2 Pedro 3 - Zapoteco de Aloápam

Gasná aca gansi chi dabiga esía Jesús

¹ Ca benni ria le Jesús racatia gueni, unní ancana sitsi berupa ridhelha guele. Lo irpaba ca sitsi-na rulisale rudúa elha rieni iquile, runia qui anáchu ulaba lhatsiru lele.

² Gualorexxa lele gue nu chi rá ca profeta gue Tata Do Iyyabaaha atti nía. Gue nu beni Jesús, Benni bodile ri-na mandadu, ca apóstol-na uleꞌequinbi riꞌi.

³ Gueba nna neti nna raca lasia unale, gansi chi deoba isía sá lhuxa yies lo yu-ni, tseꞌe ca benni uni nu lä anca tsee ridá lecani uncana, lacana nna redacalaquinna innába tisacana innácana:

⁴ “¿Núcala esía Cristu Benni rále anca esíe? Cumu desde atti utti ca benniola gueriha ttuba anca axtaba nnanna ancaba attiba anca desde atti ureli yies lo yu-ni.”

⁵ Cumu ca unná nna tsa läga raca lecani orexxa lecani, atti nía nna lo bea-na lenna yies lo yu-ni nna ucacana atti unne Tata Do Iyyabaaha benie mandadu acacana. Yies lo yu-ni nna lheꞌe indaba benie biríana, lo indaba xuanie-na lhe

⁶ anáguaba yiesi ure ttuha, leni indaguaba biseꞌe lona.

⁷ La len tisa unne Tata Do Iyyabaaha lania, anáguaba inne gansi chi bisía sá unie elha uxtisi, lania nna utte leni gui yies lo yu-ni lhe lo bea-na lhe unguabe tsia nitti ca nu runi nu lä anca tsee-na lhe.

⁸ Anáguaba lebiꞌi ca benni ria le Jesús racatia gueni, bittu ixulhinle, ttu sá nna ancana attiba ttu mil ida len Tata Do Iyyabaaha. Ttu mil ida nna ancana attiba ttu sá len lee.

⁹ Läga rutsá Tata Do Iyyabaaha unie nu chi re unie, attiba rulaba le ttu chupa benni, sinuqui de rapaba Ben-na pasensi gueri, cumu läga raca le Ben-na tsia nitti ni ttu benni, iyába benni raca le Ben-na oduxiyyancana udaxxucana neda guee.

¹⁰ Ttiaca la sá atti chi gaꞌana esía Benni bananie ri-na, chi isíana atti bittu leda leri, attiba ttu ubana iyyaba le benni risinna lo rela rilána-na. Lania nna attulade tsuꞌu be iseꞌelo lo bea-na. Lo bea-na lenna iyába ca nu sia lo-ni utteba guicana, anáguaba yies lo yu-ni itebana lenna iyába nu seꞌe lo-ni.

¹¹ Cumu iseꞌeloba lo bea-na lhe yies lo yu-ni lhe denua nna lebiꞌi nna gualeriesi lheꞌe nu lä anca tsee, ¡gualudo tisa gue Tata Do Iyyabaaha lhe!

¹² Gualudo lele gualuni nu raca le Tata Do Iyyabaaha qui udhiubale esíe. La sá nna utseꞌe lo gui lo bea-na leni iyába nu sia lo-ni, iyábacana eyalhicana gansi chi bitecana.

¹³ Ttiaca riꞌi nna ribedabari ttu lo bea cubi leni ttu yies lo yu cubi, nu chi rá Tata Do Iyyabaaha utee len riꞌi, unnuha ancana ttu yiesi atta tseꞌe benni unna nu tsee raca le Tata Do Iyyabaaha.

¹⁴ Larcala nna ca benni ria le Jesús racatia gueni, laca seꞌele ribedale aca unní nna gualun duelha tseꞌe tseele len Benni, bittu unle nu lä anca tsee lhe qui bittu acale nu te tulha gueni atti esía Ben-na.

¹⁵ Gualorexxa lele, Benni bananie ri-na len pasensiba ribeda Ben-na cumu raca le lhá iyá benni. Anáguaba rá lo ca sitsi udhelha betsiri Pablo biꞌini raquinri guebi len lebiꞌi, ca nu benbi locani leni elha rieni bete Tata Do Iyyabaaha lenbi.

¹⁶ Lo iyába ca sitsi beni biꞌin-na rinnebi rulisabi le gue unní, gua liba nna seꞌe ttulhe ca tisa unnebi nu bittu cuenta anca tedeenri nu dia leque, denuala nna ca nu bittu gualíni chi ria lecani Tata Do Iyyabaaha ca nu rudú chupana lecani chi rotsíacana nu dia le ca tisa-na, attiguaba rotsíacana nu dia le adí ca tisa dia lo ca sitsi atta dia ca tisa gue Tata Do Iyyabaaha, de runcana aná nna la labacana rila guecani qui tsia nitticana.

¹⁷ Larcala nna ca benni ria le Jesús racatia gueni, lebiꞌi nna chiba yuxeabale gue nu ria-ni, gualudo cuidadu qui bittu dhielhale dhiyie ca nu lä dutalequinna le, nianna udhanle ria tsitsi lele Tata Do Iyyabaaha.

¹⁸ Nu unlale nna gualunbia tsee chatti Jesús benni bodile ri-na lhe Benni bananie ri-na lhe gualuni tseꞌe tsitsi chattile adí len elha tsee betee Ben-na len lebiꞌi. ¡Benna cuequi xenrie nnanna lhe ttu dia liiba lhe! Amén.