2 Timoteo 2 - Zapoteco de Aloápam

Pablo rulisabi Timoteo uchíabi lo ca elha disa ruyúbi

¹ Lu, xa Timoteo, lu ancalu attisiba xiꞌinia, tsitsi udú cumu Jesús Benni anque Cristu raca lanie lu.

² Ca tisa bieninlu unnea aní lo ixeru benni, unnuha beleꞌeni adí ca benni ruxxen lelu guecani, ca nu rudhaca lelu aca guecani uleꞌequinna adí ca benni.

³ Attiba ttu soldado rutsá duna lo nu ratena, aníaguaba lu, bechía lo ca elha disa ruyúlha de ancalu benni baba len Jesús Benni anque Cristu.

⁴ Ttu benni biaxina acana soldado nna läga dica un nua attu sina subi. Sunruba sina daa lo nua unna anía liba nna eyoꞌo lee soldado anca nu loha gue nua.

⁵ Anáguaba ttu benni sela lheꞌe ca nu ritta, läga dhi nua nu ralhana gue nu dhana iganna gansi bittuba udona tisa unna iyá nu gaꞌana unna.

⁶ Benni ruttipa leni ribenna sina lo ca yu-na, primerba unnuha ralhana dhína lena ute ca lo yu-na.

⁷ Belaba tsee lelu gue iyá nu ria-ni, Benni bananie ri-na, guacaba lanie lu qui sadú tsee lelu iyá.

⁸ Exxa lelu Jesucristu, benni datía David. Benniha nua belhidha Tata Do Iyyabaaha lheꞌe baa atta yuꞌu ca nu yatti-na. Gue unnuonni requia rixxiꞌaya.

⁹ Lo niꞌa gue de rixxiꞌaya ca tisa-ni nna ratea ruyúa elha disa tea lisiyya-ni, axtaba len cadena xicaquinna neti attiba ttu nu beni elhutti, ttiaca tisa gue Tata Do Iyyabaaha nna läga xica benna len cadena atti xicaquinna neti, larcala guacaba quixxiꞌa benni ben-na.

¹⁰ Lo niꞌa gue unnua nna gua ruchíaba lo iyába nu ratea de runia qui salía tseena ca benni chi becuee Tata Do Iyyabaaha, qui anáchu nna lhácabi bittu tsia nnitticabi. Aná nna gatta elha nabani gaꞌana tsee guecabi ttu dia lii, de chi ancacabi benni re cuenta leni Jesús Benni anque Cristu.

¹¹ Tisa anca gualí ben-ni rinnea: Gansi riꞌi ancari nu chi utti leni Jesús, anáguaba tseꞌeguabari lenie iyyabaaha.

¹² Gansi dhari uchíari lo elha disa ruyúri nna anáguaba innabiaguabari leni Ben-na. Gansi innári dequi bittu anca bienrie nna anáguaba lee innáguabe lo Tata Do Iyyabaaha dequi bittuguaba anca bienie ri.

¹³ Masquiba riꞌi bittu runri nu rinneri, ttiaca Benniha nna satíaba runie nu rinnee, cumu tsa läga dica otsia Ben-na ca tisa chi unnee.

Pablo rulisabi Timoteo unbi duelha unbi nu ruꞌu le Tata Do Iyyabaaha

¹⁴ Borexxa le adí ca benni ca tisa-ni. Gus cana aní lo Tata Do Iyyabaaha bitturu itilha tisacana lo niꞌa gue ca tisa nu bittu rixuu, cumu tsa lägabi ixuu nu runcana, sunruba run nua qui bitturu tsia le ca benni rienini guecani. Unnuha uni tsia nitti ca unnuha.

¹⁵ Beni duelha beni nu tsuꞌu le Tata Do Iyyabaaha attiba ttu benni riben tsee sina nu bittu bi te bixa lo niꞌa gue ettuinna beleꞌetseeni ca benni ca tisa rixxiꞌa nu anca gualí-na lhe.

¹⁶ Bittu udo nagalu gue ca benni rinnecana ca tisa lä dica ixuꞌu anca gue yies lo yu-ni, cumu sunruba rixuu unná qui runna ttu ttu sába dia benni runcana adí nu bittu anca tsee lo Tata Do Iyyabaaha.

¹⁷ Ca tisa ruleꞌe ca unná nna runnitticana ca benni, attiba ttu isagüe nu rudusuna lo güee gue ttu benni axta liba gattina. Ttu ca nu rinne loesi ca tisana nna lána Himeneo, lenna Fileto.

¹⁸ Lacana nna chi biriescana lo neda gue Tata Do Iyyabaaha, lärga ruleꞌecana nu anca gualí, requilacana rinnecana rácana dequi nucala ute atti beacani ca nu yatti-na, leni ca tisa rinnecan-na rucannacana iqui ttu lhe benni, nuarca bitturu ria tsee lecani Jesús.

¹⁹ Ttiaca Tata Do Iyyabaaha nna chiba bocaꞌan tsitsie ca tisa rixxiꞌe gue nu anca gualí runi seꞌe tsitsiri, lee anque attiba ttu cimientu atta dia loni rixxiꞌia rá: “Anca biasani Tata Do Iyyabaaha ca benni anca guee.” Ráguaba: “Iyába ca biꞌini rácabi ancacabi gue Cristu, iriescabi lheꞌe nu lä anca tsee.”

²⁰ Lheꞌe ttu yoꞌo xxeni nna läga suntteru trasti anca leni oro lhe nu anca leni plata lhe seꞌe nía, seꞌeguaba nu anca leni yaga lhe nu anca leni guna lhe. Ttulhecana rixuucana gansi chi te ttu laní, a ttulhecana rixuucana ttu ttu sába.

²¹ Larcala nna gansi nuxa ttu benni bitturba bi runna nu lä anca tsee nna biꞌiniha nna ancabi ttu benni chi do riesi qui ixuubi lo Tata Do Iyyabaaha, attiba ttu trasti anca leni oro o leni plata chi riesi qui ixuuna, anía anca benni chi do riesi qui ixuubi unbi iyába nu anca tsee.

²² Betsiatta lo nu bittu anca tsee ridá le ca uncuiti-na uncana. Bedo lelu beni nu anca tsee lo Tata Do Iyyabaaha, güia lelu Jesucristuha lhe uquin gue adí benni lhe lhatsiru udo leni adí benni lhe. Aná beni leni ca benni chi anca nari lheꞌe lastoocabi rinne leni Tata Do Iyyabaaha.

²³ Bittu udo nagalu gue ca benni rinne nu lä dica ixuu. Lagua yubalu nna suntterba rilunna ritilha tisa len loes benni.

²⁴ Cumu benni runi sina gue Benni bananie ri-na, läga dica tsequi biꞌiniha utilha. Nu unlabi nna acalabi ttu benni un tseebi leni iyába benni, acabi ttu benni raca guebi ruleꞌenbi ca benni lhe ttu benni uchíabi lo nu satebi lhe.

²⁵ Leni tisa tsee ecabibi gue ca nu reseꞌe disa lo nu anca gualí, qui nicaga gunba Tata Do Iyyabaaha exiyyaquinna udaxxucana neda gue Ben-na qui un biacana nu anca gualí.

²⁶ Lania nna ttedaaquinna qui uxunnicana lo ná nu xxegüiha. Cumu unnuhaba denna cana anquinna cana attiba ttu nu te lisiyya qui runcana nu racaba le nua.