaha, ttiaca nu uncanaha uleꞌe lona lacana nna läga gualíquinna ria lecani Ben-na. Lu nna tsa bittu igutsalu ca nu runi aná.

⁶ Cumu ca unnonna rattaꞌacana lheꞌe ca yoꞌo raxxí yiecana ca nuila ridielha rixú yie runi iyáloba nu bittu anca tsee, ca loesi ca nuila-na nna ttu dia liiba diacana runcana iyába nu satsa raca lecani.

⁷ Ca unná guabunna satíaba diacana rudheticana attu nu subi, ttiaca tsa läga rdacana ttedaaquinna gaxa te nu anca gualí.

⁸ Attiba beseꞌe disa Janes lenna Jambres lo Moisés, anáguaba reseꞌe disa ca benni loesi ca unná lo ca tisa rixxiꞌa nu anca gualí. Lacana nna ancacana benni rulaba lecani nu bittu anca tsee, lärga ria lecani Tata Do Iyyabaaha atti dica tsia lecani Ben-na, cumu chiba biriescana lo neda gue Ben-na.

⁹ Ttiaca läga dhacana uncana aná isá, cumu guate daabani benni guecani ancacana nu lä caa xieni gueni. Aníaba guate ca nu beseꞌe disa lo Moisés.

Pablo rulisabi Timoteo usigui bi unbi iyába nu chi bidetibi

¹⁰ Ttiaca lu nna Timoteo, chiba yuxeabalu gue iyába nu ruleꞌa, gue gaxasná du lasia lhe gua yubalu bi nua raca lasia unia lhe gue gaxasná ria lasia Jesús lhe gue anca benni du pasensi leni lhe gue gaxasná racatia gue adí benni lhe gue gaxasná ruchíaya lo nu ratea lhe

¹¹ gue gaxasná deno ca benni neti rdacacana utticana neti lhe gue gaxasná ruyúa elha disa lo nu rudhacacana neti lhe. Lu nna gua yubalu gue iyába nu guatea lheꞌe yiesi Antioquía, lheꞌe yiesi Iconio lhe lheꞌe yiesi Listra lhe. Lo iyába ca elha disa biyúha nna bodilába Tata Do Iyyabaaha neti.

¹² Gualíba, iyába ca benni raca lecani uncana nu ruꞌu le Jesús Benni anque Cristu, satecana uyúcana elha disa cumu bitturu aca uyú benni cana.

¹³ Ttiaca ca benni lä du ta lequinna lhe ca nu requi uxí yiena lhe ttu diaba ca unná runcana adí nu bittu anca tsee, ridí yiecana benni lhe rixú yiecana runcana aná lhe.

¹⁴ Lu nna Timoteo, besigui güia lelu gue nu chi bidetilu, gue nu chi xen lelu anca gualí lhe cumu gua yubalu nuxa gue bidetilu,

¹⁵ anáguaba atti ancalilu güexxa chi yulu nu rá lo ca sitsi gue Tata Do Iyyabaaha, ca ben-na ruteque elha rieni guelu qui lhálu de ria lelu Jesús Benni anque Cristu. Anía nna bittu tsia nittilu.

¹⁶ Iyába nu rá lo ca sitsi gue Tata Do Iyyabaaha ancaque nu biría lheꞌe iqui Tata Do Iyyabaaha, ancaque benni rixuu ruleꞌecanie ri nu anca gualí lhe risáque ri lhe roseꞌe lhixxaque ri gansi rinittiri lhe ruleꞌecanie ri gaxasná tseꞌe tseeri len Tata Do Iyyabaaha lhe

¹⁷ qui anáchu benni chi anca gue Tata Do Iyyabaaha nna acabi ttu benni chi bideti tsee qui unbi iyá nu anca tsee.