2 Pedro 1 - Zapoteco de Aloápam

¹ Neti Simón Pedro benni rixuu lo sina gue Jesucristu, anca apóstol, nu chi gaꞌananie iche ca tisa guee. Ridhelha sitsi-ni guele lebiꞌi ca benni ria lele Jesús attiba riꞌitu, cumu Tata Dios gueri Jesucristu Benni bodile ri anque Benni ttu dia liiba runi nu anca tsee.

² De chi anca bienle Tata Do Iyyabaaha, anáguaba Jesús Benni bananie ri-na lhe cuina laque acachatti lenque le lhe unque tseꞌele xen su lee lhe.

Gualtseꞌe gualuni nu raca lee Tata Do Iyyabaaha

³ Tata Do Iyyabaaha, leni elha ra tsitsi le guee chi betee iyá nu reasinri qui tseꞌeri unri nu radi lee. Iyába nu bete Ben-na len riꞌi nna uxíri-na de chi anca bienri Jesucristu. Benna uxie ri lo neda guee cumu de anque Benni ra xxeni lee lhe de anque Benni du tseeru lee lhe.

⁴ De nua nna chi begüee Tata Do Iyyabaaha tisa len riꞌi, utee ttu nu gaꞌana tsee nu texxatta lidhacani len riꞌi, qui de nu chi re utee len riꞌi nna eꞌeyuri acari benni runi nu anca tsee, attiba Tata Do Iyyabaaha anque Benni runi nu anca tsee. Anía nna lhári lo nu tsiga te yies lo yu-ni lhe nu ridá leri runri lhe.

⁵ Larcala nna gualuni duelha tsiaru lele Tata Do Iyyabaaha, dequide nu chi riaru lele Ben-na, lania nna acale benni runi nu anca tsee, dequide acale benni runi nu anca tsee nna acale benni te elha rieni gueni,

⁶ de chi ancale nu te elha rien gueni nna nuarca chi ancale nu ridána rinnabia elha rieni gueni, cumu de chi anca le nu ridána rinnabia elha rieni gueni nna nuarca ancale nu rebesiꞌi leni, cumu de chi ancale nu rebesiꞌi leni nna nuarca ancale nu runi nu anca tsee lo Tata Do Iyyabaaha,

⁷ cumu de chi ancale nu runi nu anca tsee lo Tata Do Iyyabaaha nna nuarca ancale nu raca siꞌin loesni, cumu de chi ancale nu raca siꞌin loesni nna nuarca raquin gue loesle.

⁸ Cumu gansi lebiꞌi seꞌele runle aná, rudona lele rusiguile runtseerle lhe lania nna guancabale benni rixuu, bittuguaba cuenta benbiale Jesucristu Benni bananie ri-na lhe.

⁹ Ttiaca ca nu bittuba seꞌe runi aná nna attiba ttu nu xua loni anca ca nua, attiba ttu nu bittu rilátseeni lhe cumu de chi bixulhaquinna Tata Do Iyyabaaha nna chiba uxie elha xen lasi gue ca tulha bencana ttuha.

¹⁰ Larcala nna ca benni ria le Jesús, gualun duelha gualuleꞌe lo chatti lebiꞌi nna gua liba chi ancale benni uxi Tata Do Iyyabaaha lhe benni chi becuee aca guee lhe cumu gansi seꞌele runle aná nna tsa läga iriesle lo neda gue Tata Do Iyyabaaha.

¹¹ Aná nna yaliru lo neda guele etaꞌale atta tsa bittu lhuxa rinnabia Jesucristuha, Ben-na anque Benni rinnabie ri, anque Benni bodile ri lhe.

¹² Larcala neti nna usiguiba orexxalele gue nu ria-ni, masquiba chi yule na lhe chi seꞌe tsitsile len nu ria lele anca gualí yule nnanna lhe.

¹³ Neti nna racatia, tseeba anca laca do bania nna ulisa chattia le len ca tisa-ni,

¹⁴ cumu Jesucristu Benni bananie ri-na chiba utixxiꞌanie neti dequi attu sattirba doa yies lo yu-ni.

¹⁵ Ttiaca gunba duelha qui eyaꞌan tsitsi nu ria-ni lheꞌe iquile, qui anáchu dequide chi uttia nna lebiꞌi nna satía exxa lele gue nu ria-ni.

Ca apóstol biláquinbi anca Cristuha benni ra xxeni lee

¹⁶ Cumu nu beleꞌentu le gue edesia Jesucristu Benni bananie ri-na Benni ra xxeni lee-na, läga anca unná nu besiꞌinutu bexxe letu utixxiꞌentu le, sinuqui len cuinaga lotu begüiatu anca Benni bananie ri-na Benni ra xxeni lee.

¹⁷ Riꞌitu nna aníga bilentu atti betee Dios Benni anque Tata gue Ben-na lidhaca xen gue Jesús, uluꞌe Ben-na lheꞌe xieni gaꞌana tsee guee lhe nianna bieni tsiꞌi Tata Do Iyyabaaha re: “Benni anque Xiꞌinia, Benni racatia guee, neti doa redaca lasia len lee.”

¹⁸ Riꞌigatu bienintu tsiꞌe biríe dee iyyabaaha, atti useꞌetu len Jesús lo lhilhi anca leꞌaha.

¹⁹ Anáguaba teeguaba len riꞌi ca sitsi dia ca tisa rixxiꞌaga gue nu unne ca benni uca profetaha. Lebiꞌi nna tseeba runle rudá nagale gue nu rá ca tisa-na, cumu ca tisa-na ancaque attiba ttu gui rudani atta anca chulha, axta liba tsani nna lania liba iría beli güedíla-na qui udanie lhiꞌu lheꞌe lastoole.

²⁰ Gueba nna rdaca sadú lele, ni ttu ca tisa dia lo ca sitsi gue Tata Do Iyyabaaha bittu ancaque nu guaca gue ttu benni quixxiꞌana nu dia lee leni nunca elha rieni gueni.

²¹ Cumu ca profetaha nna ni ttu libe bittu unnecabi nu yuꞌuba iquicabi, delába unnuha nna lacabi nna unnebacabi ca tisa betee Espíritu gue Tata Do Iyyabaaha len lacabi.