2 Tesalonicenses 3 - Zapoteco de Aloápam

Pablo rábi ca benni seꞌe Tesalónica innábacabi lo Tata Do Iyyabaaha aca lanie bi

¹ Nnanna nna rinnabatu lenle, lebiꞌi ca benni ria le Jesús attiba riꞌitu, gualinnaba lo Tata Do Iyyabaaha aca lanie riꞌitu qui yuba isína ca tisa gue Jesús Benni bananie ri lheꞌe iyá yiesi, qui ute ca benni lidhaca Ben-na lhe attiba runle rutele lidhaca Ben-na.

² Gualinnaba guaba aca lanie riꞌitu qui lhátu lo ca benni bittu du ta lecani runi nu bittu anca tsee, cumu läga iyá benni ria leni Jesús.

³ Ttiaca Jesús Benni bananie ri-na anque benni runi nu rinnee. Lee nna gunbe tseꞌe tsitsile, guapabe le qui bittubi udhaca ni nu xxegüiha le.

⁴ Xenba letu, Jesús Benni bananie ri-na guaracaba lanie le qui runle nu chi rátu le unle, gusiguibale unle nu chi beleꞌentu le lhe.

⁵ Benni bananie ri-na aca lanie le qui acale benni raquin gue benni attiba racani Tata Do Iyyabaaha gueri, acale benni rugo ruchía lo nu ratena lhe attiba Cristu bego bechie lo nu guate.

Raca duelha cuenri sina

⁶ Lebiꞌi ca benni ria le Jesús attiba riꞌitu, runtu le mandadu gualuni lo niꞌa gue Jesucristu Benni bananie ri, iriesle nuxaba benni rana ria leni Jesús bittu raca leni bixa unna bittuguaba runna nu chi beleꞌentu le unle lhe.

⁷ Cumu lebiꞌi nna gua yubale gaxasná unle qui acale nu runi atti runtu. Riꞌitu nna lägabi useꞌetu cuenta atti useꞌetu len lebiꞌiha,

⁸ bittuguaba utotu elha go gue nuxa benni cuentaba nianna bittu utixatu lhe. Nu benlatu nna tsitsiba urentu sina rela resába qui bittu ucatu nu uni ichacha iquile guetu.

⁹ Riꞌitu nna gua teba roꞌotu gátu le unle riꞌitu yuda, ttiaca urenbatu sina qui anáchu lebiꞌi nna ugüiale gaxasná runtu qui aníaguaba unle.

¹⁰ Atti useꞌetu len lebiꞌiha nna rátu le: Nu bittu raca leni cuenna sina nna bittuguaba go nua.

¹¹ Riꞌitu nna chi binatu, ttulhele nna bitturu ribenle sina. Nu doba lele nna tsequile ugaꞌa guele atta bittu ralhale ugaꞌa guele.

¹² Lebiꞌi atta runle aná nna rulisatu le lhe rinnabatu lenle lhe gualunchi lo niꞌa gue Jesucristu, Benni bananie ri, lhatsiru gualuni, gualcuen sina qui te bixa gole.

¹³ Lebiꞌi ca benni ria le Jesús attiba riꞌitu, bittu saxxaquinle unle nu anca tsee.

¹⁴ Gansi nuxa bittu tsia leni nu rátu lo sitsi-ni nna gualuni qui tsanni lo anca nua nu bittu rudo tisa, bitturu igutsale na lhe qui ettuinna.

¹⁵ Ttiaca bittu iseꞌenle lenna gualudúla elha rieni iquini attiba runle leni adí ca benni ria le Jesús attiba riꞌi.

Ni riluxa nu rá Pablo ca benni seꞌe lheꞌe yiesi Tesalónica

¹⁶ Jesús Benni bananie ri-na anque Benni rute elha xen lasi. Ben-na utee elha xen lasi lenle ttu dia lii, atti bixaba ratele lhe. Cuina Ben-na aca lanie iyá xeale.

¹⁷ Neti Pablo, cuinaga neti runia letra atta riluxa nu dia lo sitsi-ni qui ridhelha ttu padiuxi guele. Aníba runia lo iyá ca sitsi quia ridhelha, aníguaba riguꞌu láya xa niꞌacani lhe.

¹⁸ Cuina Jesucristu Benni bananie ri-na aca lanie iyárecha le. Amén.