2 Pedro 2 - Zapoteco de Aloápam

Pedro rixxiꞌabi gue ca nu run leni requi rixxiꞌa ca tisa gue Jesús

¹ Ttiaca anáguaba useꞌe ca güen lasi rá dequi ancacana profeta gue Tata Do Iyyabaaha len ca benni Israel, anáguaba nnanna tseꞌeguaba ca maestru güen lasi len lebiꞌi. Ca unná nna sigába uleꞌecana nu uni tsia nitti benni, aná nna riguꞌu niꞌacani Benni bananie ri-na, Benni bodile cana qui bittu tsia nitticana, unnuha uni nna sattitte dia nitti la labacana.

² Ixe benni sanona ca unná uncana nu lä anca tsee ridále ca unná runcana, lo niꞌa guecani nna inne güe ca benni gue nu gualí anca neda gue Tata Do Iyyabaaha.

³ De ridáxxatalecani belhiu nna bixaba otsiꞌinu lecani uleꞌequinna le gue nu bittu anca gualí qui aca ilhupicana belhiu cuꞌele, ttiaca tsa läga lhácana, chiba dana ribigana guecani tsia nitticana, cumu axta ttuali chi boquinna iqui Tata Do Iyyabaaha tsiacana atta lexúa.

⁴ Cumu Tata Do Iyyabaaha tsa läga uxie elha xen lasi gue ca ingeli beni nu lä anca tsee, sinuqui bedelhale cana atta lexúa, lheꞌe atta anca chulha, nía guayacana qui ttua tseecana aca elha uxtisi guecani gansi chi bisía sá uni Tata Do Iyyabaaha elha uxtisi.

⁵ Niguaba ca benni useꞌe atti nía lä uxí Tata Do Iyyabaaha elha xen lasi guecani, sinuqui benle bisá inda yies lo yu-ni qui bija inda ca benni runi nu lä anca tsee seꞌe lania. Sunruba Noé biꞌini utixxiꞌani ca benni uncana nu anca tsee lo Tata Do Iyyabaaha lenbi a gasi ca benni ulá.

⁶ Aníaguaba beni Tata Do Iyyabaaha leni yiesi lá Sodoma lhe yiesi lá Gomorra lhe atti boquinna iquie ancacana nu te tulha gueni nna bettee cana leni gui, axta beacacana te, iyába unní uca qui ixuuna ugüia benni bixanca nu sate ca benni runi nu lä anca tsee seꞌe yies lo yu-ni.

⁷ Ttiaca bodilábe Lot, biꞌiniha ucabi ttu benni tsee, labi nna tsitsiba udo siꞌibi de rilenbi nu satsa ridá le ca nu lä duta lenia runcana.

⁸ Lot biꞌini beni nu anca tseeha nna atti udobi len ca unnuha nna ttuttu sába biyú lhiꞌu lheꞌe lastoobi elha disa de rilenbi lhe rieninbi lhe iyába nu satsa run ca benni seꞌe lheꞌe yiesi atta dobiha.

⁹ Iyá bunni ruleꞌe lo Tata Do Iyyabaaha guayúbe gaxasná unie odile ca benni rudo tisa guee lo nu ratecana, ca nu runi nu lä anca tsee-na nna chi seꞌe tseenie cana qui ugüe cana elha disa ralhacana dhicana gansi chi bisía sá aca elha uxtisi.

¹⁰ Ca nu rulaba leni ridá lecani runi nu lä anca tsee, anáguaba riguꞌu niꞌacani elha rinnabia gue Benni bananie ri-na lhe chi dhicana elha disa, de ancacana nu diti bittu rieni ni lhe nu reaxani runi ttu bixa lhe, lacana nna tsa bittu rasquinna reseꞌe disacana lo ca nu run tsitsi ra xxeni lee requi iyyabaaha.

¹¹ Inqui ca ingeli-na masquiba ancacabi nu raru tsitsi leni lhe benni ra xxeni leni lhe bittu reaxquinbi innee dicabi udelha iyyacabi ca unná lo Tata Do Iyyabaaha.

¹² Ca nu güen lasi-na nna ancabacana attiba ca nimala chulha leni lä caa elha rien guecani, sunruba ralicana qui iyaxxuni elhuttiha cana ulhuxancana. Lacana nna cuentaba rinne güecana gue nu lä radú lecani, ttiaca gattibacana attiba ratti ttu nimala,

¹³ dhibacana elha disa ralhacana dhicana. Resá do bisaba runcana nu lä anca tsee, lacana nna ancacana attiba ttu nu satsa nu runi rettuinle lhe nu runi rinne güe benni guele lhe laca yuꞌucana güiꞌiya go len lebiꞌi nna tsapaba reꞌo lecani gue nu lä anca tsee runcana.

¹⁴ Nuxaba nuila riláquinna ridá lecani, tsaba bittu rudú sicana runcana nu lä anca tsee. Chi ridiyiecana ca benni bittu chi ria tsitsi le Jesús, ancacana nu chi yu gaxasná uncana qui aca dhicana nu raca lecani, ca unná nna nu chi dia nittiba ancacana.

¹⁵ Lacana nna bedhanbacana neda tsee gue Tata Do Iyyabaaha, chiba bigannacana. Neda gue Balaam xiꞌini benni lá Beor la chi bedaxxucana, unnuha nua udá leni dhína belhi gue nu lä anca tsee benna.

¹⁶ Ttiaca bitisabana lo niꞌa gue nu lä anca tsee re leni unna, burru gueni nu bittu dica innea, unnena attiba ttu benni belisan-na, bittu begüeelhana usiguina leni nu bittu diquixuu rulaba leniha.

¹⁷ Ca maestru runi aná nna ancacana attiba ttu pozo bittu inda te lheꞌeni, attiba ttu bea nu che be-na gatti laduba dia lenna na lhe. Ca unná nna chiba gaꞌana tsiacana ttu tsaba atta anca chulha bexculoru.

¹⁸ Lacana nna runcana ttaba rinnecana ca tisa elha bittu dica ixuu, ttiaca tsa lägabi ixuu nua. Leni nu lä anca tsee runcana lhe nu satsa ridá lecani lhe runcana rixúyie ca benni ca nu penaba urecana biriescana ca nu runi nu lä anca tsee-na,

¹⁹ lacana nna rácana ca unna dequi gualábacana lo ca ley, ttiaca la labacana ancacana attiba nu ttoꞌo lo sina gue nu lä anca tsee seꞌecana runcana, cumu iyába benni nu bittu ridána udhanna nu lä anca tsee runna ancana attiba ttu nu ttoꞌo lo sina gue nua.

²⁰ Cumu ca benni chi benbiacana Jesucristu Benni bananie ri-na, Benni bodile ri-na lhe chiba ulácana lo nu lä anca tsee raca yies lo yu-ni, ttiaca gansi dequide lania nna eyequicana edeoncana nu lä anca tsee attu libe nna nu lä anca tseeha nna dhana edennabian cana, lania nna adílaba nu runi nu lä anca tsee acacana attichula primeroha.

²¹ Denuala nna tseerla anca ttirca bittuba benbiacana neda gue Tata Do Iyyabaaha, attichula dequide chi benbiacana Ben-na nna nianna eyequicana udhancana udocana tisa gue nu beni Tata Do Iyyabaaha mandadu uncana.

²² Leni unní raxxína nu dia le ttu tisa chi tee rinne benni: “Becuha nna bequibana beona nu beabi-na.” Chi te attu nu rá: “Cutsi nu chi udibaha nna bedequi dacabana bedetubina lo guna attu libe.”