2 Timoteo 1 - Zapoteco de Aloápam

¹ Neti Pablo, anca apóstol gue Jesucristu, Tata Do Iyyabaaha beda lee bodúe neti qui aca benni quixxiꞌatia ca benni gue nu chi re unie, lee nna chi begüee tisa unie gatta elha nabani gueri ttu dia liiba de chi ancari benni ria le Jesús Benni anque Cristu.

² Na ridhelha sitsi-ni atta dolha, xa Timoteo. Neti nna racatia guelu, cumu lu nna ancalu attiba ttu xiꞌinia. Rinnaba lo Tata gueri do iyyabaaha, lenie Jesucristu Benni bananie ri, aca lenque lu lhe satúa leque lu lhe unque dholu lhatsiru lhe.

Pablo rulisabi Timoteo bittu ettuinbi quixxiꞌabi ca tisa gue Jesús

³ Rutea xquixaru len Tata Do Iyyabaaha, Benni runia sina guee itú iqui itú lasia cumu bittu bixa te ruquiꞌana quia loe. Ca benniola quia useꞌe axta atti níali aníaguaba bencabi. Rela resába atti rinnea len Tata Do Iyyabaaha nna satíaba rexxa lasia lu.

⁴ Atti rexxa lasia yade ribesluha nna rdacalhaba uyúa lu. Neti nna eyoꞌo tsitsia lasia gansi chi bilátia lu.

⁵ Rexxaguaba lasia, lu nna gualíbinlu itú iqui itú lelu ria lelu Cristuha. Primertteba nan xen guelu Loida güia lebi itú iqui itú lebi, anáguaba nan guelu Eunice lhe. Neti nna xenba lasia aníaguaba ria lelu.

⁶ Larcala nna rorexxa lelu, bettipa lelu bixuuni elha tsee bete Tata Do Iyyabaaha len lu atti bexxúa náya iquiluha qui acalu benni uni sina gue Ben-na.

⁷ Cumu läga bete Tata Do Iyyabaaha Espíritu guee-na len riꞌi qui acari nu rasini. Betebe Espíritu guee-na len riꞌi qui acari nu re tsitsi leni, qui acari nu siꞌi le lhe qui acari nu aca gueni innabia elha rieni gueni lhe.

⁸ Denuala nna bittu ettuinlu quixxiꞌalu ca tisa gue Benni bananie ri-na, lä ettúguabinlu quia de tea lisiyya lo niꞌa gue de rixxiꞌaya ca tisa gue Ben-na lhe. Delába unnuha nna betto bechía lo nu satelu de rixxiꞌalu ca tisa gue Jesús, attiba neti rutto ruchíaya. Tata Do Iyyabaaha nna guacaba lanie lu.

⁹ Laguabe bodile ri qui bittu tsia nittiri, uxie ri qui iriesri lheꞌe nu lä anca tsee lhe. Läga de benri ttu nu anca tsee nuarca uxie ri, uxbe ri cumu aníaba chi gaꞌananie unie. Atti deobali cue yies lo yu-ni, laniali nna boquinna iquie aca lani Jesús Benni anque Cristuha riꞌi.

¹⁰ Atti udhelhe Jesucristu Benni bodile ri, lania beleꞌe loe nu tsee runie len riꞌi. Benniha nna benie qui bitturu dha elhuttiha uttinri ttu tsaba. Nianna ulequie lolia, riꞌi nna gansi tsia leri Jesucristuha lania nna gatta elha nabani gueri ttu dia liiba, lärga gattiri ttu tsa.

¹¹ Tata Do Iyyabaaha bodúe neti qui aca benni quixxiꞌa ca tisa-ni, aca apóstol lhe benni uleꞌeni ca benni bittu anca benni Israel-na lhe.

¹² Lo niꞌa gue unnuha nna ratea iyába nu ratea-ni. Ttiaca tsa lägabi rettutia, cumu yuxeaba nuxa anca Benni ria lasia. Neti yua nna anque ttu Benni ra xxeni leni, lee nna guagua tseebe elha nabani quia-ni nu chi bodhaꞌana las nee axta atti isía sá utsá dua loe.

¹³ Besigui beni nu tsee anca gualí chi beleꞌetia lu, güia lelu Jesús Benni anque Cristu, uquin gue ca benni lhe de chi ancalu benni baba leni Ben-na.

¹⁴ Espíritu gue Tata Do Iyyabaaha Benni do lheꞌe lastoori, aca lanie lu qui edí edenlu ca tisa rixxiꞌa nu gualí bocaꞌan Tata Do iyyabaaha las nálu.

¹⁵ Lu nna chiba yulu, iyába ca benni ria le Jesús seꞌe lo yu te láni Asia bedhá iquicani neti. Aníagua beni Figelo lenna Hermógenes.

¹⁶ Benni bananie ri-na satúa lee ca benni seꞌe lheꞌe yoꞌo gue Onesíforo, cumu ixe libe bitabi bettettipabi lasia, tsa läga bettuinbi quia de xica tea lisiyya.

¹⁷ Delába nua nna atti bisíabi lheꞌe yiesi Roma-ni, tsaba bittu bedí lebi güequibi beguilabi neti axta liba bettettiꞌabi neti.

¹⁸ Lu nna gua yubalu de ya de yuda beni biꞌiniha ri atti useꞌeri lheꞌe yiesi Éfeso. Benni bananie ri-na satúa lee biꞌiniha gansi chi bisía sá utsá dubi loe.